19 Jun 2015, 00:36
އެއީ 2009 ވަނަ އަހަރެވެ. "މިސްކިތްތަކުގެ މުންނާރުތައް ހުންނަން ނުޖެހޭ" ކަމަށް ބުނެ މުންނާރުތައް ތަޅާލުމަށް ގޮވަލައި ސްވިޒަލޭންޑުން ފެށުނު ހަރަކާތް ޔޫރަޕްގެ ބައެއް އެހެން ގައުމުތަކަށްވެސް ފެތުރިގެންދިޔަ ދުވަސްވަރެވެ. މުޅި ހަރަކާތް ލީޑް ކުރުމުގައި އިސްކޮށް ހުންނެވީ ސްވިޒަލޭންޑްގެ ސިޔާސީ ޕާޓީއެއް ކަމުގައިވާ ސްވިސް ޕީޕަލްސް ޕާޓީ (އެސްވީޕީ)ގެ އިސް މެންބަރެއް ކަމުގައިވާ ޑެނިލް ސްޓްރައިކްއެވެ.
ސްޓްރައިކް އަކީ އެސްވީޕީގެ ނުފޫޒުގަދަ ބޭފުޅެކެވެ. އޭނާގެ ނުފޫޒު ހާމަވެގެންދަނީ ޕާޓީގެ ސިޔާސަތުތައް އެކުލަވާލެއްވުމުގައި އޭނާ އަދާކުރައްވާ މުހިންމު ދައުރުގެ ސަބަބުންނެވެ. އަދި އޭނާ އިސްވެ ހުންނަވައިގެން އެޕާޓީން ހިންގާ ހަރަކާތްތަކަށް އާންމުގެ ބޮޑު ތާއީދެއް ލިބޭތީއެވެ.
މިސްކިތްތަކުގެ މުންނާރުތަކަކީ އެތަނެއްގައި މުސްލިމުން ދިރިއުޅެމުންދާކަން ހާމަކޮށްދޭ އެންމެ ބޮޑު ރަމްޒެވެ. އެހެންކަމުން މުޅި ޔޫރަޕާ ސްވިޒަލޭންޑްގައި ހަލުވި ކަމާއެކު ފެތުރެމުންދާ އިސްލާމްދީން ފެތުރުނަ ނުދިނުމަށްޓަކައި ސްޓްރައިކް އިސްވެ ހުރެ އެސްވީޕީއިން ބޮޑު ހަރަކާތެއް އިއުލާންކުރި އެވެ. އެފަދަ ހަރަކާތެއް އިއުލާން ކުރީވެސް އެސްވީޕީއަށް އާންމުގެ ތެރޭގައި ބޮޑު މަގުބޫލުކަމެއް ހޯދުމަށެވެ. މިހަރަކާތުގެ ތެރެއިން ވަރަށް ވަރުގަދަ ހަރަކާތްތަކެއް ސްޓްރައިކްގެ ޒައާމަތުގައި އިންތިޒާމު ކުރެވުނެވެ. މިހަރަކާތުގައި ބައިވެރި ބައެއް ފަރާތްތަކުން މިސްކިތްތަކަށް ހަމަލާދޭން ފެށިއެވެ. ހަރަކާތުގައި ބައިވެރިވި ފަރާތްތަކުން އިސްލާމް ދީނާ މެދު އެމީހުންގެ ހިތުގައި އޮތް ރުޅިވެރިކަމުގެ ޝުއޫރުތައް ބޭރު ކުރަމުންދިޔައެވެ.
އެ ހަރަކާތުގެ ތެރެއިން އިސްލާމް ދީނާ މެދު އާންމުގެ ރުޅިވެރިކަމާއި ނަފުތަރުގެ ޝުއޫރުތައް ފާޅުކުރުމަށް ފޯރަމްތައް އިންތިޒާމު ކުރެވުނެވެ. ސްޓްރައިކްގެ ހަރަކާތް ވަރަށް ބޮޑަށް ވައިގައި ހިފައިގެން ދިޔައެވެ. މައްސަލައާ ގުޅިގެން އާންމުން ކަށްކާލެވުނެވެ.
ސްވިޒަލޭންޑްގެ އާންމުންގެ މެދުގައި ސްޓްރައިކްގެ މަގުބޫލުކަން އުތުރި އަރައިގެން ދިޔައެވެ. ނަސާރާއިންގެ މެދުގައި ސްޓްރައިކްވީ، އެމީހުންގެ ހައްގުގައި މަސައްކަތް ކުރާ ހިތްވަރު ގަދަ ފަހުލަވާނެއް ކަމުގައެވެ.
ނަމަވެސް މަންޒަރު ބަދަލުވެގެންދިޔައީ މުސްލިމުންނާ ދެކޮޅަށް ޖަދަލު ކުރެއްވުމަށްޓަކައި އިސްލާމް ދީނުގައި ހުންނާނެކަމަށް އޭނާ ވިސްނައިގެން ހުރި އިންސާނިއްޔަތާ ޚިލާފު ކަންކަމަށް ހިތްވަރުދޭ ވާހަކަތައް ދިރާސާ ކޮށް އާންމުންނަށް ހަމަ ކުރުމަށްޓަކައި ކީރިތި ޤުރުއާން ދިރާސާ ކުރަން ފެއްޓެވި ހިސާބުންނެވެ. ނާތީޖާއަކަށް ވެގެންދިޔައީ އޭނާ އެދީނަކަށް ނިސްބަތްވާ ކްރިސްޓިއަން ނުވަތަ ނަޞާރާ ދީނުން އޭނާއަށް ޖަވާބު ނުލިބޭ އެތަށް ސުވާލަކަށް ޤުރުއާނުން ޖަވާބު ލިބިގެން ދިޔުމެވެ.
ދިރިއުޅުމުގެ ހަގީގަތާ ބެހޭގޮތުން ނަޞާރާ ދީނުން އޭނާއަށް ޖަވާބު ނުލިބޭ އެތަށް ސުވާލަކަށް އިސްލާމް ދީނުން އޭނާއަށް ޖަވާބު ލިބިގެންދިޔައެވެ.
'އަޅުގަނޑުގެ ހިތުގައި ހަގީގީ ދިރިއުޅުމާ ބެހޭ ގޮތުން ޖަވާބު ނުލިބޭ ސުވާލުތަކަކަށް ބުއްދީގެ ޖަވާބު ތަކެއް އިސްލާމް ދީނުން އަޅުގަނޑަށް ލިބިގެން ދިޔަ. ނަމަވެސް އެސުވާލުތަކަކީ ނަޞާރާ ދީނުން އަޅުގަނޑަށް ޖަވާބެއް ނުހޯދުނު ސުވާލުތަކެއް،" ސްޓްރައިކް ބުނެފައިވެއެވެ.
ސްޓްރައިކް ބުނެފައިވަނީ އޭނާއަކީ ބައިބްލް ކިޔަވާ މީހެއް ކަމަށާއި ކޮންމެވެސް ވަރަކަށް ފައްޅިތަކަށް އަޅުކަން ކުރަން ގޮސް އުޅޭ މީހެއް ކަމަށެވެ.
ނަމަވެސް މިއަދު އޭނާއަކީ ބަރާބަރަށް ފަރުޟު ފަސް ނަމާދު އަދާ ކުރައްވާ ކީރިތި ޤުރުއާން ކިޔަވާ ވިދާޅުވާ ބޭފުޅެކެވެ.
އިއްޔެ މިސްކިތްތަކުގެ މުންނާރުތައް ތަޅާލުމަށް ގޮވާލައި ހަރަކާތްތަކެއް ހިންގި ސްޓްރައިކް މިހާރު މަސައްކަތް ކުރައްވަމުން ގެންދަވަނީ މުޅި ޔޫރަޕްގައި ބިނާ ކުރާ އެންމެ ބޮޑު މިސްކިތް ސްވިޒަލޭންޑްގައި ބިނާ ކުރުމަށެވެ.
އިސްލާމްވެ ވަޑައިގެންނެވުމަށްފަހު އޭނާ ވަނީ އެސްވީޕީގައި އޭނާ އަދާ ކުރައްވަމުން ދިޔަ މެންބަރުކަމުން ވަކިވެ ވަޑައިގެންފައެވެ. އިއްޔެ ނަޞާރާއިންގެ ފަހުލަވާނެއް ކަމަށް ލޭބަލް ކުރި ސްޓްރައިކްއަކީ މިއަދު އިސްލާމުންގެ ފަހުލަވާނެކެވެ.
ސްވިޒަލޭންޑްގައި އިސްލާމް ދީން ފެތުރުއްވުމަށް އެންމެ ބޮޑު މަސައްކަތެއް ކުރައްވަމުން ގެންދަވަނީވެސް ސްޓްރައިކްގެ ޒަޢާމަތުގެ ދަށުންނެވެ.
ކީރިތި ގުރުއާނުގައި ހުންނާނެ ކަމަށް އޭނާ ވިސްނައިގެން ހުރި ވާހަކަތައް ދިރާސާ ކޮށް މުސްލިމުންނާ ދެކޮޅަށް ޖަދަލު ކުރުމުގެ ގޮތުން ގުރުއާން ދިރާސަ ކުރެއްވުމަށް ފެއްޓެވި ނަމަވެސް މިއަދު ކީރިތި ޤުރުއާނާ އިސްލާމް ދީން އޭނާ ދިރާސާ ކުރައްވަނީ އިސްލާމް ދީނާ ދެކޮޅަށް ޖަދަލު ކުރާ މީހުންނަށް އިސްލާމް ދީނުގެ ހަގިގަތް ބަޔާން ކުރުމަށެވެ.