04 Apr 2015, 10:46
ރ. އަލިފުށި ކައުންސިލްގެ ބައި އިލެކްޝަންގެ ވޯޓުލުން މިއަދު ހެނދުނު ފަށައިފި އެވެ.
މިއަދު ހެނދުނު 8:00 އިން ވޯޓުލާން ފެށިގެން ބައި އިލެކްޝަންގައި ވާދަކުރަނީ ސަރުކާރު ހިންގާ ޕީޕީއެމްގެ މެމްބަރަކާއި އިދިކޮޅު އެމްޑީޕީގެ މެމްބަރެކެވެ.
ޕީޕީއެމް ޓިކެޓުގައި އިންތިހާބުގައި ވާދަ ކުރައްވަނީ ރ. އަލިފުށި ކިޔުބާ، ކެންޑިޑޭޓް ނަންބަރު ދޭއް، އައިމިނަތު އަލީ އެވެ. އިދިކޮޅު އެމްޑީޕީގެ ފަރާތުން އިންތިހާބުގައި ވާދަކުރައްވަނީ ރ. އަލިފުށި މަލަކާ، ކެންޑިޑޭޓް ނަންބަރު އެކެއް، އަލީ ހަމީދު އެވެ.
އިންތިހާބުގައި ވޯޓުލުމަށް އަލިފުށީގައި ވަނީ ތިން ފޮއްޓެއް ބަހައްޓާފަ އެވެ. ފުރަތަމަ ފޮއްޓަށް ވޯޓުލުމުގެ ހައްގު ލިބިފައި ވަނީ 266 މީހުނަށެވެ. ދެވަނަ ފޮއްޓަށް ވޯޓުލުމުގެ ހައްގު 613 މީހުންނަށް ލިބިފައިވާ އިރު ތިންވަނަ ފޮއްޓަށް ވޯތުލުމުގެ ހައްގު ލިބިފައި ވަނީ 565 މީހުނަށެވެ. އަދި މާލޭގައި ބަހައްޓާފައިވާ ފޮއްޓަށް ވޯޓުލުމުގެ ހައްގު 357 މީހުންނަށް ލިބެއެވެ.
ޖުމްލަ 1801 މީހުންނަށް ވޯޓު ލުމުގެ ހައްގު ލިބިގެންވާ އެ އިންތިހާބާ ގުޅޭގޮތުން އަލިފުށި ކައުންސިލްގެ ރައީސް އަހުމަދު މުހައްމަދު ވިދާޅުވީ މިއަދު ހެނދުނު 8:00 ގައި ބައި އިލެކްޝަންގެ ވޯޓުލުން ފަށާފައިވާ އިރު، ވޯޓުލުން ކުރިއަށްދަނީ ވަރަށް ސުލްހަވެރިކަމާ އަމާންކަމާ އެކު ކަމަށެވެ.
އަލިފުށީ ކައުންސިލްގެ ގޮނޑި ހުސްވީ ކައުންސިލް މެންބަރު އަބްދުލް ލަތީފު އަބްދުލް ރަހުމާން ކައުންސިލް މެންބަރުކަމުގެ މަގާމުން އިސްތިއުފާ ދެއްވުމުންނެވެ. އޭނާ އަކީ ނިމިދިޔަ ދައުރުގައި ކައުންސިލްގެ ރައީސްކަން ކުރެއްވި، ޕީޕީއެމްގެ މެންބަރެކެވެ.