23 Apr 2015, 09:51
އަންކަރާ (އެޕްރީލް 23) : އިސްލާމިކް ސްޓޭޓް ނުވަތަ އައިއެސް ޖަމާއަތަކީ މުޅި އިސްލާމީ އުންމަތުގެ ލޭނާރުތައް ބުރިކޮށް މުސްލިމް ޒުވާނުން ހަލާކުކުރަމުން ގެންދާ ވައިރަސްއެއް ކަމަށް ތުރުކީގެ ރައީސް ރަޖަބް ތައްޔިބު އުރުދުޣާން ސިފަކުރައްވައިފި އެވެ.
ތުރުކީއަށް ވަޑައިގެން އުޅުއްވާ އިރާގުގެ ރައީސް ފުއާދު މަޢްސޫމް އާ އަންކަރާގައި ބައްދަލުކުރެއްވުމަށް ފަހު ދެ ބޭފުޅުން އެކުގައި ބޭއްވި ގުޅިފައިވާ ނޫސްކޮންފަރެންސްގައި އުރުދުޣާން ވިދާޅުވީ އައިއެސް ޖަމާއަތަކީ އިސްލާމީ އުންމަތަށް މިވަގުތު ކުރިމަތިވެފައިވާ އެންމެ ބޮޑު ނުރައްކާ ކަމަށާ އެޖަމާއަތުން ގެންގުޅޭ ބަދަލުހިފުމުގެ ހައްދުފަހަނަޅާފައިވާ ފިކުރު ނައްތާލައި އެފިކުރުގައި ޖެހިފައިވާ މުސްލިމް ޒުވާނުން އިސްލާހުކޮށް ރިހެބިލިޓޭޓް ކުރުމަކީ އިސްލާމީ ގައުމުތަކުގެ ސަރުކާރުތަކާއި އިސްލާމީ ޖަމްއިއްޔާ ޖަމާއަތްތަކާ އަދި ވަކިވަކި ދަންނަބޭކަލުން ވެސް ކުރަންޖެހިފައިވާ ކަމެއްކަމުގަ އެވެ.
މިއީ، ބަދަލުހިފުމުގެ ރޫޙެއްގައި ހަރަކާތްތެރިވަމުންދާ އައިއެސް ޖަމާއަތާ ދެކޮޅަށް ތުރުކީގެ އިސްލާމީ ފިކުރުގެ ރައީސް ރަޖަބް ތައްޔިބު އުރުދުޣާން މިހާތަނަށް ދެއްވި އެންމެ ވަރުގަދަ ބަޔާނެވެ. މިނޫސްކޮންފަރެންސްގައި ވާހަކަ ދައްކަވަމުން އިރާގުގެ ރައީސް ޑރ. ފުއާދު މަޢްސޫމް ވިދާޅުވީ އައިއެސްއިން އެޖަމާއަތުގެ ނުބައި މަގްސަދްތައް ޙާސިލް ކުރުމަށްޓަކައި އިސްލާމީ އުންމަތުގެ ޒުވާނުންގެ ސިކުނޑިތައް ހަލާކުކޮށް އެކުދިން ވާވައްދައި ޖިހާދުގެ ނަމަށް ހުތުރުއަރުވައި ޖިހާދުގެ މަގްސަދާއި އޭގެ ހަގީގަތް އޮޅުވާލަމުން ގެންދާކަމުގަ އެވެ. ޑރ. ފުއާދު މަޢްސޫމަކީ މިސްރުގެ އަލްއަޒްހަރު ޔުނިވަސިޓީން އިސްލާމީ ތައްލީމް ޙާސިލް ކުރައްވައިގެން ހުންނެވި މަތީފެންވަރުގެ ދީނީ އިލްމުވެރިއެކެވެ.
އައިއެސް ޖަމާއަތުގެ ނުރައްކާ މުޅި އިސްލާމީ އުންމަތަށް ކުރިމަތިވެފައިވާ އިރު އެޖަމާއަތުގެ އަނިޔާވެރިކަން އެންމެ ބޮޑަށް ތަހައްމަލް ކުރަމުން ގެންދަނީ އިރާގުގެ ރައްޔިތުން ކަމަށްވެސް އިރާގުގެ ރައީސް ވިދާޅުވި އެވެ. (ރޮއިޓާސް)