06 Jun 2015, 13:58
އއ. އަތޮޅުގައި ހިންގަމުން އަންނަ ރިސޯޓެއްގައި ބަޔަކު މަސްތުގެ ހާލަތުގައި ތިބި ކަމަށް ތުހުމަތުކުރެވިގެން ފުލުހުން އެ ރަށަށް އަރައިފި އެވެ.
ފުލުހުންގެ މީޑިއާ އޮފިޝަލު މިއަދު 'ސަން' އަށް ވިދާޅުވީ ފުލުހުން ރޭ ދަންވަރުގެ ވަގުތެއްގައި އއ. އަތޮޅު ރިސޯޓަކަށް އަރާފައި ވަނީ އެ ރިސޯޓުން ކުރި ރިޕޯޓަކާ ގުޅިގެން ކަމަށެވެ. އަދި މަސްތުވެގެން ތިބި ކަމަށް ތުހުމަތު ކުރެވޭ ހަތަރު މީހަކު ފުލުހުންގެ ބެލުމުގެ ދަށަށް ގެންގޮސް ބަލައި ފާސް ކުރި އިރު އޭގެ ތެރެއިން ދެ މީހަކު މަސްތުވާ ތަކެއްޗަށް ޕޮޒިޓިވްވެފައިވާ ކަމަށް ވެސް އޮފިޝަލް ވިދާޅުވި އެވެ. ނަމަވެސް އެއީ ކޮން ރިސޯޓަކުން ހުށަހެޅި މައްސަލައެއް ކަމެއް ވިދާޅެއް ނުވެ އެވެ.
"ބަޔަކު މަސްތުވެގެން ތިބި ކަމަށް ބުނެ ފުލުހުންނަށް ރިސޯޓުން ހުށަހެޅި މައްސަލައަކާ ގުޅިގެން ފުލުހުން އެ ރިސޯޓަށް އެރީ،" އޮފިޝަލް ވިދާޅުވި އެވެ.
އެ ރިސޯޓުން ހައްޔަރުކުރި މީހުންގެ ތަފްސީލެއް ފުލުހުން ނުދެ އެވެ. ނަމަވެސް އޭގެ ތެރެއިން ދެ މީހަކު ރޭގެ ވަގުތެއްގައި ދޫކޮށްލާފައިވާ ކަމަށް އޮފިޝަލް ވިދާޅުވި އެވެ.
ސަން އަށް އެނގިފައިވާ ގޮތުގައި ރޭ ދަންވަރުގެ ވަގުތެއްގައި ފުލުހުން އަރާފައި ވަނީ އއ. އަތޮޅުގައި ހިންގަމުން އަންނަ ކަނދޮޅު އައިލެންޑް ރިސޯޓަށެވެ.