22 Apr 2015, 20:06
ހޭންޑްބޯލް މޯލްޑިވްސްއަށް ކުޅިވަރުގެ ގައުމީ އެސޯސިއޭޝަނެއްގެ ހައިސިއްޔަތު ދިނުމަށް ކުޅިވަރުގެ ޤައުމީ ކައުންސިލުން މިއަދު ނިންމައިފިއެވެ.
މިނިސްޓްރީ އޮފް ޔޫތު އެންޑް ސްޕޯޓްސްގެ އިސް އޮފިޝަލެއް ސަންއަށް ވިދާޅުވީ، ހޭންޑްބޯލް މޯލްޑިވްސްއަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ދިނުމަށް ކުޅިވަރުގެ ޤައުމީ ކައުންސިލުން ނިންމާފައިވަނީ އެކަމުގައި ފުރިހަމަ ކުރަންޖެހޭ ކަންކަން ފުރިހަމަ ކުރުމަށްފަހު އެ އެސޯސިއޭޝަނުން ހުށަހެޅުމުންނެވެ.
ހޭންޑްބޯލް މޯލްޑިވްސްއަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ލިބުމުން، ކުޅިވަރާބެހޭ ވަޒީރު މުޙައްމަދު މަލީހު ޖަމާލު ވަނީ، ހޭންޑްބޯލް ކުޅުންތެރީންނާއި ކްލަބްތަކާއި އެސޯސިއޭޝަނަަށް މަރުހަބާ ވިދާޅުވެފައެވެ.
Sports Council has decided to grant National Association status to Handball Maldives. Congra. Exco, Clubs & players.
— Mohamed Maleeh Jamal (@maleehjamal)April 22, 2015
ކުރިން މުބާރާތްތައް ބޭއްވި ކަމުގައިވިޔަސް ހޭންޑް ބޯލް މޯލްޑިވްސްއަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ލިބިފައެއް ނުވެއެވެ.
ހޭންޑްބޯލް މޯލްޑިވްސްއިން މާލޭގެ ސްކޫލެއްގައި ހިންގި ޕްރޮގުރާމެއްގެ ތެރެއިން --- ފޮޓޯ/ ހޭންޑްބޯލް މޯލްޑިވްސްގެ ފޭސްބުކް ޕޭޖް
ހޭންޑްބޯލް މޯލްޑިވްސްއަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ދޭން ނިންމުމާގުޅިގެން އެ އެސޯސިއޭޝަންގެ ޖެނަރަލް ސެކެޓްރީ އަޙްމަދު މުޖުތަބާ ސަންއަށް ވިދާޅުވީ، ހޭންޑްބޯލް މޯލްޑިވްސްއަށް ރަސްމީ ހައިސިއްޔަތު ދިނުމަށް ނިންމުމުން އެކަމާ ވަރަށް ބޮޑަށް ހިތްހަމަޖެހިވަޑައިގަންނަވާ ކަމަށާއި މިކަމަކީ ހޭންޑްބޯލް ކުޅޭ ކުޅުންތެރިންނަށާއި ކުލަބްތަކަށް ލިބިގެން ދިޔަ ވަރަށް ބޮޑު ކުރިއެރުމެއް ކަމަށެވެ.
މުޖުތަބާ ވިދާޅުވީ، މިއަހަރު ހޭންޑްބޯލް އެސޯސިއޭޝަނުން ގިނަ މުބާރާތްތަކެއް ރާވާފައިވާ ކަމަށާއި އެގޮތުން ޤައުމީ މުބާރާތުގެ އިތުރުން އެކި ޢުމުރު ފުރާތަކަށް ޚާއްސަކޮށްގެން ބާއްވާ މުބާރާޔްތަކާއި އިންޓަރ ކޮލެޖް މުބާރާތްތަކެއްވެސް ބޭއްވުމަށް ތާވަލް ކޮށްފައިވާ ކަމަށެވެ.
ހޭންޑްބޯލް މޯލްޑިވްސްއިން ކުރިއަށް ގެންދިޔަ މުބާރާތެއްގެ ތެރެއިން --- ފޮޓޯ/ ހޭންޑްބޯލް މޯލްޑިވްސްގެ ފޭސްބުކް ޕޭޖް
މުޖުތަބާ އިތުރަށް ވިދާޅުވީ، ބަނގުލަދޭޝްގައި ބޭއްވުމަށް ހަމަޖެހިފައިވާ ބައިނަލްއަޤުވާމީ ހޭންޑްބޯލް މުބާރާތެއްގައިވެސް ބައިވެރި ވުމަށް ތައްޔާރު ވަމުންދާ ކަމަށެވެ. ނަމަވެސް މިދުވަސްވަރު ބަނގުލަދޭޝްގެ ސިޔާސީ މަސްރަހަށް އައިސްފައިވާ ބަދަލާ ގުޅިގެން އެމުބާރާތް އޮންނާނެ ވަކި ތާރީޚެއް އަދި އެނގިފައި ނުވާކަމަށެވެ.
ހޭންޑްބޯލް މޯލްޑިވްސްއިން ހޭންޑްބޯލް ރެފްރީން ތަމްރީން ކުރުމަށް ކުރިއަށް ގެންދިޔަ --- ފޮޓޯ/ ހޭންޑްބޯލް މޯލްޑިވްސްގެ ފޭސްބުކް ޕޭޖް
ހޭންޑްބޯލް މޯލްޑިވްސްއަށް ގައުމީ ކުޅިވަރު އެސޯސިއޭޝަނެއްގެ ހައިސިއްޔަތު ލިބުމުން ހޭންޑްބޯލް ޤައުމީ ޓީމުގެ އެކި ޢުމުރު ފުރާތަކުގެ ކުޅުންތެރިންނަށް މުސާރަ ލިބިގެންދާނެއެވެ.