20 Apr 2015, 12:25
އިނގިރޭސި އެފްއޭކަޕް ސެމީ ފައިނަލް މެޗްގައި ލިވާޕޫލްގެ މައްޗަށް 2-1 ގެނަތީޖާއަކުން ކާމިޔާބު ހޯދައި ފައިނަލްގައި އާސެނަލްއާ ދެކޮޅަށް އެސްޓަންވިލާ ކުޅޭ ގޮތަށް ހަމަޖެހިއްޖެ އެވެ.
ވެމްބަލީ ސްޓޭޑިއަމްގައި ކުޅުނު އެ މެޗުގައި ފުރަތަމަ ލަނޑު ޖަހައި ލީޑް ނެގީ ލިވާޕޫލުންނެވެ. މެޗްގެ 30 ވަނަ މިނެޓްގައި ލިވަޕޫލްގެ ލަނޑު ކާމިޔާބުކޮށް ދިނީ ބުރަޒިލްގެ މިޑްފީލްޑާ ފިލިއްޕޭ ކައުޓީނިއޯ އެވެ.
ލިވަޕޫލް ލަނޑު ކާމިޔާބު ކުރިތާ ހަ މިނެޓްފަހުން މެޗްގެ 36 ވަނަ މިނެޓްގައި ބެލިޖިއަމްގެ ސްޓައިކާ ކްރިސްޓިއަން ބެންޓޭކް ވަނީ އެސްޓަންވިލާއަށް ނަތީޖާ ހަމަހަމަ ކޮށްދީފަ އެވެ.
އެސްޓަން ވިލާ މެޗުން މޮޅުވި ލަނޑު ދެ ވަނަ ހާފް ނުވަ ވަނަ މިނެޓްގައި ކާމިޔާބުކޮށްދިނީ ފަބިއަން ޑެފްއެވެ.
އެފްއޭކަޕް ސެމީ ފައިނަލް ދެ ވަނަ މެޗްގައި ލިވާޕީލްއާ އެސްޓަން ވިލާ ބައްދަލު ކުރި މެޗުގެ ތެރެއިން --- ފޮޓޯ/ އޭޕީ
އެ މުބާރާތުގެ ފައިނަލަށް ނުދެވުމުން ލިވާޕޫލްގެ ކޯޗް ބްރެޑެން ރޮޖާސް އަކީ 1950 ވަނަ އަހަރުގެ ފަހުން ޖެހިޖެހިގެން ތިން ސީޒަންގައި ލިވާޕޫލަށް ތައްޓެއް ހޯދައި ނުދެވުނު ހަމައެކަނި ކޯޗެވެ.
ލިވަޕީލްގެ ކޯޗް ބްރެންޑެން ރޮޖާސް. މެޗުން ބަލިވުމުން އޭނާއަށް ވަނީ ބޮޑެތި ފާޑު ކިޔުންތަކެއް އަމާޒު ވެފައި --- ފޮޓޯ/އޭޕީ
އެ މެޗުން ލިވަޕޫލް ބަލިވުމުން އެންމެ ބޮޑު ހިތްދަތި ކަމެއްލިބުނު އެކަކީ ލިވަޕޫލްގެ ކެޕްޓަން ސްޓީވަން ޖެރާޑެވެ. އެއީ އޭނާ ލިވާޕޫލްގައި ހޭދަ ކުރާނެ އެންމެ ފަހު ސީޒަނެވެ. އެ މުބާރާތް، އޭނާ ލިވާޕީލަށް ހޯދައިދޭ ފެއާވެލް ކާމިޔާބަކަށް ހެދުމުގެ އަމާޒަކަށް ހަދައިގެން ހުރި ޖެރާޑަށް ވަނީ އެ މެޗުން ބަލިވުން ފާޑު ކިޔުންތަކެއް އަމާޒު ވެފައެވެ.
ލިވަޕޫލާ އެސްޓަން ވިލާ ބައްދަލު ކުރި މެޗްގައި، މެޗަށް ފަހު ލިވަޕޫލްގެ ކެޕްޓަން ސްޓވަން ޖެރަޑް ދަނޑު މަތީގައިމަޑުކޮށްލައިގެން --- ފޮޓޯ/ އޭޕީ
މީއީ އެފްއޭކަޕް ފައިނަލަށް 15 އަހަރު ތެރޭގައި އެސްޓަން ވިލާ ދަތުރުކުރި ފުރަތަމަ ފަހަރެވެ. އެންމެ ފަހުން އެ ޓީމް އެ މުބާރާތުގެ ފައިނަލް ކުޅެފައި ވަނީ 2000 ވަނަ އަހަރު އެވެ. އެ އަހަރުގެ މުބާރާތުގެ ފައިނަލްގައި ޗެލްސީއާ ވާދަކޮށް އެ ޓީމް ބަލިވީ 1-0 ގެ ނަތީޖާއަކުންނެވެ.
މެއި މަހު 30 ވަނަ ދުވަހު ކުޅުމަށް ހަމަޖެހިފައިވާ ފައިނަލް މެޗްގައި އެސްޓަން ވިލާއާ ވާދަކުރާ އާސެނަލް ފައިނަލަށް ދަތުރުކުރީ ސެމީ ފައިނަލް ފުރަތަމަ މެޗްގައި 2-1 ގެ ނަތީޖާއަކުން ރޭޑިން ބަލި ކުރުމަށްފަހުގަ އެވެ.
އެންމެ ފަހުން އެ މުބާރާތް ކާމިޔާބުކޮށްފައިވާ އާސެނަލް ވަނީ މިމުބާރާތް 11 ފަހަރު ކާމިޔާބުކޮށް އެފްއޭކަޕް އެންމެ ކާމިޔާބު ޓީމްގެ ޝަރަފު ހޯދާފަ އެވެ. މެންޗެސްޓާ ޔުނެއިޓަޑްވެސް ވަނީ ހަމަ އެ އަދަދަށް އެ މުބާރާތް ކާމިޔާބުކޮށްފަ އެވެ.