15 Apr 2015, 10:20
އދ. މަލިޖިސް (އެޕްރީލް 15): ޔަމަންގެ ވެރިކަމަށް އަތްގަދަ ކުރުމަށް މަސައްކަތްކުރާ ހޫޘީ ޖަމާއަތަށް ހަތިޔާރު ފޯރުކޮށްދިނުން މަނާކުރާ ގަރާރެއް އދ.ގެ ސަލާމަތީ މަޖިލީހުން ފާސްކޮށްފިއެވެ.
ގަލްފުގެ އަރަބި ގައުމުތައް ގުޅިގެން އދ.ގެ ސަލާމަތީ މަޖިލީހަށް ހުށަހެޅި މިގަރާރު ފާސްކުރުމަށް ރަޝިޔާ އިން ވޯޓު ދީފައި ނުވި ނަމަވެސް މިގަރާރާ ދެކޮޅަށް ރަޝިޔާ ވީޓޯގެ ބޭނުން ކޮށްފައެއް ނުވެ އެވެ.
މިގަރާރު ގޮވާލަނީ ހޫޘީ ހަނގުރާމަވެރިންނާއި ޔަމަންގެ ކުރީގެ ރައީސް އަލީ އަބްދުﷲ ސާލިޙް އަށް ތާއީދުކުރާ ހަނގުރާމަވެރިންނަށް ހަތިޔާރު ފޯރުކޮށްދިނުން މަނާކުރުމަށެވެ. މީގެ އިތުރުން ޔަމަންގެ މައްސަލަ އިތުރަށް ގޯސްވާފަދަ އެއްވެސް އަމަލެއް ނުހިންގުމަށާއި އަދި ވާހަކަ ދައްކައިގެން މަައްސަލަ ހައްލުކުރުމަށް ޔަމަންގެ ވާދަވެރި ހުރިހާ ފަރާތްތަކަކަށް މިގަރާރު ގޮވާލަ އެވެ. ނަމަވެސް މިގަރާރު ފާސްކޮށްފައި ވަނީ މިގަރާރާ ޚިލާފުވާ ފަރާތްތަކާ ދެކޮޅަށް އޮޓަމެޓިކުން ދަތިކުރުމުގެ ފިޔަވަޅުތައް އަޅާގޮތަށް އދ. ގެ ޗެޕްޓަރުގެ 7 ގެ ދަށަކުންނޫނެވެ.
ހޫޘީ ޖަމާއަތުންވަނީ މިގަރާރުކުށްވެރިކޮށްފައެވެ. ހޫޘީ ޖަމާއަތުގެ ގަވަނިން ކޮމިޓީން ނެރުނު ބަޔާނެއްގައި އެޖަމާއަތަށް ތާއީދުކުރާ ފަރާތްތަކަށް ގޮވާލާފައިވަނީ މިކަމާދެކޮޅަށް ވަރުގަދަ އިޙްތިޖާޖެއް ކުރުމަށް އަންނަ ބުރާސްފަތި ދުވަހު ޔަމަންގެ މަގުތަކަށް ނުކުތުމަށެވެ.
ޔަމަންގެ ރަށްތަކުގެ ތެރެއިން ހޫޘީންގެ އަތްދަށުގައި ވަނީ މަދު ރަށެކެވެ. ސައޫދީންގެ ވައިގެ ޙަމަލާތަކާ ގުޅިގެން ހޫޘީންވަނީ ވެރިރަށް ސަންޢާގެ ބޮޑުބަޔަކުން ފައިބާފަ އެވެ. ހޫޘީންގެ ބަޔާން ބުނި ގޮތުގައި މިގަރާރަކީ ޔަމަންގެ ދާޚިލީ ހަނގުރާމައިގެ އެއްފަރާތް ކަމަށްވާ މިހާރުގެ ރައީސް އަބްދު ރައްބު މަންސޫރު ހާދީގެ ކޮޅަށް ޖެހިފައިވާ ގަރާރެކެވެ. އދ.ގެ ގަރާރަށް ގަލްފުގެ އަރަބި ގައުމުތަކާއި އެގައުމުތަކުން އުފައްދާފައިވާ ސަރަހައްދީ ޖަމްއިއްޔާ ގަލްފު ކޯޕަރޭޝަން ކައުންސިލުންވަނީ މަރްހަބާ ކިޔާފައެވެ.
ސައޫދީ އަރަބިޔާ އިސްކޮށް އޮވެގެން ޔަމަނަށް ދެމުން ގެންދާ ވައިގެ ޙަލާތަކުގެ ބޭނުމަކީ ޔަމަންގެ ހޫޘީ ޖަމާއަތާއި އެގައުމުގެ ކުރީގެ ރައީސް އަލީ އަބްދުﷲ ސާލިޙްގެ ބާރުތައް ބަލިކޮށް ޔަމަންގެ ވެރިކަމުން އެއްފަރާތް ކޮށްފައިވާ ރައީސް އަބްދު ރައްބު މަންސޫރު ހާދީއަށް ވެރިކަން ހޯދައި ދިނުން ކަމަށް ސައޫދީ ސަރުކާރުން ބުނެ އެވެ. މިޙަމަލާތަކުގައި ޔަމަންގެ އާންމުންގެ 600 އަށްވުރެ ގިނަ މީހުން މަރުވެފައިވާ ކަމަށާއި އެތައް ހާސްބަޔަކު ޙާލުގައި ޖެހިފައިވާ ކަމަށް އދ. ން ބުނެ އެވެ. (ނޫސްއެޖެންސީތައް)