25 Mar 2015, 15:33
ބިދޭސީން މުޒާހަރާތަކުގައި ބައިވެރިވާ ނަމަ، އެ މީހުންގެ ވޯކްޕާމިޓް ހުއްދަ ބާތިލު ކުރާނެ ކަމަށް އިމިގުރޭޝަނުން ބުނެފި އެވެ.
ދެ ބިދޭސީއެއްގެ މަރާއި ބިދޭސީންނަށް ގެއްލުންތައް ދެމުންދާތީ އަންނަ ހުކުރު ދުވަހު މާލޭގައި މުޒާހަރާއެއް ކުރުމަށް ބިދޭސީންތަކެއް އިސްވެ ވަނީ ރާވައިފަ އެވެ. ހުކުރު ނަމާދަށް ފަހު ބާއްވާ އެ މުޒާހަރާ އަށް ދިޔުމަށް އެސްއެމްއެސް މެދުވެރިކޮށް ދަނީ އަންގަމުންނެވެ.
އެކަމާ ގުޅޭ ގޮތުން އިމިގްރޭޝަންގެ މީޑިއާ އޮފިޝަލް އަދި އިންފޯމޭޝަން އޮފިސަރު ހަސަން ހަލީލް މިއަދު "ސަން" އަށް ވިދާޅުވީ، އެފަދަ ކަންކަމާ ގުޅޭ ގޮތުން ގާނޫނުގެ ދަށުން އިމިގްރޭޝަނަށް ލިބިފައިވާ އިހުތިޔާރުގެ ދަށުން އެފަދަ ދޭސީންގެ ހުރިހާ ހުއްދައެއް ބާތިލު ކުރުމާއި ޑީޕޯޓް ކުރުމާއި ޖޫރިމަނާ ކުރުމުގެ ބާރު ލިބިގެންވާ ކަމަށެވެ. އެ މައްސަލާގައި ދެވަނަ ފުރުސަތެއް ނުދީ ފިޔަވަޅު އަޅާނީ ވަރަށް ހަރުކަށިކޮށް ކަމަށް އޭނާ ވިދާޅުވި އެވެ.
"މިކަމުގައި ޖޫރިމަނާއެއް ނޫން، އަންނާނީ އެމީހެއް ހުއްދަ ބާތިލު[ކުރުން އޮންނާނީ]،' ހަލީލް ވިދާޅުވި އެވެ.
އޭނާ ވިދާޅުވީ ބިދޭސީން މުޒާހަރާއަށް ދިއުން ހުއްޓުވުމަށް ވަޒީފާދޭ ފަރާތްތަކަށް ވެސް އިލްތިމާސް ކުރާ ކަމަށާއި އެހެން ނޫން ނަމަ އެފަރާތްތަކަށް ދީފައިވާ ހުއްދަތައް ހިފަހައްޓާނެ ކަމަށެވެ.
ރޭ ހިންގި މާރާމާރީއެއްގައި ދެ ބިދޭސީއަކު ޒަހަމްކޮށްލާފައިވާ އިރު މިދިޔަ އާދިއްތަ ދުވަހުގެ ރޭ ވަނީ ބިދޭސީއަކަށް ހަމަލާދީ މަރާލާފަ އެވެ. އަދި ހޯމަ ދުވަހު ވެސް ވަނީ ޒަހަމްތަކަކާ އެކު މަރުވެފައި އޮތް ބިދޭސީއަކު ތޮއްޑޫން ފެނިފަ އެވެ.