ފައިނަލް މެޗުގައި ދެޓީމުގެ ފަރާތުން ވެސް ފޯރިގަދަ ކުޅުމެއް ފެނިގެން ގޮސްފައިވާއިރު، ފުރަތަމަ ހާފު ނިމުމުގެ ކުރީން ޕީޑީއާރުއެމުން ވަނީ، ދެލަނޑުގެ ލީޑެއް ހޯދައިފައެވެ. އެޓީމުގެ ފުރަތަމަ ލަނޑު، މެޗުގެ 12 ވަނަ މިނިޓްގައި ޑްރަމާނޭ ޓްރައޮރޭ ކާމިޔާބުކޮށްދިން އިރު 23 ވަނަ މިނިޓްގައި އެޓީމަށް ދެވަނަ ލަނޑު ކާމިޔާކޮށްދިނީ ދަގަނޑޭއެވެ.

ޕީޑީއާރުއެމްގެ ތިން ވަނަ ލަނޑު އެޓީމް ކާމިޔާބުކުރީ ދެވަނަ ހާފުގައެވެ. އެޓީމަށް 51 ވަނަ މިނިޓްގައި ލަނޑު ޖަހައިދިނީ ދަގަނޑޭއެވެ.

މާޒިޔާގެ ފުރަތަމަ ލަނޑު އެޓީމަށް ކާމިޔާބުކޮށްދިނީ، 73 ވަނަ މިނިޓްގައި މުޙައްމަދު އިރުފާންއެވެ. އަދި އެޓީމަށް ލިބުނު ޕެނަލްޓީއަލުން 85 ވަނަ މިނިޓްގައި މާޒިޔާގެ ދެވަނަ ލަނޑު ކާމިޔާބުކޮށްދިނީ އެޓީމުގެ ކެޕްޓަން އަސަދުﷲ އަބްދުﷲއެވެ. އަދި މެޗުގައި އެޓީމަށް ނަތީޖާ ހަމަހަމަކޮށްދިނީ ދެވަނަ ހާފުގެ އިތުރު ވަގުތުގައި އަހްމަދު އިމާޒު (އާއްކޮ) އެވެ. މި ނަތީޖާއާއެކު މެޗުގެ ނަތީޖާ ނެރުމަށް 15 މިނިޓްގެ ދެ ހާފަށް މެޗު ދިގު ދެމިގެން ދިޔައެވެ.

އިތުރު ވަގުތުގެ ފުރަތަމަ ހާފުގައި މާޒިޔާގެ މުޙައްމަދު ސާއިފު، ޕީޑީއާރުއެމްގެ ދަގަނޑޭއަށް ކުރި ފައުލަކާއެކު ދެ ރީދޫ ކާޑު ހަމަވެ، އޭނާއަށް ރެފްރީ ވަނީ ރަތްކާޑެއް ދައްކާފައެވެ. އެހެން ކަމުން އިތުރު ވަގުތުގެ 30 މިނިޓްގެ ބޮޑުގައި މާޒިޔާއިން ކުޅެން ޖެހުނީ އެއް ކުޅުންތެރިއަކު މަދުންނެވެ.

ޕީޑީއާރުއެމުން ދެވަނަ ފަހަރަށް ލީޑު ނެގީ މެޗުގެ 95 ވަނަ މިނިޓްގައެވެ. އެޓީމަށް ލަނޑޫ ޖަހައިދިނީ ޓްރައޮރޭއެވެ. އެއީ އޭނާ މި މުބާރާތުގައި ކާމިޔާބުކުރި ހަވަނަ ލަނޑެވެ. 108 ވަނަ މިނިޓްގައި ދަގަނޑޭ އޭނާގެ ހެޓްރިކް ހަމަކޮށް، ޕީޑީއާރުއެއަށް ދެލަނޑުގެ ލީޑެއް ހޯދައިދީފައި ވަނިކޮށް މާޒިޔާގެ ފަހު ލަނޑު 112 ވަނަ މިނިޓްގައި ކާމިޔާބުކޮށްދިނީ އެޓީމުގެ ޕަބްލޯ ރޮޑްރިގޭޒް އެވެ، ރޮޑްރިގޭޒް ވެސް ވަނީ މި މުބާރާތުގައި ފަސް ލަނޑު ކާމިޔާބުކޮށްފައެވެ.