05 May 2015, 23:54
ޔަމަނުގެ ބޮޑުބަޔަކަށް ވެރިވެގަނެގެން އުޅޭ ޓެރަރިސްޓް ޖަމާއަތެއް ކަމަށްވާ ހޫޘިން ސަޢުދީ އަރަބިއްޔާގެ ރަށަކަށް ހަމަލާދީފި އެވެ.
ރޮއިޓާސް ބުނީ ސައުދީ އަރަބިއްޔާ އާއި ޔަމަނު ގުޅޭ އިމުގެ ކައިރީގައިވާ ނަޖުރާނަށް ހޫޘީން މޯޓަރު ބަޑިން ދިން ހަމަލާ އަމާޒުވީ އަންހެން ކުދިންގެ ސްކޫލަކާއި ހޮސްޕިޓަލަކަށް ކަމަށެވެ. ސައުދީ ސަރުކާރުން ބުނެފައި ވަނީ އެހަމަލާތައް އެރުމާ ގުޅިގެން އެސަރަހައްދުގެ ހުރިހާ ސްކޫލްތަކެއް ބަންދުކޮށްފައިވާ ކަމަށެވެ. ނަމަވެސް އެހަމަލާތަކުގައި މީހަކު މަރުވިކަމެއް ނުވަތަ ނޫން ކަމެއް، އަދި ލިބުނީ ކިހާ ގެއްލުމެއް ކަމެއް އެގައުމުން އަދި ހާމައެއް ނުކުރެއެވެ.
ހޫޘީން ސައުދީ އަރަބިއްޔާއަށް ހަމަލާދީފައި މިވަނީ އެމީހުންނާ ދެކޮޅަށް ސައުދީ ސިފައިން ދެމުން ދިޔަ ވައިގެ ހަމަލާތައް ވަގުތީ ގޮތުން ހުއްޓައިލާނެކަން އިއްޔެ އިއުލާނުކޮށްފައި ވަނިކޮށެވެ. ސައުދީ ސަރުކާރުން ބުނެފައި ވަނީ އެހަމަލާތަކުގެ ބަދަލު ނުހިފައި ދޫނުކުރާނެ ކަމަށެވެ.
ހޫޘީ ޓެރަރިސްޓުންނާ ދެކޮޅަށް ސައުދީ އަރަބިއްޔާއިން ވައިގެ ހަމަލާތައް ދޭން ފެށި ފަހުން މިހާތަނަށް ޔަމަނުގެ އާއްމުންގެ 646 މީހުން ވަނީ މަރުވެފައެވެ. އޭގެ ތެރޭގައި 131 ކުޑަކުދިން ވެސް ހިމެނެއެވެ. މަރުވި މީހުންގެ އިތުރުން 1364 މީހުން ޒަހަމްވެފައި ވެއެވެ.