21 Jan 2026, 13:30
ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދޭ ޔުނައިޓެޑް ނޭޝަންސް ރިލީފް އެންޑް ވޯކް އެޖެންސީ (އަންރުވާ) ހިންގާ އިމާރާތް އިސްރާއިލުން ތަޅާލުން ދިވެހި ސަރުކާރުން މިއަދު ކުށްވެރިކޮށްފިއެވެ.
ޝެއިޚް ޖައްރާ ސަރަހައްދުގައި ހުންނަ އެ އިމާރާތް ތަޅާލުމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ވަނީ، މިފަދަ އަމަލުތަކަކީ ބައިނަލްއަގުވާމީ ގާނޫނުތަކާ ޚިލާފަށް، އިންސާނީ އެހީތެރިކަން ފޯރުކޮށްދޭ އިދާރާތަކުގެ މަސައްކަތަށް ހުރަސްއެޅޭ ކަމެއް ކަމަށެވެ.
އެ ފަދަ ކަންކަމުގެ ސަބަބުން ފަލަސްތީނުގެ ރައްޔިތުންގެ ހާލަތު މިހާރަށް ވުރެ ގޯސްވާނެ ކަމަށް ފޮރިން މިނިސްޓްރީން ބުނެފައިވެއެވެ.
ފަލަސްތީނުގެ ރައްޔިތުންނަށް ބޭނުންވާ އަސާސީ އެހީތެރިކަމާއި ރައްކާތެރިކަން ފޯރުކޮށްދިނުމުގައި އެ ޖަމިއްޔާއިން އަދާކުރާ މުހިންމު ދައުރު ފާހަގަކޮށް، ދިވެހި ސަރުކާރުން ވަނީ އެ ކަމަށް ތާއިދުކޮށްފައެވެ.
އޭގެ އިތުރަށް، ބައިނަލްއަގުވާމީ ގާނޫނުތަކާ އިސްރާއީލުން ތަކުރާރުކޮށް ޚިލާފުވަމުންދާތީ އެ ގައުމު ޒިންމާދާރުކުރުވުމަށްޓަކައި ބައިނަލްއަގުވާމީ މުޖުތަމައުން އަދާކުރަންޖެހޭ ޒިންމާތައް އަދާކުރުމަށް ރާއްޖޭން ވަނީ ގޮވާލާފައެވެ. އަދި، އަމަލީ ގޮތުން ބައިނަލްއަގުވާމީ މުޖުތަމައުތަކުން އިސްރާއިލާ ދެކޮޅަށް ހަރުދަނާ ފިޔަވަޅުތަކެއް އެޅުމަށް ފޮރިން މިނިސްޓްރީން ތަކުރާރުކޮށް ވަނީ ގޮވާލާފައެވެ.