22 Apr 2015, 15:25
ދުނިޔޭގައި ބާއްވަމުން އަންނަ އެންމެ ބޮޑު ސީފުޑް އެކްސްޕޯ ބެލްޖިއަމްގެ ބްރަސަލްސްގައި އިއްޔެ ފަށައިފި އެވެ.
ރާއްޖެ ހިމެނޭގޮތަށް އެ ފެއާގައި 75 ގައުމަކުން ބައިވެރިވެފައިވާއިރު މިއަހަރުގެ ފެއާގައި އެކި ގައުމުތަކުން 1700 އަށްވުރެ ގިނަ ކުންފުނިތައް ވަނީ ބައިވެރިވެފަ އެވެ.
މިއަހަރުގެ ފެއާގައި ދިވެހިރާއްޖޭން ބައިވެރިވީ ފިޝަރީޒް މިނިސްޓްރީގެ ފިޝަރީޒް ޕްރޮމޯޝަން ބޯޑާއި މަސްވެރިކަމުގެ ސިނާއަތުގައި ހަރަކާތްތެރިވާ ސަރުކާރާއި އަމިއްލަ ކުންފުނިތައް ގުޅިގެންނެވެ. އެގޮތުން މިފްކޯއާއި ހޮރައިޒަން ފިޝަރީޒް އާއި އެންސިސް ފިޝަރީޒް އާއި ޔޫރޯ ގްލޯބަލް ފަދަ ކުންފުނިތައް ހިމެނެ އެވެ.
އޭގެ އިތުރުން ރާއްޖޭގެ އަމިއްލަ ބައެއް ކުންފުނިތަކުން ވަނީ އެ ފެއާގައި ވަކިން ބައިވެރިވެފަ އެވެ. އޭގެ ތެރޭގައި ސީސްޕަޔާ ޕްރައިވެޓް ލިމިޓެޑާއި މޯލްޑިވްސް މެރިން ޕްރޮޑަކްޓްސް އާއި މޯލްޑިވްސް ކޮލިޓީ ސީފުޑް ޕްރައިވެޓް ލިމިޓެޑް ހިމެނެ އެވެ.
ސީފުޑް އެކްސްޕޯގެ ތެރެއިން: އެ އެކްސްޕޯގައި ޖުމްލަ 1700 ކުންފުންޏެއް ވަނީ ބައިވެރިވެފައި
ފިޝަރީޒް މިނިސްޓްރީން ބުނީ ދިވެހިރާއްޖޭން ޔޫރަޕިއަން ޔޫނިއަން އަށް ކަނޑައަޅުއްވާފައި ހުންނަވާ ސަފީރު ރާއްޖޭގެ ސްޓޯލްތަކަށް ޒިޔާރަތްކުރެއްވުމަށްފަހު، ކުރިމަގުގައި ޔޫރަޕްގެ އިއްތިހާދުން ރާއްޖޭގެ މަސްވެރިކަމުގެ އުފެއްދުންތައް އެކްސްޕޯޓް ކުރުމާއި ރާއްޖޭގެ މަހުގެ އުފެއްދުންތައް ޔޫރަޕްގައި އިޝްތިހާރުކޮށް ޕްރޮމޯޓްކުރުމަށް ބްރަސަލްސްގައި ހުރި އެމްބަސީން ވަރަށް ގާތްކޮށް މަސައްކަތް ކުރައްވާނޭކަމުގެ ޔަގީންކަން އަރުވާފައިވާ ކަމަށެވެ.
އެފަދަ އެކްސްޕޯތަކުގައި ބައިވެރިވެ، ރާއްޖޭގެ އުފެއްދުންތައް އިޝްތިހާރުކޮށް މާކެޓްކުރުމުގެ ފުރުސަތު ތަނަވަސްވެގެން ދަނީ، ދިވެހި އުފެއްދުންތަކަށް އެވަގުތު ދުނިޔޭގެ ބާޒާރުގައި ހުރި އަގު ލިއްބައިދިނުމަށް ސަރުކާރުން ކުރަމުން އަންނަ މަސައްކަތުގެ ދަށުން ކަމަށް އެ މިނިސްޓްރީން ބުންޏެވެ.
ސީފުޑް ފެއާ ކުރިއަށްދާނީ މިމަހު 23 ވަނަ ދުވަހުގެ ނިޔަލަށެވެ.