26 Mar 2015, 10:13
ސްކޫލުތަކުގެ މެރިން ސައިންސް ކިޔަވާ ދަރިވަރުންނަށް އަމާޒުކޮށްގެން ފިޝަރީޒް މިނިސްޓްރީ އިން ބޭއްވި ތިން ވަނަ ފިޝް ކޭމްޕް ނިންމާލައިފި އެވެ.
ހަތަރު ދުވަހަށް ކުރިއަށް ދިޔަ އެ ފިޝް ކޭމްޕް އިއްޔެ ނިންމާފައި ވަނީ ކ. އަތޮޅު ކަނޑުއޮތްގިރީގައީ ބޭއްވި ހާއްސަ ރަސްމިއްޔާތެއްގަ އެވެ.
ކ. އަތޮޅު ހުރާގައި ކުރިއަށް ގެންދިޔަ އެ ފިޝް ކޭމްޕްގައި މާލޭގެ ފަސް ސްކޫލަކުން 24 ދަރިވަރުން ބައިވެރިވެފައިވެ އެވެ. އެ ކޭމްޕުގައި ބައިވެރިވެފައި ވަނީ ހިރިޔާ ސްކޫލް އާއި ޖަމާލުއްދީން ސްކޫލާއި ޣާޒީ ސްކޫލާއި އަހްމަދިއްޔާ އިންޓަނޭޝަނަލް ސްކޫލު އަދި މުހްޔިއްދީން ސްކޫލް އެވެ.
ޖުމްލަ 12 އަންހެން ދަރިވަރުންނާއި 12 ފިރިހެން ދަރިވަރުން ބައިވެރިވެފައިވާ އެ ކޭމްޕުގައި މެރިން ސައިންސާ ބެހޭ ގޮތުން ސްކޫލުތަކުގައި ދެވިފައި ނުވާ އެތައް އަމަލީ ކްލާސްތަކެއް ދެވިފައިވާ ކަމަށް މިނިސްޓްރީ އިން ބުންޏެވެ.
އެ ކޭމްޕުގައި އެންމެ ފުރަތަމަ ކްލާސް ދީފައި ވަނީ ކަނޑުމަތީގެ ސަލާމަތާ ބެހޭ ގޮތުންނެވެ. މިނިސްޓްރީ އިން ބުނީ ރާއްޖެއަކީ ކަނޑުން ވަށާލެވިގެންވާ ތަނަކަށް ވުމުން އެ މައުލޫމާތު ދިނުމުގެ ކްލާހަކީ މުހިއްމު ކްލާހެއް ކަމަށެވެ.
މިފްކޯގެ ފަރާތުން ޕްރޮޑަކްޓް ޓޭސްޓިން ޕްރޮގްރާމް އެއް އެ ކޭމްޕުގައި ކުރިއަށް ގެންގޮސްފައިވާ ކަމަށް ވެސް މިނިސްޓްރީ އިން ބުންޏެވެ. ދަރިވަރުންގެ ފަރާތުން ބޮޑު ތަރުުހީބެއް ލިބުން ކަމަށް ބުނި އެ ޕްރޮގްރާމްގައި ދަރިވަރުން ވަނީ މަސް ބޭނުން ކޮށްގެން އަމިއްލަ އަށް ބައެއް ކަހަލަ ޕްރޮޑަކްތް އުފައްދާފަ އެވެ.