09 May 2015, 15:03
ފީފާއިން ކޮންމެ މަހަކު ނެރޭ ކޯކާލޯ ވޯލްޑް ރޭންކިންގައި އެއް ޕޮއިންޓްގެ ކުރިއެރުމާއެކު މިމަހުވެސް ރާއްޖެއަށް ސާކުގެ ދެ ވަނަ ލިބިއްޖެ އެވެ.
މިމަހު ރޭންކިން ޢާންމުކޮށްފައިވާއިރު ރާއްޖެއޮތީ ދުނިޔޭގެ 140 ވަނައިގައެވެ. މިދިޔަ މަހު ރާއްޖެއޮތީ 141 ވަނައިގައެވެ.
މިމަހުވެސް ސަރަހައްދުގެ އެއް ވަނަ ލިބިފައިވަނީ ސާފް ޗެމްޕިއަންޝިޕްގެ އެންމެ ފަހުގެ ޗެމްޕިއަން އަފްޣާނިސްތާނަށެވެ. އެޤައުމު އޮތީ ޕޮއިންޓަށް އެއްވެސް ބަދަލެއް ނައިސް 135 ވަނައިގައެވެ.
ރާއްޖޭގެ ފަހަތުން ސަރަހައްދުގެ ތިން ވަނައިގައިއޮތީ ވާދަވެރި އިންޑީއާއެވެ. އިންޑިއާ އޮތީ ދުނިޔޭގެ 147 ވަނައިގައެވެ.
މިފަހަރު ރޭންކިންގައި ވެސް ސަރަހައްދުގެ އެންމެ ފުލުގައި އޮތީ ޝްރީލަންކާއެވެ. ލަންކާ އޮތީ ދެ ޕޮއިންޓްގެ ވެއްޓުމާއެކު ދުނިޔޭގެ 188 ވަނައިގައެވެ.
މިފަހަރު ރޭންކިންގައިވެސް ދުނިޔޭގެ އެއް ވަނަ ލިބިފައިވަނީ މިދިޔަ އަހަރު ބޭއްވި ވޯލްޑްކަޕްގެ ޗެމްޕިއަން ޖަރުމަނަށެވެ. ދެ ވަނައިގައިއޮތީ ވޯލްޑްކަޕް ފައިނަލްގައި ޖަރުމަނާ ދެކޮޅަށް ނިކުތް އާޖެންޓީނާއެވެ.
އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގެ ޗެމްޕިއަން ސްޕެއިންއަށް މިފަހަރުވެސް ލިބެނީ 10 ވަނައެވެ.
އެންމެ ފަހުގެ ކޮޕާ އެމެރިކާގެ ޗެމްޕިއަން އުރުގުއޭ އޮތީ އަށް ވަނައިގައެވެ.
އެންމެ ފަހުގެ ކޮންކާކަފްގެ ޗެމްޕިއަން އެމެރިކާ އޮތީ 28 ވަނައިގައެވެ.
އެންމެ ފަހުގެ އެފްރިކަން ކަޕް އޮފް ނޭޝަން ކާމިޔާބުކުރި އައިވަރީ ކޯސްޓްއޮތީ ދުނިޔޭގެ 23 ވަނައިގައެވެ.
މިއަހަރު ބޭއްވި އޭޝިއަން ކަޕްގެ ޗެމްޕިއަން ޖަޕާން އޮތީ ދުނިޔޭގެ 50 ވަނައިގައެވެ.