25 Apr 2013, 15:35
މިދިޔަ އަހަރުގެ ފެބްރުއަރީ އަށް ވަނަ ދުވަހު ގދ. ތިނަދޫ ޕޮލިސް ސްޓޭޝަނަށް ގެއްލުން ދިންކަމަށް ތުހުމަތު ކުރެވޭ ހަތަރު ކުއްޖެއްގެ މައްޗަށް ޓެރަރިޒަމްގެ ދައުވާ ސާބިތުކުރުމަށް ދައުލަތުން ހުށަހެޅި ހެކީންގެ ތެރެއިން ދެ މީހެއްގެ ހެކިބަސް ނަގައިފި އެވެ.
ޖުވެނައިލް ކޯޓުގެ އިސް އޮފިޝަލަކު ވިދާޅުވީ މިއަދު ބޭއްވި ޝަރީއަތުގެ މަޖިލީހުގައި ނަގާފައި ވަނީ ދައުވާ ލިބޭ އެއްކުއްޖެއްގެ މައްޗަށް ދައުލަތުން ހުށަހެޅި ހެއްކަކާއި ހަތަރު ކުދީންގެ މައްޗަށް ހުށަހެޅި ހެއްކެއްގެ ހެކިބަސް ކަމަށެވެ. ނަމަވެސް ހެކިބަސް ލިބުނު ގޮތެއް އޮފިޝަލް ވިދާޅެއް ނުވެ އެވެ.
"މިއަދުގެ ޝަރީއަތުގެ މަޖިލީހުގައި އޮތީ ދައުލަތުން ހުށަހެޅި ދެ ހެއްކެއްގެ ހެކިބަސް ނެގުން. އެ ދެ ހެކީންގެ ތެރެއިން އެއްހެއްކަކު ހުށަހަޅާފައި ވަނީ އެއް ކުއްޖެއްގެ މައްޗަށް ހެކިބަސް ދިނުމަށް. އަނެއް ހެކި ހުށަހަޅާފައި ވަނީ ހަތަރު ކުދިންގެ މައްޗަށް ހެކިބަސް ދިނުމަށް،" އޮފިޝަލް ވިދާޅުވި އެވެ.
އެ ހަތަރު ކުދީންނަށް ވެސް މިހާރު ވަނީ 18 އަހަރު ފުރިފަ އެވެ.
ދައުވާ ސާބިތު ކުރުމަށް ދައުލަތުން ހުށަހެޅި 12 ހެކީންގެ ތެރެއިން ފަސް މީހެއްގެ ހެކިބަސް އަދި ނެގިފައި ނުވާ ކަމަށް ވެސް ޖުވެނައިލް ކޯޓުގެ އޮފިޝަލް ވިދާޅުވި އެވެ.
ދައުލަތުން ހުށަހެޅި ހެކީންގެ އިތުރުން މިއަދުގެ ޝަރީއަތުގައި ދައުވާ ލިބޭ އެއްކުއްޖަކު ހުށަހަޅާފައިވާ ދިފާއީ 10 ހެކީންގެ ތެރެއިން ދެ މީހެއްގެ ހެކިބަސް ނަގާފައިވާ ކަމަށް ވެސް ޖުވެނައިލް ކޯޓުގެ އޮފިޝަލް ވިދާޅުވި އެވެ.
"އެކުއްޖާ ވަނީ ދިފާއީ ހެކީންގެ ގޮތުގައި 70 ހެއްކަކު ހުށަހަޅާފައި. ނަމަވެސް ޝަރީއަތުން ނިންމީ އޭގެތެރެއިން 10 ހެއްކަކު ބަލައިގަތުމަށް. މިއަދުގެ ޝަރީއަތުގެ މަޖިލީހުގައި ވަނީ އޭގެ ތެރެއިން ދެ ހެއްކެއްގެ ހެކިބަސް ނަގާފައި،" އޮފިޝަލް ވިދާޅުވި އެވެ.
އެއް ކުއްޖަކު ހުށަހެޅި ދިފާއީ ހެކީންގެ ތެރެއިން 10 ހެއްކަކު ޝަރީއަތުން ބަލައިގެންފައިވާ އިރު އަނެއް ތިން ކުދިން ހުށަހެޅި ދިފާއީ ހެއްކިތައް ބަލައިގަތުމާ މެދު ޝަރީއަތުން އަދި ވަކިގޮތެއް ނިންމާފައި ނުވާ ކަމަށް ވެސް ޖުވެނައިލް ކޯޓުގެ އޮފިޝަލް ވިދާޅުވި އެވެ.
އެ މައްސަލައިގެ އިތުރު ޝަރީއަތުގެ މަޖިލީހެއް ދެން އޮންނާނީ އަންނަ މަހުގެ ތެރޭގައި ކަމަށާއި އެދުވަހު ވެސް އޮންނާނީ ދައުލަތުން ހުށަހަޅާފައިވާ ހެކީންގެ ހެކިބަސް ނެގުން ކަމަށް ވެސް ޖުވެނައިލް ކޯޓުގެ އޮފިޝަލް ވިދާޅުވި އެވެ.
ޖުވެނައިލް ކޯޓުގެ އޮފިޝަލް ވިދާޅުވީ އެ ހަތަރު ކުދީންގެ މައްޗަށް ޓެރަރިޒަމްގެ ދައުވާކޮށްފައި ވަނީ ފެބުރުއަރީ އަށް ވަނަ ދުވަހުގެ ހަވީރު 4:30 އާއި އެރޭ 8:30އާއި ދެމެދުގެ ވަގުތެއްގައި ތިނަދޫ ޕޮލިސް ސްޓޭޝަން ދޮށަށް އެއްވެ ފުލުހުންނަށް ހަމަލާދީ، ޕޮލިސް ސްޓޭޝަނަށާއި އެތާގެ މުދަލަށް ގެއްލުންދީފައިވާ ކަމަށް ތުހުމަތު ކުރެވޭތީ ކަމަށެވެ. އަދި ހަމަ އެދުވަހުގެ ވަގުތެއްގައި ގދ. އަތޮޅު ކައުންސިލްގެ އިދާރާ ތެރެއަށް އެ ހަތަރު ކުދިން ވަދެގަތް ކަމަށް ތުހުމަތު ކުރެވޭ ކަމަށް ވެސް ޖުވެނައިލް ކޯޓުގެ އޮފިޝަލް ވިދާޅުވި އެވެ.
އެ ހަތަރު ކުދިންގެ މައްޗަށް ވެސް ދައުވާ ކޮށްފައި ވަނީ ރާއްޖޭގައި ޓެރަރިޒަމް މަނާކުރުމުގެ ގާނޫނުގެ ދެވަނަ މާއްދާގެ (ޅ) އާއި (ކ) އާއި ހަވާލާދީ އެގާނޫނުގެ ހަވަނަ މާއްދާގެ (ށ) ގެ ދަށުން ކަމަށް ޖުވެނައިލް ކޯޓުން ބުންޏެވެ.
އެ ގާނޫނުގައި ބުނަނީ އެފަދަ ކުށެއް ސާބިތުވެއްޖެ މީހެއްގެ އަދަބަކީ 10އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުން ނުވަތަ އަރުވާލުންކަމަށެވެ.
ގާނޫނުގައި އެ އަދަބު ކަނޑައަޅާފައި އޮތްނަމަވެސް ދައުވާ ސާބިތުވެއްޖެ ނަމަ އެ ކުދިންނަށް އަންނާނީ އެއަށް ވުރެ ކުޑަ އަދަބެކެވެ. އެއީ ކުޑަކުދިން ކުރާ ކުށްތަކަށް އަދަބު ދިނުމުގައި އަމަލުކުރަންވީ ގޮތުގެ ގަވާއިދުގައި ކުޑަކުދިން ކުރާ ކުށްތަކަށް ދޭންޖެހޭނީ އެ ކުށަށް ގާނޫނުގައި އޮންނަ އެންމެ ލުއި އަދަބެއްގެ ތިން ބައި ކުޅަ ދެ ބައި ކަމަށް ބުނެފައިވާތީ އެވެ.
ފެބްރުވަރީ އަށްވަނަ ދުވަހު ތިނަދޫ ޕޮލިސް ސްޓޭޝަނާއި ތިނަދޫ މެޖިސްޓްރޭޓް ކޯޓާއި އެ ރަށުގައި ހުންނަ ގދ. އަތޮޅު ކައުންސިލް އިދާރާ ކުރިމައްޗަށް އެއްވެ ޓެރަރިޒަމްގެ އަމަލުތައް ހިންގާފައިވާ ކަމަށް ތުހުމަތު ކުރެވޭ 89 މީހެއްގެ މައްޗަށް ވެސް ދައުލަތުން ވަނީ ޓެރަރިޒަމްގެ ދައުވާ އުފުލާފަ އެވެ. އެ މީހުންގެ ތެރޭގައި ކައުންސިލަރުންނާއި ސިވިލްސާވަންޓުންގެ ގޮތުގައި ވަޒީފާ އަދާކުރާ ބައެއް މީހުން ވެސް ހިމެނެ އެވެ.