04 Sep 2026, 15:20
ޗެޓްޖީޕީޓީ އުފެއްދި އޯޕަންއޭއައި ކުންފުނިން އެ ކުންފުނީގެ އެންމެ ފަހުގެ އަދި އެންމެ ބާރުގަދަ އާޓިފިޝަލް އިންޓެލިޖެންސް (އޭއައި) މޮޑެލް ކަމަށްވާ "ޖީޕީޓީ-6" ނުވަތަ "އެސްޓްރާ" ހޮވާލެވޭ ވަކި ޚާއްޞަ ކަސްޓަމަރުންތަކަކަށް ދޫކުރަން ފަށައިފިއެވެ.
އެ ކުންފުނިން ހާމަކުރި ގޮތުގައި މި މޮޑެލް ނެރެފައިވަނީ ސަލާމަތީ ނުރައްކާތައް ކުޑަކުރުމަށްޓަކައި ޚާއްޞަ ރައްކާތެރިކަމުގެ ފިޔަވަޅުތަކާއެކުގައެވެ.
އޯޕަންއޭއައިގެ ރައީސް ގްރެގް ބްރޮކްމަން ބުރާސްފަތި ދުވަހު ނޫސްވެރިންނާ ވާހަކަދައްކަވަމުން ވިދާޅުވީ، މިފަދަ މަތީ ފެންވަރުގެ ޤާބިލުކަމެއް ހުރި މޮޑެލްއެއްގައި އެންމެ އިސްކަމެއް ދޭންޖެހޭނީ ސަލާމަތާއި ރައްކާތެރިކަމަށް ކަމަށެވެ. އަދި އިންސާނުންގެ ވިސްނުމާ އެއްވަރަށް ގިނަ މަސައްކަތްތައް ކުރެވޭ ހިސާބަށް އޭއައި ތަރައްޤީވުން ނުވަތަ އާޓިފިޝަލް ޖެނެރަލް އިންޓެލިޖެންސް (އޭޖީއައި) ގެ އައު ދައުރަކަށް މިހާރު ވަދެވިފައިވާ ކަމަށް ޤަބޫލުކުރުމަކީ ހަމަޖެހޭ ކަމެއް ކަމަށްވެސް އޭނާ ފާހަގަކުރެއްވިއެވެ.
މި އައު މޮޑެލް ނެރެފައި މިވަނީ އެ ކުންފުނީގެ ކުރީގެ ފްލެގްޝިޕް މޮޑެލް ކަމަށްވާ ޖީޕީޓީ-5 ތަޢާރަފުކުރިތާ އަހަރަކަށްވުރެ ގިނަ ދުވަސް ފަހުންނެވެ. މި މުއްދަތުގެ ތެރޭގައި އޯޕަންއޭއައި އާއި ވާދަވެރި އެންތްރޮޕިކް ކުންފުނީގެ ސިސްޓަމްތަކާ ގުޅިގެން ހިނގި ބައެއް ހާދިސާތަކަށްފަހު، އެޑްވާންސްޑް މޮޑެލްތަކުގެ ނުރައްކަލާމެދު ކަންބޮޑުވުންތައް ވަނީ ބޮޑުވެފައެވެ.
މިދިޔަ ހޫނުމޫސުމުގައި އޭއައި ޕްލެޓްފޯމެއް ކަމަށްވާ ހަގިން ފޭސް އަށް ދިމާވި ސައިބާ ސެކިއުރިޓީ ބްރީޗެއްގައި އޯޕަންއޭއައި އިން ޓެސްޓުކުރަމުން ދިޔަ ދެ މޮޑެލްއެއް ބައިވެރިވުމާ ގުޅިގެން، އެ ކުންފުނިން ވަނީ މޮޑެލްތައް ތަރައްޤީކުރުމުގެ ބައެއް މަސައްކަތްތައް ދެ ހަފުތާއަށް މެދުކަނޑާލާފައެވެ. ނަމަވެސް އެ ހާކިންގެ ހާދިސާގައި އެސްޓްރާ މޮޑެލް ބައިވެރިވެފައި ނުވި ނަމަވެސް، އެސްޓްރާ ތަރައްޤީކޮށްފައިވަނީ އެ ހާދިސާއަށްފަހު އަޅަންޖެހޭ ވަރުގަދަ ރައްކާތެރިކަމުގެ ފިޔަވަޅުތަކާއެކު ކަމަށް އެ ކުންފުނިން ބުނެއެވެ.
އެ ހާދިސާއާ ގުޅިގެން ކުންފުނީގައި ފުރިހަމަ ބެލެހެއްޓުންތެރިކަމާއި އެކަށީގެންވާ ސަލާމަތީ ފިޔަވަޅުތައް ނެތް ކަމަށް ބުނެ، އެމެރިކާގެ އަލަބާމާ ސްޓޭޓުން ވަނީ މިދިޔަ ހަފުތާގައި އޯޕަންއޭއައިގެ މައްޗަށް ތަޙުޤީޤެއް ފަށާފައެވެ.
އައު މޮޑެލް އެންމެ ފުރަތަމަ ލިބިގެންދާނީ ސައިބާ ސެކިއުރިޓީ ދާއިރާގެ ބައެއް ކަސްޓަމަރުންނަށް ކަމަށްވާއިރު، ފައިސާ ދައްކައިގެން ޚިދުމަތް ހޯދާ އެހެން ކަސްޓަމަރުންނަށް ވެސް ފަހުން ފުރުޞަތު ފުޅާކުރާނެއެވެ. ނަމަވެސް، ހިލޭ ޚިދުމަތް ބޭނުންކުރާ ފަރާތްތަކަށާއި އެންމެ އަގުހެޔޮ ޕެކޭޖްތައް ބޭނުންކުރާ ފަރާތްތަކަށް މި މޮޑެލް ބޭނުންކުރުމުގެ ފުރުޞަތު ނޯންނާނެ ކަމަށް އޯޕަންއޭއައި އިން ވަނީ ހާމަކޮށްފައެވެ.
އޯޕަންއޭއައިގެ ބްލޮގް ޕޯސްޓެއްގައި ބަޔާންކޮށްފައިވާ ގޮތުގައި، އެސްޓްރާ މޮޑެލް މެދުވެރިކޮށް އަމިއްލަ އިޚުތިޔާރުގައި ކޮމްޕިއުޓަރުގެ އުނދަގޫ އަދި ދިގު މަސައްކަތްތައް އަމިއްލައަށް ކުރުމުގެ ޤާބިލުކަން ލިބިގެންވެއެވެ. އޭގެ ތެރޭގައި ވެބްސައިޓް ހެދުމާއި، ސައިންޓިފިކް ދިރާސާތައް ތަޙުލީލުކުރުމާއި، ގޭމް ޑިވެލޮޕްކުރުމާއި، ކޯޑިން އަދި ސައިބާ ސެކިއުރިޓީގެ މަސައްކަތްތައް ހިމެނެއެވެ.
މި މޮޑެލްގެ ސަބަބުން ވަގުތު ސަލާމަތްވާ މިންވަރު ހާމަކުރުމުގެ މިސާލެއްގެ ގޮތުން ކުންފުނިން ފާހަގަކުރީ، ކުއްޔަށް ހިފާނެ އެޕާޓްމަންޓެއް ހޯދުމަށް އާންމުކޮށް ހޭދަވާ ހަ ގަޑިއިރުގެ ވަގުތު މި މޮޑެލް މެދުވެރިކޮށް 10 މިނެޓަށްވުރެ ކުރު ވަގުތުކޮޅަކަށް ކުޑަކޮށްލެވޭނެ ކަމަށެވެ.
އޯޕަންއޭއައި އިން އެންމެ ކުރީކޮޅު އެންމެ ބޮޑު އިންވެސްޓްމަންޓެއް ކުރި މައިކްރޮސޮފްޓާއެކު ވެފައިވާ އެއްބަސްވުމުގައި، އޭޖީއައި ހާސިލުވުމުން އެކްސްކްލޫސިވް މާއްދާތައް ނިމުމަކަށް އަންނާނެ ކަމަށް އޮތް މާއްދާތައް މިއަހަރުގެ އޭޕްރީލް މަހު ވަނީ އުވާލާފައެވެ.
މި އައު ކުރިއެރުމާއެކުވެސް، އޯޕަންއޭއައިގެ ޗީފް ސައިންޓިސްޓް ޔަކޫބް ޕަޗޯކީ ވިދާޅުވީ، އައު މޮޑެލްއެއް ނެރުމަށްފަހު އެ މޮޑެލް އަމަލުކުރާނެ ގޮތާމެދު އަދިވެސް ޔަޤީންކަން ކުޑަ ކަންތައްތަކެއް ހުންނަ ކަމަށެވެ. މޮޑެލްއެއް އޭގެ ލަނޑުދަނޑި ހާސިލުކުރުމުގައި ކިތަންމެ މޮޅުވި ނަމަވެސް، ބޭނުންކުރާ މީހާ ޤަޞްދުކުރި ގޮތާ ޚިލާފަށް ބައެއް ފަހަރު އަމަލުކޮށްފާނެ ކަމަށާއި، ރައްކާތެރިކަމާމެދު ފުރިހަމަ އިތުބާރު ނެތްނަމަ އިތުރަށް ފުޅާކުރުމުގެ މަސައްކަތް މަޑުޖައްސާލަން ނުވަތަ ހުއްޓާލަން ތައްޔާރަށް ތިބެންޖެހޭނެ ކަމަށް އޭނާ ވިދާޅުވިއެވެ.
އޭއައިއާ ގުޅުންހުރި ސައިބާ ސެކިއުރިޓީގެ ނުރައްކާތަކަށް ދުނިޔޭގެ ފެންވަރުގައި އެއްބާރުލުންދީގެން ހައްލު ހޯދުމަށް ގޮވާލައި އޯޕަންއޭއައި އާއި އެންތްރޮޕިކް އަދި 100 އަށްވުރެ ގިނަ ޖަމްޢިއްޔާތަކުން ވަނީ މިދިޔަ ހަފުތާގައި ބަޔާނެއްގައި ސޮއިކޮށްފައެވެ.
މީގެ އިތުރުން، އޭއައި ރައްކާތެރިކަމުގެ މިންގަނޑުތައް އެކުލަވާލުމަށާއި އިތުރަށް ތަރައްޤީކުރާ ދުވެލި ކޮންޓްރޯލްކުރުމަށް އިންޑަސްޓްރީގެ އެންމެން ގުޅިގެން މަސައްކަތްކުރުމަށް އެންތްރޮޕިކް އިން ވަނީ ގޮވާލާފައެވެ.
ޕަޗޯކީ ވެސް ވަނީ އެންމެން ގުޅިގެން ސަލާމަތީ މިންގަނޑުތައް އެކަށައެޅުމަށާއި ބައިނަލްއަޤްވާމީ ފެންވަރުގައި މަސައްކަތްތައް ވިލަރެސްކުރުމަށް މިހާރުން މިހާރަށް އިސްކަންދޭންޖެހޭ ކަމަށް ވިދާޅުވެފައެވެ.