23 Apr 2015, 20:26
ޗައިނާ އިން މާސިޑީޒް ބެންޒް ކުންފުނި 57 މިލިއަން ޑޮލަރުން ޖޫރިމަނާކޮށްފިއެވެ. މި ޖޫރިމަނާކޮށްފައި ވަނީ ނަހަމަ ގޮތުގައި ކާރުގެ އަގު ކަނޑައަޅާތީ ކަމަށް ޗައިނާ އިން ވަނީ ބުނެފައެވެ.
ކާރު އުފައްދާ ކުންފުނިތަކުގެ މިފަދަ މައްސަލަތައް ޗައިނާ ސަރުކާރުން ބަލަމުންދާތީ މި ސިނާއަތުގައި ހަރަކާތްތެރިވާ ފަރާތްތަކުން ދަނީ މިއީ އިންސާފުން ބޭރުން ކުރެވޭ ކަމެއް ކަމަށް ބުނެ ޗައިނާއަށް ފާޑުކިޔަމުންނެވެ.
ޗައިނާއިން ވަނީ ޖަރުމަނުގެ ބޮޑު ކުންފުންޏެއް ކަމަށްވާ ޑައިލާ އާގޭ ވެސް ޖޫރިމަނާކޮށްފައެވެ. ޗައިނާގެ ޖިއާންސޫ ޕްރޮވިންސްގެ އަގުތައް ބަލަހައްޓާ ބިއުރޯއިން ވަނީ ޖަރުމަނު ކުންފުނިން މުދަލުގެ އަގު ކަނޑައަޅާ އުސޫލުގެ ސަބަބުން ބާޒާރުގެ ވާދަވެރިކަމަށް ނޭދެވޭ އަސަރުކުރާ ކަމަށް ބުނެފައެވެ. އެ ކުންފުނިން މުދާ ގަނެގެން ރީޓެއިލްކޮށް ވިއްކާ ފަރާތްތަކުން، އެންމެ އަގުހެޔޮވެގެން ވިއްކޭނީ ވަކި އަގެއްގައި ކަމަށް އެ ކުންފުނިން އޮންނަނީ އަންގާފައެވެ.
މުދާ ވިއްކޭނެ އެންމެ ހެޔޮ އަގު ނުވަތަ މެކްސިމަމް ރިޓެއިލް ޕްރައިސް ކަނޑައެޅުމަކީ ދުނިޔޭގެ ގިނަ ގައުމުތަކުން ކުރާ ކަމެއް ނަމަވެސް ޗައިނާއިން ބުނަނީ މިއީ ވާދަވެރިކަމަށް އެޅޭ ހުރަހެއް ކަމަށެވެ.
ޗައިނާއިން ހުޅުވިފައިވާ ވިޔަފާރިއަށް ހުރަސްއަޅާ ކަމަށް ބުނެ އެމެރިކާގެ ވިޔަފާރިވެރިންގެ ޖަމިއްޔާއިން ވަނީ ޗައިނާއަށް ފާޑުކިޔާފައެވެ. އެހެންނަމަވެސް ޗައިނާއިން މިކަމަށް އެއްބަހެއް ނުވެއެވެ.