02 Jun 2015, 13:02
ޓެރަރިޒަމްގެ ކުށް ސާބިތުވެ 13 އަހަރަށް ޖަލަށް ލާފައިވާ ކުރީގެ ރައީސް މުހައްމަދު ނަޝީދު އެމްއާރްއައި ސްކޭންއެއް ހެއްދުމުގެ އިންތިޒާމް ހަމަޖެއްސުމަށް ހޯމް މިނިސްޓުރީގައި އެދެފި އެވެ.
ރައީސް ނަޝީދުގެ ގާނޫނީ ވަކީލް ހަސަން ލަތީފް ހޯމް މިނިސްޓުރީ އަށް ފޮނުވާފައިވާ ސިޓީއެއްގައި ބުނެފައި ވަނީ މާފުށީގައި ހުންނަވާ ޑޮކްޓަރަށް ރައީސް ނަޝީދު ދެއްކެވުމުން އެމްއާރްއައި ސްކޭންއެއް ހެދުމަށް ލަފާދީފައި ވާތީ ވީހާ ވެސް އަވަހަށް އެ ސްކޭން ހައްދަވައި ދެއްވުން އެދޭ ކަމަށެވެ.
ރައީސް ނަޝީދުގެ އާއިލާ މެމްބަރަކު މިއަދު ސަން އަށް ވިދާޅުވީ ރައީސް ނަޝީދުގެ މައިބަދައިގެ ޑިސްކަކަށް މައްސަލައެއް ޖެހިފައި ވާތީ އެމްއާރްއައި ސްކޭނެއް ހެދުމަށް ޖެހިފައިވާ ކަމަށެވެ.
ރައީސް ނަޝީދު ވަނީ ޑޮކްޓަރަށް ދެއްކުމަށް ދާދި ފަހުން މާލެ ގެނެސްފަ އެވެ. އެފަހަރު އެމަނިކުފާނަށް ފަރުވާ ދީފައި ވަނީ ދަތަށް ދިމާވެފައިވާ މައްސަލައަކަށެވެ.
ވަކީލުން ތުހުމަތު ކުރައްވާ ގޮތުގައި ރައީސް ނަޝީދަށް އަނިޔާ ލިބިފައި ވަނީ މިއަހަރުގެ ފެބްރުއަރީ މަހު 23 ވަނަ ދުވަހު ކޯޓަށް ހާޒިރު ކުރުމުގެ ތެރޭގައި ކްރިމިނަލް ކޯޓް ދޮރުމަތިން ހިނގި ހާދިސާގެ ސަބަބުން ކަމަށެވެ.
އެމައްސަލާގައި ޕޮލިސް އިންޓެގްރިޓީ ކޮމިޝަން (ޕީއައިސީ)އިން ނިންމާފައި ވަނީ އެމަނިކުފާނު ކްރިމިނަލް ކޯޓަށް ހާޒިރުކުރުމުގައި ގާނޫނާ ޚިލާފަށް ފުލުހުން އަމަލުކޮށްފައިވާކަން ތަހުގީގުން އެނގެން ނެތް ކަމަށެވެ.
ޕީއައިސީން މިގޮތަށް ނިންމި ނަމަވެސް ހިއުމަންރައިޓްސް ކޮމިޝަނުން ނެރުނު ނޫސްބަޔާނެއްގައި ވަނީ ރައީސް ނަޝީދު ކޯޓަށް ހާޒިރުކުރުމުގައި ފުލުހުން އަމަލުކޮށްފައި ވަނީ ރަހުމް ކުޑަގޮތަކަށް ކަމަށެވެ. އަދި އެ މައްސަލަ ތަހުގީގު ކުރަމުން އަންނަ ކަމަށް އެ ކޮމިޝަނުން ވަނީ ބުނެފަ އެވެ.