14 May 2015, 09:50
ޔޫއެފާ ޗެމްޕިއަންސް ލީގް ސެނީފައިނަލްގެ ދެ ވަނަ ލެގް މެޗްގައި 1-1 ގެ ނަތީޖާއަކުން އެއްވަރުވެ 3-2 ގެ އެގްރިގޭޓް ނަތީޖާއަކުން މޮޅުވެ އެންމެ ފަހުގެ ޗެމްޕިއަން ރެއާލް މެޑްރިޑް ކަޓްވާލުމަށްފަހު ޔުވެންޓަސްއިން 12 އަހަރުފަހުން އެ މުބާރާތުގެ ސެމީ ފައިނަލަށް ދަތުރުކޮށްފި އެވެ.
މި ދެޓީމް ބައްދަލު ކުރި ފުރަތަމަ ލެގް މެޗް 2-1 ނަތީޖާއަކުން ކާމިޔާބުކޮށްފައިވަނީ ޔުވެންޓަސްއެވެ.
ރޭގެ މެޗްގައި ފުރަތަމަ ލަނޑު ޖަހައި ލީޑް ނެގީ ރެއާލުންނެވެ.
ފުރަތަމަ ހާފުގެ 23 ވަނަ މިނެޓްގައި ކްރިސްޓިއާނޯ ރޮނާލްޑޯ މިލަނޑު ކާމިޔަބު ކުރީ އެޓީމަށް ލިބުނު ޕެނަލްޓީއެއްގައެވެ. މިއީ ޔުވެންޓަސްގެ ޕެނަލްޓީ އޭރިއާ ތެރެއިން އެޓިމްގެ ޑިފެންޑަރު ޗިއަލިނީ، ރެއާލްގެ ޖޭމްސް ރޮޑްރިގޭޒަށް ކުރި ފައުލަކާ ގުޅިގެން ލިބުނު ޕެނަލްޓީއެކެވެ.
ޔުވެންޓަސްއިން ނަތީޖާ ހަމަހަމަ ކުރީ ދެ ވަނަ ހާފުގެ 12 ވަނަ މިނެޓްގައި ރެއާލް މެޑްރިޑްގެ ކުރީގެ ކުޅުންތެރިޔާ އަލްވާރޯ މަރޯޓާ ކާމިޔަބުކޮށްދިން ލަނޑުންނެވެ. މިއީ ފްރާންސްގެ ޕައުލް ޕޮގްބާ ނެގި ހިލޭ ޖެހުމަކުން މަރޮޓާ ކާމިޔާބު ކުރި ލަނޑެކެވެ.
ރޭ ގެ މެޗުން އެއްވަރުވެ އެގްރިގޭޓް ނަތީޖާއަކުން ބަލިވުމުން ރެއާލްގެ ކުޅުންތެރިން --- ފޮޓޯ/ އޭޕީ
މީގެ އިތުރުން ލަނޑު ޖަހާނެ ރަނގަޅު ފުރުސަތުތައް ދެޓީމަށްވެސް ލިބިގެންދިޔައެވެ.
ފައިނަލްގައި ޔުވެންޓަސް ބައްދަލު ކުރަންޖެހޭނީ މިމުބާރާތް ހަތަރު ފަހަރު ކާމިޔާބުކޮށްފައިވާ ސްޕެއިންގެ ބާސެލޯނާއާ ދެކޮޅަށެވެ. ފައިނަލް މެޗް އޮންނާނީ މިއަންނަ މަހު ހަ ވަނަ ދުވަހު ޖަރުމަނުގެ ބާލިންގެ އޮލިމްޕިއާސްޓޭޑިއަންގައެވެ.
އެންމެ ފަހުން ޔުވެންޓަސް ފައިނަލަށް ދަތުރުކުރީ 2003 ވަނަ އަހަރުއެވެ. އެފަހަރުވެސް އެޓީމް ފައިނަލަށް ދަތުރު ކުރީ ރެއާލް މެޑްރިޑް ބަލި ކުރުމަށް ފަހުގައެވެ.
ޔުވެންޓަސް ވަނީ މިގެ ކުރިން ހަތް ފަހަރު މިމުބާރާތުގެ ފައިނަލްގައި ކުޅެ ދެ ފަހަރު މުބާރާތް ކާމިޔަބުކޮށްފައެވެ.