14 Apr 2015, 21:18
ކަލާފާނު ސްކޫލް ޕްރިންސިޕަލް ނާޒްލީން ވާފިރު، އަމީނިއްޔާ ސްކޫލުގެ ޕްރިންސިޕަލްގެ މަގާމަށް ބަދަލުކޮށްފި އެވެ.
އެޑިއުކޭޝަން މިނިސްޓްރީން ވަނީ ނާޒްލީން އެ މަގާމަށް ބަދަލު ކުރެއްވިކަން ކުރެއްވިކަން މިއަދު އަންގާފަ އެވެ.
ނާޒްލީންއަކީ 2008 އަހަރުން ފެށިގެން ކަލާފާނު ސްކޫލުގެ ޕްރިންސިޕަލެވެ. އޭނާ ވަނީ 1989 ވަނަ އަހަރުން ފެށިގެން އެ ސްކޫލުގެ އެކި މަގާމުތައް ފުރުއްވާފަ އެވެ.
އަމީނިއްޔާ ސްކޫލުގެ ޕްރިންސިޕަންގެ މަގާމަށް ނާޒްލީން ބަދަލު ކުރީ އެ މަގާމުގައި ހުންނެވި އާތިޔާ ނަސީރު އިއްޔެ އެ މަގާމުން ވަކިކުރުމުންނެވެ.
ސިވިލް ސާވިސް ކޮމިޝަނުން އާތިޔާއަށް ފޮނުވި "ވަޒީފާއިން ވަކިކުރި ޗިޓު" ގައިވާގޮތުން އޭނާ ވަޒީފާއިން ވަކިކޮށްފައި ވަނީ، އިތުރަށް އޭނާ އަމީނިއްޔާ ސްކޫލްގައި ބަހައްޓައިފިނަމަ އިތުރު ގެއްލުންތަކެއް އެ ސްކޫލަށް ލިބިދާނެ ކަމަށް އެޑިއުކޭޝަން މިނިސްޓްރީއަށް ފެންނާތީ އެވެ.
އާތިޔާ އަކީ އިހަވަންދޫ ދާއިރާގެ ކުރީގެ އެމްޑީޕީ މެމްބަރު އަހުމަދު އަބްދުﷲ ގެ އަނބިކަނބަލުންނެވެ.
އޭނާ ވަޒީފާއިން ވަކިކޮށްފައި ވަނީ ސިވިލް ސާވިސް ގަވާއިދުގެ 273 ވަނަ މާއްދާގެ (ށ) އަށް ރިއާޔަތްކޮށް އެ ގަވާއިދުގެ 47 ވަނަ މާއްދާގެ (ށ) ގެ ތިން ވަނަ ނަންބަރުގެ ދަށުންނެވެ.
އިއްޔެ މަގާމުން ވަކިކުރި އާތިޔާ އެ ސްކޫލްގެ ޕްރިންސިޕަލްކަމާ ހަވާލުވެވަޑައިގަތީ 2011 ވަނަ އަހަރު އެވެ.