08 Jun 2015, 15:17
ދިވެހި މަސްވެރިކަމުގެ ސިނާޢަތުގައި ޒުވާން މަސްވެރިންގެ ހިއްސާ އިތުރުކޮށް، ރާއްޖޭގެ އިގްތިޞާދީ ސަރަޙައްދުގެ މުއްސަނދިކަމުން މަސްވެރިންނަށް އިތުރު ނަފާ ހޯދުމުގެ ފުރުޞަތު ފަހިކޮށްދިނުމުގެ ގޮތުން ސަރުކާރުން ކުރަމުންގެންދާ މަސައްކަތުގައި، ދިވެހި ރާއްޖެއަށް ލޯބޮޑު ކަންނެލީގެ ލޭނުމަސްވެރިކަން ތަޢާރުފްކޮށް، ޒުވާން މަސްވެރިން މި ކަމަށް ނެރުމަށްޓަކައި ސުކޫލްތަކުގެ ދަރިވަރުންނަށް އަމާޒުކޮށްގެން މިއަދު ތަމްރީން ޕްރޮގްރާމެއް ފަށައިފި އެވެ.
ފިޝަރީޒް މިނިސްޓްރީން ބުނީ، މި ތަމްރީން ޕްރޮގްރާމްގެ މަޤްޞަދަކީ ސްކޫލް ދައުރު ނިންމައި، މަސައްކަތުގެ ބާޒާރަށް ނުކުންނަ ޒުވާނުން، ރާއްޖޭގައި އަލަށް ތަޢާރަފްކުރެވިފައިވާ ލޯބޮޑު ކަންނެލީގެ މަސްވެރިކަމަށް އަހުލުވެރިކުރުވައި އެ މަސްވެރިކަމަށް ނުކުތުމަށް ތަމްރީންދީ އެކަމަށް ހިތްވަރު ދިނުން ކަމަށެވެ.
މި ޕްރޮގްރާމުގެ ދަށުން ލޯބޮޑު ކަންނެލީގެ ލޭނުމަސްވެރިކަން ކުރާގޮތް ދަސްކޮށްދީ، އަމަލީގޮތުން މަސްވެރިކަމުގައި ހަރަކާތްތެރިވުމުގެ ފުރުޞަތު ބައިވެރިންނަށް ހޯދައިދެވޭނެ އެވެ. މިއަދު މިފެށުނު ތަމްރީން ޕްރޮގްރާމްގައި 2 ދަތުރެއް ކުރުމަށްވަނީ ހަމަޖެހިފައެވެ. 2 ވަނަ ދަތުރުކުރުމަށް ހަމަޖެހިފައިވަނީ 9 ޖޫން 2015 ގައެވެ.
ޕްރޮގްރާމްގައި ބައިވެރިންނަށް ލޯބޮޑު ކަންނެލީގެ ލޭނު މަސްވެރިކަން ކުރުމަށް ބޭނުންކުރާ ޢާލާތްތައް ގެންގެގުޅޭނެގޮތާއި ލޭނު އަޅާނޭ ގޮތް ދަސްކޮށްދެވޭނެއެވެ. މިތަމްރީން ޕްރޮގްރާމް ކުރިއަށް ގެންދަނީ ލޯބޮޑު ކަންނެލީގެ ލޭނު މަސްވެރިކަމަށް ޙާއްސަކުރެވިފައިވާ އުޅަނދެއްގައެވެ.
ތަމްރީން ޕްރޮގްރާމްގައި މާލޭގެ 5 ސުކޫލަކުން 32 ދަރިވަރުން ބައިވެރިވެއެވެ. މި ޕްރޮގްރާމްގައި ބައިވެރިވެފައިވާ ސްކޫލުތަކަކީ ޖަމާލުއްދީން ސުކޫލް، މުހިއްޔުއްދީން ސުކޫލް، އަރަބިއްޔާ ސުކޫލް، ހިރިޔާ ސުކޫލް އަދި މާފަންނު މަދަރުސާ އެވެ.
މިތަމްރީން ޕްރޮގްރާމްގައި ކަނޑުގެ ސަލާމަތާއި ރައްކާތެރިކަށް ކަށަވަރުކުރުމުގެ ގޮތުން ކޯސްޓް ގާޑުގެ ފަރާތުން މިތަމްރީންގެ ބައިވެރިންނަށް މަޢުލޫމާތު ދެއްވާނެއެވެ. އަދި މިމިނިސްޓްރީއާއި މޯލްޑިވްސް އިންޑަސްޓްރިއަލް ކޮމްޕެނީ ލިމިޓެޑުގެ ކަމާބެހޭ މުޥައްޒަފުން މިތަމްރީން ޕްރޮގްރާމްގައި މަޢުލޫމާތު ދެއްވާގޮތަށް ވަނީ ހަމަޖެހިފައެވެ.