09 May 2015, 16:27
ކުޑަކުދިންގެ ހިޔާގައި ދިރިއުޅެމުންދާ ހަގު އުމުރުގެ ކުދިންނަށް އާއިލާތަކާއި އެކު ދިރިއުޅުމުގެ ފުރުސަތު ފަހިކޮށްދިނުމަށް ބަންޑާރަ ނައިބު މުހައްމަދު އަނިލް އިލްތިމާސްކުރައްވައިފި އެވެ.
ކުޑަކުދިންގެ ދުވަހުގެ މުނާސަބަތުގައި ބަންޑާރަ ނައިބު ނެރުއްވި ހިތާބުގައި ވިދާޅުވެފައި ވަނީ ކުޑަކުދިންގެ ހިޔާގައި ކުދިން ބައިތިއްބައިގެން ބޮޑު ކުރުމަކީ ދުރު މުސްތަގުބަލަކަށް ބަލާއިރު އެންމެ ފައިދާ ހުރިގޮތެއް ކަމަށް ދައުލަތުން ނުދެކޭ ކަމަށެވެ. އަދި އެކުދިންގެ ގާނޫނީ ބެލެނިވެރިކަމުގެ ފުރުސަތަށް އެދުމަށް ދައުލަތުން ހުޅުވާލާފައިވީ ނަމަވެސް ގިނަ މީހުން އެދެމުން އަންނަނީ ވަރަށް ތުއްތު ކުދިންނަށް ކަމަށް ބަންޑާރަ ނައިބުގެ ހިތާބުގައި ވިދާޅުވެފައިވެ އެވެ. އަދި އެކަމުގެ ސަބަބުން ދޮށީ އުމުރުގެ ކުދިންނަށް އާއިލާތަކާ އެކު އުޅުމުގެ ނަސީބު ނުލިބޭ ކަމަށް އަނިލް ވަނީ ވިދާޅުވެފައެވެ.
" އެހެން ކަމުން އިންސާނިއްޔަތަށް ކޮށްދެވޭ މުހިންމު ކަމެއްގެ ގޮތުގައި ދެކިގެން މިފަދަ ކުދިންނަށް އެހީތެރިކަން ފޯރުކޮށްދެވެން އިތް ފަރާތްތަކުން އެކަމަށް އެދި ހުށަހެޅުއްވުމަށް މިފުރުސަތުގައި އަޅުގަނޑު އިލްތިމާސްކުރަން،" ބަންޑާރަނައިބުގެ ހިތާބުގައި ވިދާޅުވެފައިވެ އެވެ.
އަޅާލާނެ މީހަކު ނެތުމާއި، ތަކުރާރުކޮށް އަނިޔާ ލިބުމުގެ ސަބަބުން 90 އަށް ވުރެ ގިނަ ކުދިން މިހާރުވެސް ކުޑަކުދިންގެ ހިޔާ ގައި ތިބިކަމަށް އަނިލްގެ ހިތާބުގައި ވަނީ ފާހަގަކުރައްވާފައެވެ. އަދި ކުޑަކުދިންނަށް ރައްކާތެރިކަން ފޯރުކޮށްދެވޭނީ ހުރިހާ ބާވަތެއްގެ އަނިޔާއަކުން ކުދިން ސަލާމަތްކޮށްގެންކަން ފާހަގަ ކުރައްވާ އަނިލް ވިދާޅުވީ ކުދިންނަށް އަނިޔާ ލިބޭ ވަގުތު ކައިރީގައި ތިބޭ މީހުން "ބަލަހައްޓައިގެން ތިބުމަކީ ބަލައިގަނެވޭނެ ކަމެއް ނޫން" ކަމަށެެވެ.
" ގޭތެރެއިން ކުދިންނަށް އަނިޔާ ލިބެމުންދާ ވަގުތު ގޭތެރޭގައި ތިބޭ އެހެން މީހުންނާއި، އެކަން އެނގޭ އަވަށްޓެރިންނަށް މާބޮޑުކަމަށް ނުވެ ބަލަހައްޓައިގެން ތިބުމަކީ ބަލައިގަނެވޭނެ ކަމެއް ނޫން" ބަންޑާރަ ނައިބު އަނިލްގެ ހިތާބުގައި ވިދާޅުވެފައިވެ އެވެ.
ކުޑަކުދިންނަށް ފުރިހަމަ ރައްކާތެރިކަން ހޯދައިދިނުމުގެ އެންމެ މުހިންމު ޒިންމާ އުފުލަން ޖެހޭނީ މައިންބަފައިން ކަމަށް ބަންޑާރަ ނައިބުގެ ހިތާބުގައި ވަނީ ވިދާޅުވެފަ އެވެ. އެގޮތުން ބައްޕައިންގެ އެހީތެރިކަން ލިބޭ މިންވަރު މިހާރަށްވުރެ އިތުރުކުރުމަށް އަނިލް ވަނީ ގޮވާލައްވާފައެވެ.
"ސައިކަލުގައި ކުދިން ސުކޫލުދޮށަށް ގެންގޮސް ގެނައުމަކުން މިއަދު ނިންމާލެވޭކަށް ނެތް، އޭގެ އިތުރުން ކުދިންގެ ހޯމްވޯކް ހެދުމުގަ އެހީތެރިވެދިނުން ފަދަ ކަންކަމުގައި ބައްޕައިން ހަރަކާތްތެރިވުން މިވަނީ އިތުރުކުރަން ޖެހިފައި،" ބަންޑާރަ ނައިބުގެ ހިތާބުގައި ވިދާޅުވެފައި ވެއެވެ.
އަމާންކަން ދިވެހި މުޖުތަމައުގައި އަލުން އިއާދަ ކުރެވެން އޮތީ "އަޅުގަނޑުމެންގެ ތެރޭގައި ބޮޑެތިވަމުން އަންނަ ކުދިންނަށް ފުރިހަމަ ރައްކާތެރިކަން ހޯދައިދެވިގެން،" ކަމަށް ބަންޑާރަ ނައިބު ވަނީ ވިދާޅުވެފަ އެވެ.