02 Jun 2015, 13:49
މުދާ އުފުލާ ޕިކްޕްތަކުން ނަގާ އަގުތައް ކަނޑައަޅާފައިވީ ނަމަވެސް އެއާއި ހިލާފަށް ބޮޑު އަގު ނަގަމުންދާ ކަން ފާހަގަ ކުރެވޭތީ ޝަކުވާ ހުށައެޅޭނެ ނަމްބަރެއް ޓުރާންސްޕޯޓް އޮތޯރިޓީ އިން ހަމަޖައްސައިފި އެވެ.
ޓުރާންސްޕޯޓް އޮތޯރިޓީގެ ޗެއާމަން އަބްދުއްރަޝީދު ނާފިޒް ސަން އަށް ވިދާޅުވީ މުދާ އުފުލަން މާލޭގައި ދުއްވާ ބައެއް ޕިކަޕް ޑުރައިވަރުން ގަވައިދާ ހިލާފަށް ބޮޑު އަދަދުން ފައިސާ ނަގަމުން އަންނަ ކަމުގެ ޝަކުވާ އެއޮތޯރިޓީ އަށް ލިބެމުން އަންނަ ކަމަށެވެ. އެހެން ކަމުން އެފަދަ ޝަކުވާތައް 7943434 އަށް މެސެޖްގެ ގޮތުގައި ހުށައެޅުމަށް ނާފިޒް އެދިލެއްވި އެވެ.
އެނަމްބަރަށް އެ ޕިކަޕެއްގެ ނަމްބަރާއި އެހެނިހެން މައުލޫމާތު އެ ނަމްބަރަށް އެސްއެމްއެސް ކުރުމުން އެ މައްސަލަތައް ބަލާނެ ކަމަށް ނާފިޒް ވިދާޅުވި އެވެ.
"އެފަދަ ޝަކުވާތައް އަބަދުހެން ހުށައެޅޭ، ހުށައެއެޅީ އެފަދަ މައްސަލަތައް ދިމާވާތީ." ނާފިޒް ވިދާޅުވި އެވެ.
ގަވައިދުގެ ދަށުން 1.5 ޓަނަށް ވުރެ ދަށުގެ ޕިކަޕު ދަތުރުތަކަށް ހެނދުނު 6:00 އިން ރޭގަނޑު 12:00 އަށް ނެގޭނީ 40 ރުފިޔާ އަށެވެ. ރޭގަނޑު 12:00 އިން ހެނދުނު 6:00 އާ ދޭތެރޭ ނެގޭނީ 50 ރުފިޔާ އެވެ. ގަޑި ދަތުރެއް ކުރެވޭނީ ގަޑިޔަކު 140 ރުފިޔާގެ ރޭޓުންނެވެ.
ހަމަ އެ ގަވައިދުގެ ދަށުން 1.5 ޓަނާއި ދެ ޓަނާއި ދޭތެރޭ ޕިކަޕުގެ ދަތުރުތަކަށް ހެނދުނު 6:00 އިން ރޭގަނޑު 12:00 އަށް ނެގޭނީ 70 ރުފިޔާ އަށެވެ. ރޭގަނޑު 12:00 އިން ހެނދުނު 6:00 އާއި ދޭތެރޭ ނެގޭނީ 80 ރުފިޔާ އެވެ. ގަޑި ދަތުރެއް ކުރެވޭނީ ގަޑިޔަކު 180 ރުފިޔާގެ ރޭޓުންނެވެ.