04 Jun 2015, 20:57
ޗައިނާގެ މީހަކު ވަކި ލާރި އެއްކޮށްގެން އެލާރިއަށް އާ ކާރެއް ގަނެފި އެވެ.
ޗައިނާގެ އުތުރުއިރުމަތީގައި އޮންނަ ލިއައުނިންގް ޕްރޮވިންސްގެ ގޭން ނަމަކަށް ކިޔާ އެ މީހާ ގަތް ކާރުގެ އަގަކީ 680,000 ޔުއާން (109 ހާސް ޑޮލަރު) އެވެ. ކާރު ގަތުމަށް 660،000 ޔުއާން (106 ހާސް އެމެރިކާ ޑޮލަރު) އޭނާ ދައްކާފައިވަނީ ވަކި ލާރިންނެވެ. ބާކީ 2000 ޔުއާން (322 ޑޮލަރު) ދެއްކީ 1 ޔުއާންގެ ކަރުދާސް ނޫޓުންނެވެ.
ޗައިނާގެ މީހަކު ވަކި ލާރިން ކާރެއް ގަތުމަށް ކާރު ވިއްކާ ފިހާރައަށް ގެނައި ވަކި ލާރިތައް --- ފޮޓޯ/ އިމޭޖްޗައިނާ
ޕެޓްރޯލް ޝެޑެއްގައި މަސައްކަތްކުރާ ގޭން ބުނާގޮތުން، އޭނާ އެ ވަކިލާރިތައް އެއްކޮށްފައިވަނީ ޕެޓްރޯލް ޝެޑަށް ޕެޓްރޯލް އަޅަން މަޑުކުރާ ބަސް ތަކުންނެވެ. ނަމަވެސް އެހާގިނަ އަދަދެއްގެ ފައިސާ އެއްކޮށްފައިވަނީ ކިހާ މުއްދަތެއްގެ ތެރޭގައި ކަމެއް އޭނާ ނުބުނެއެވެ.
ގޭން އުޅޭ ޕްރޮވިންސްގައި ހުންނަ ކާރު ވިއްކާ ފިހާރައަކުން ގަތް އެ ކާރަށް ފައިސާ ދައްކަން ވަކި ލާރިތައް ގެންގޮސްފައިވަނީ ލޮރީއެއްގައެވެ. އެ ހުރިހާ ވަކި ލާރީގެ ބަރުދަނުގައި ހަތަރު ޓަނު ހުރިއިރު، ކަރުދާހަށްލައި އޮޅާފައި ހުރި އެ ވަކި ލާރިތައް ލޮރީން ހުސްކުރުމަށް ކާރު ވިއްކި ފިހާރައިގެ 10 މުވައްޒަފުން އެއް ގަޑިއިރަށްވުރެއް ގިނަ ވަގުތު ހޭދަކޮށްފައިވެ އެވެ.
ޗައިނާގެ މީހަކު ވަކި ލާރިން ކާރެއް ގަތުމަށް ކާރު ވިއްކާ ފިހާރައަށް ގެނައި ވަކި ލާރިތައް --- ފޮޓޯ/ އިމޭޖްޗައިނާ
ޗައިނާގައި މީހަކު ވަކި ލާރިން ކާރެއް ގަނެފައިވާއިރު، މިއަހަރުގެ މާޗް މަހުގެ ތެރޭގައި އެ ގައުމުގެ ފުޖިއަން ޕްރޮވިންސްގެ މީހަކު ވަނީ ވަކިލާރިން 100،000 ޔުއާން (161 ހާސް އެމެރިކާ ޑޮލަރު) އޭނާގެ އާ އެޕާޓްމަންޓަށް ދައްކާފައެވެ.