12 May 2015, 21:24
މި މަހުގެ އެއް ވަނަ ދުވަހު އިދިކޮޅު ފަރާތްތަކުން މާލޭގައި ކުރި މުޒާހަރާއާ ގުޅިގެން ބަންދުކޮށްފައިވާ އެމްޑީޕީގެ ޗެއާޕާސަން އަލީ ވަހީދު ތިން ވަނަ ފަހަރަށް ސިއްހީ ފަރުވާއަކަށް މާލެ ގެނެސްފި އެވެ.
އެމްޑީޕީގެ ނައިބު ރައީސް މުހައްމަދު ޝިފާޒު "ސަން"އަށް މިރޭ ވިދާޅުވީ މިއަދު އިރުއޮއްސި 6:00 އެހާކަންހާއިރު ޑޮކްޓަރަށް ދެއްކުމަށްޓަކައި ފުލުހުން އަލީ ވަހީދު އޭޑީކޭ ހޮސްޕިޓަލަށް ގެންދިޔަ ކަމަށެވެ.
އޭނާ ހޮސްޕިޓަލަށް ގެންދިޔައީ އެމްއާރްއައި ހެދުމަށް ކަމަށާއި އެކަން ނިމުމުން މިރޭ 7:45 އެހާކަންހާއިރު ކަމަށާއި އެކަން ނިމުމާއެކު އަނބުރާ އޭނާ ދޫނިދޫއަށް ގެންގޮސްފައިވާ ކަމަށް ވެސް ޝިފާޒު ވިދާޅުވި އެވެ.
އަލީ ވަހީދުގެ ސިއްހީ ހާލަތު ވަރަށް ދައްކަމަށް އޭނާގެ ގާނޫނީ ވަކީލު ހުސްނުއްސުއޫދު ވަނީ ވިދާޅުވެފަ އެވެ.
އަލީ ވަހީދު އޭޑީކޭ ހޮސްޕިޓަލުން ނެރުނުވަގުތު އެމްޑީޕީގެ ސަޕޯޓަރުން އޭޑީކޭގައި ---- ފޮޓޯ/ އެމްޑީޕީ
އޭނާ ހޮސްޕިޓަލަށް ގެންދިޔައިރު އަނބިކަނބަލުން އާއިޝަތު ލީޝާ އާއި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހީމް މުހައްމަދު ސޯލިހާއި އެޕާޓީގެ ނައިބު ރައީސް ޝިފާޒުގެ އިތުރުން މާލޭ ސިޓީގެ ޑެޕިއުޓީ މޭޔަރު ޝިފާ މުހައްމަދާއި އެޕާޓީގެ ސަޕޯޓަރުން އޭޑީކޭ ހޮސްޕިޓަލަށް ގޮސްފައިވެ އެވެ.
އަލީ ވަހީދު ހައްޔަރުކޮށްފައި ވަނީ މިމަހުގެ ފުރަތަމަ ދުވަހު އިދިކޮޅު ފަރާތްތަކުން މާލޭގައި ބޭއްވި މުޒާހަރާގައި، މުޒާހަރާގެ ބައިވެރިންނަށް ހަމަނުޖެހުން ހިންގަން ހިތްވަރުލިބޭ ގޮތަށް ވާހަކަފުޅު ދެއްކެވި ކަމަށް ތުހުމަތުކޮށް ފުލުހުން ތަހުގީގު ކުރަމުން އަންނަ މައްސަލައަކާ ގުޅިގެންނެވެ.