03 May 2015, 15:45
"އަނިޔާވެރިކަން ނިންމަން" މިނަމުގައި އިދިކޮޅު ފަރާތްތަކުން މިދިޔަ ހުކުރު ދުވަހު ބޭއްވި މުޒާހަރާގައި ދެ ފުލުހަކަށް ހަމަލާދީފައިވާތީ ސަރުކާރު ކޯލިޝަންގައި ހިމެނޭ އެމްޑީއޭ އިން އެކަން ކުށްވެރިކޮށްފި އެވެ.
އެމްޑީއޭ އިން މިއަދު ނެރުނި ބަޔާނެއްގައި ވަނީ ހުކުރު ދުވަހުގެ ރޭ މުޒާހަރާގެ ބައިވެރިން ޕޮލިސް ސާޖަންޓް އަބްދުއްރަހްމާން ހުސައިން އަށާއި ކޯޕްރަލް އިސްމާއިލް ބަޝީރަށް އަނިޔާ ކުރުމަކީ ލާއިންސާނީ އަމަލެއް ކަމަށާއި އެކަން ހަރުކަށި އިބާރާތުން ކުށްވެރި ކުރާކަމަށެވެ.
"ޚާއްސަކޮށް ޕޮލިސް ސާޖަންޓު އަބްދުއްރަހުމާން ހުސައިން އަށާއި، ލޯޕްރަލް އިސްމާއީލް ބަޝީރަށް މުޒާހަރާގެ ބައިވެރިންގެ ތެރެއިން ބަޔަކު ދިން ލާއިންސާނީ އަނިޔާތަކާއި، މުޒާހަރާގެ ބައިވެރިން ބޭނުންކުރަމުން ގެންދިޔަ ޕިކަޕެއް ބާރު ސްޕީޑުގައި ދުއްވާފައިގޮސް ސަލާމަތީ ބާރުތަކުގެ ސަފުތަކުގެ ތެރެއަށް ވެއްދުން މިޕާޓީން އެންމެ ހަރުކަށި އިބާރާތުން ކުއްވެރިކުރަމެވެ،" އެމްޑީއޭގެ ބަޔާނުގައި ވެއެވެ.
ރާއްޖޭގައި ހަރަކާތްތެރިވާ އެންމެހައި ސިޔާސީ ޕާޓީތަކުން ވެސް ޒިންމާދާރު ސިޔާސީ ޕާޓީއެއްގެ ގޮތުގައި މަސައްކަތް ކުރުމަށް ފަސްނުޖެހުމަށާއި ގާނޫނީ އިމުން ބޭރު ނުވުމަށް އެމްޑީއޭ އިން ވަނީ ހުރިހާ ސިޔާސީ ޕާޓީތަކަށް ވެސް އިލްތިމާސްކޮށްފަ އެވެ.
ހުކުރު ދުވަހުގެ ރޭގެ މުޒާހަރާގައި ފުލުހަކަށް ހަމަލާދިންކަމުގެ ތުހުމަތުގައި ދެ މީހަކު ފުލުހުން ވަނީ ހައްޔަރުކޮށްފަ އެވެ.