30 Apr 2015, 12:20
ހަވަނަ ފަހަރަށް ވައްކަމުގެ ކުށް މީހެއްގެ މައްޗަށް ސާބިތުވެ، އެމީހާ އަށް އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފި އެވެ.
މީހުން ދިރިއުޅޭތަނަކުން ވައްކަންކުރުމުގެ ކުށްސާބިތުވުމާ ގުޅިގެން ކްރިމިނަލް ކޯޓުން އިއްޔެ ހުކުމް ކޮށްފައިވަނީ ޅ. ކުރެންދޫ، ބޮޑުގަސްދޮށުގެ، އަބްދުﷲ ޝަރީފް 37، ގެ މައްޗަށެވެ.
ދައުލަތުން އޭނާގެ މައްޗަށް ދައުވާ އުފުލާފައިވަނީ 2012 މާޗު ހަތަރުވަނަ ދުވަހު މ. ދުށިމް ގޭގެ ސިޓިން ރޫމްގައި ހުރި އިސްތިރިކުރާ މޭޒު މަތީގައި ބަހައްޓާފައި ހުރި އަތްދަބަސް ވަގަށް ނަގާފައިވާ މައްސަލައާ ގުޅިގެންނެނެވެ.
މި ދަޢުވާ ބެލުމަށްފަހު ދައުލަތުން ކޮށްފައިވާ ހުކުމުގައި ބުނަނީ، އެ ވައްކަންކުރީ އަބްދުﷲ ޝަރީފްކަން ދަޢުލަތުން ހުށަހެޅި ހެކިންގެ ހެކިބަހުން ޝަރީއަތަށް ސާބިތުވާ ކަމަށެވެ.
އަދި މީހުން ދިރިއުޅޭ ތަނަކުން ވައްކަންކުރުމުގެ ކުށް އަބްދުﷲ ޝަރީފްގެ މައްޗަށް ސާބިތުވާ ކަމަށް ކަނޑައަޅައި، މިއީ އޭނާގެ މައްޗަށް ވައްކަމުގެ ކުށް ސާބިތުވާ ހަ ވަނަ ފަހަރު ކަމަށްވާތީ، މި ކުށުގެ އުގޫބާތެއްގެ ގޮތުން ހަ އަހަރު ދުވަސް، އަދި އެ ވައްކަން ކޮށްފައިވަނީ މީހުން ދިރިއުޅޭ ތަނަކުން ކަމަށްވާތީ ދެ އަހަރު ދުވަސް، ޖުމްލަ އަށް އަހަރު ދުވަހުގެ މުއްދަށް ޖަލަށް ލުމަށް ހުކުމް ކުރާކަމަށް ވެސް ކްރިމިނަލް ކޯޓުގެ ގަޒިއްޔާގައި ވެއެވެ.