13 Apr 2015, 10:16
ގާނޫނު އަސާސީއާއި ގާނޫނުތަކާ ޚިލާފުކަމެއް ކުރުމަށް ގޮވާލައި ހުށަހަޅާ ޕެޓިޝަނަކަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އަމަލުނުކުރައްވާނެ ކަމަށް ރައީސް އޮފީހުގެ ތަރުޖަމާން އިބްރާހީމް މުއާޒު އަލީ ވިދާޅުވެއްޖެއެވެ.
މުއާޒު މިއަދު 'ސަން'އަށް ވިދާޅުވީ، ގާނޫނު އަސާސީ އާއި ގާނޫނުތަކާ ޚިލާފު ކަމެއް ކުރުމަށް ހުށަހަޅާ ޕެޓިޝަނަކަށް ރައީސް ޔާމީން އަމަލުނުކުރައްވާނެ ކަމަށާއި ހަމައެހެންމެ ގާނޫނާ ޚިލާފު މަޝްވަރާއެއް ކުރުމަށް އެމަނިކުފާނު އިށީންނަވާނެ ގޮނޑިއެއް ވެސް ނުހުންނާނެ ކަމަށެވެ.
"ދިވެހި ޖުމްހޫރިއްޔާގެ ގާނޫނު އަސާސީ އާއި ދިވެހިރާއްޖޭގެ ގާނޫނުތަކާ ޚިލާފު ކަމެއް ކުރުމަށް ގޮވާލައި ހުށަހަޅާ ޕެޓިޝަނަކަށް ރައީސް ޔާމީން އަމަލެއް ނުކުރައްވާނެ. އަދި ގާނޫނުތަކާ ޚިލާފު މަޝްވަރާ ކުރެއްވުމަށް ރައީސް ޔާމީން އިށީދެވަޑައިގަންނަވާނެ ގޮނޑިއެއް ނުހުންނާނެ. އޮށޯވެ އޮވެގެން ވިޔަސް ކޮޅަށް ހުރެގެން ވިޔަސް އަދި އެނޫން ގޮތަކަށް ވިޔަސް އެމަނިކުފާނު ގާނޫނާ ޚިލާފު މަޝްވަރާއެއްގައި ބައިވެރިވެވަޑައެއް ނުގަންނަވާނެ،" މުއާޒު ވިދާޅުވި އެވެ.
ރާއްޖޭގެ ވަލިއްޔުލް އަމުރުގެ ހައިސިއްޔަތުން ރައީސް ޔާމީނަކީ ރާއްޖޭގެ ގާނޫނުތައް ނަގަހައްޓަން ޖެހޭ އެންމެ އިސް ފަރާތް ކަމަށާއި ގާނޫނު އަސާސީ އާއި ގާނޫނުތަކާ ޚިލާފު އެއްވެސް ކަމަކަށް އެމަނިކުފާނު ޖާގަ ނުދެއްވާނެ ކަމަށް ވެސް މުއާޒު ވިދާޅުވި އެވެ.
މުއާޒު މިހެން ވިދާޅުވެފައިވާއިރު، ޓެރަރިޒަމްގެ ކުށުގައި 13 އަހަރަށް ޖަލަށްލާފައިވާ ކުރީގެ ރައީސް މުހައްމަދު ނަޝީދު ދޫކޮށްލުމަށް ގޮވާލައި ރައީސް ޔާމީނަށް ހުށަހެޅުމަށްޓަކައި އެމްޑީޕީން އަންނަނީ ޕެޓިޝަނެއްގައި ސޮއިކުރަމުންނެވެ. އަދި ރައީސް ނަޝީދާއި ޖިނާއީ ކުށްތައް ސާބިތުވެ ޖަލަށްލާފައިވާ ސިޔާސީ ބޭފުޅުން މިނިވަންކުރުމަށް ރައީސް ޔާމީނާ ބައްދަލުކޮށް މަޝްވަރާކުރަން ބޭނުންވާ ކަމަށް އިދިކޮޅު ސިޔާސީ ޕާޓީތަކުން އަންނަނީ ބުނަމުންނެވެ.