16 May 2015, 13:40
ސަން ސިޔާމް ގްރޫޕަށް 25 އަހަރު ފުރުމުގެ މުނާސަބަތުގައި ތެލެސީމިއާ ސެންޓަރަށް ލޭ ހަދިޔާ ކުރުމުގެ ޕްރޮގުރާމެއް ފަށައިގެން މިއަދު ކުރިއަށް އެބަދެ އެވެ.
އިވެންޓް އިންތިޒާމްކުރާ ސުޓިއަރިން ކޮމިޓީގެ މެންބަރު އައްޒަ ހަމީދު މިއަދު "ސަން" އާ ވާހަކަ ދައްކަވަމުން ވިދާޅުވީ ސަން ސިޔާމް ގްރޫޕުގެ ފަރާތުން ލޭ ހަދިޔާ ކުރުމުގެ ޕްރޮގްރާމެއް ކުރިއަށް ގެންދިއުމަށް ނިންމެވި އެންމެ ބޮޑު އެއް ބޭނުމަކީ "އިންސާނިއްޔާތަށް ޓަކައި" ބޮޑު ހިދުމަތެއް ކުރިއަށް ގެންދިއުން ކަމަށެވެ.
އިވެންޓް އިންތިޒާމްކުރާ ސުޓިއަރިން ކޮމިޓީގެ މެންބަރު އައްޒަ ހަމީދު "ސަން" އަށް އިންޓަވިއު ދެއްވަނީ: ސަން ފޮޓޯ/ ޔޫސުފް ސޮފްވާން
އޭނާ ވިދާޅުވީ ލޭ ހަދިޔާ ކުރުމުގެ ޕްރޮގްރާމުގައި އަމަލީ ގޮތުން ސަން ސިޔާމް ގްރޫޕްގެ މުވައްޒަފުން ހަރަކާތްތެރިވަމުން އަންނަ ކަމަށާއި މިކަމުގައި މުވައްޒަފުންގެ އެއްބާރުލުން ވަރަށް ބޮޑަށް ލިބެމުން އަންނަ ކަމަށެވެ. އަދި މި ޕްރޮގުރާމުގައި ތެލެސީމިއާ ސެންޓަރަށް ލޭ ހަދިޔާ ކުރަމުން ދާނީ އެ ގްރޫޕުގެ މުވައްޒަފުން ކަމަށް ވެސް އައްޒަ ވިދާޅުވި އެވެ.
"އަޅުގަނޑުމެންގެ ތިން ރިސޯޓުން ވެސް މި މަހުގެ ތެރޭގައި އޮންނާނެ ރާވާފައި، އެކި ދުވަސް ދުވަހުގެ މަތީން [މިކަން ކުރިއަށް ގެންދިއުމަށް]. މި މަހުގެ 19ވަނަ ދުވަހު އޮޅުވެލީގައި އޮންނާނެ. ދެން އަޅުގަނޑުމެން އުއްމީދު ކުރަން 100 ވަރަކަށް ޑޯނާސް ތިބޭނެ ކަމަށް،" އައްޒަ ވިދާޅުވި އެވެ.
އައްޒަ ވިދާޅުވީ މިއަދު ކުރިއަށްދާ ލޭ ހަދިޔާ ކުރުމުގެ ޕްރޮގުރާމް ކުރިއަށް ދާނީ މިއަދު ހަވީރު 5:30 އާ ހަމައަށް ކަމަށެވެ.
ސަން ސިޔާމް ގުރޫޕަށް 25 އަހަރު ފުރުމުގެ މުނާސަބަތާ ގުޅިގެން މިއަދު ލޭ ހަދިޔާ ކުރުމުގެ ޕްރޮގްރާމެއް ކުރިއަށްދާ އިރު އިއްޔެ ވިލި މާލޭގައި ވަނީ ކުޑަކުދިންގެ ހަވީރެއް ކުރިއަށް ގެންގޮސްފަ އެވެ. އަދި ހަމައެއާ އެކު ވިލި މާލޭގައި ހުންނަ ކުޑަކުދިންގެ ހިޔާގައި ވަނީ ގޭމް ސެންޓަރެއް ވެސް ގާއިމުކޮށްފަ އެވެ.