21 Jun 2015, 11:18
އެއްގަމު އުޅަނދު ފަހަރުގައި ޓްރެފިކު ސްޓިކާ ޖެހުން ހުއްޓާލައި، ސްޓިކާއަށް ދައްކަން ޖެހޭ ޖޫރިމަނާ މާފުކޮށް ކޮށްދިނުމަކުން ބޭނުންހާ ތަނެއްގައި ޕާކު ކުރުމުގެ ހުއްދައެއް ގާނޫނަކުން ނުދޭނެ ކަމަށް ޕީޕީއެމްގެ ޕާލިމަންޓަރީ ގްރޫޕުގެ ލީޑަރު އަދި ވިލިމާލެ ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު ނިހާނު ހުސައިން މަނިކު ވިދާޅުވެއްޖެ އެވެ.
ސަން އަށް ރޭ ދެއްވި އިންޓަވިއުއެއްގައި ނިހާން ވިދާޅުވީ ސުޓިކާ އަށް ދައްކަން ޖެހޭ ފައިސާ މައާފުކޮށް ސުޓިކާ ޖެހުން ހުއްޓާލައިފި ނަމަ ގަވާއިދާ ހިލާފަށް ޕާކު ކުރާ ވެހިކަލްތައް ގިނަވާނެ ކަމެއް ފުލުހުން ބުނެފައިވާ ކަމަށެވެ. އަދި ފުލުހުން ބުނީ ގަވާއިދާ ހިލާފަށް ޕާކުކުރާ އުޅަނދުތަކުގައި ސްޓިކާ ޖެހުން މަދުކޮށްލުމުން ގަވާއިދާ ހިލާފަށް ޕާކުކުރުން މިހާރު ވެސް އިތުރުވެފައިވާ ކަމަށެވެ.
"ސަން" އާ ވާހަކަ ދައްކަވަމުން ނިހާނު ވިދާޅުވީ ޖޫރިމަނާ މައާފު ކުރުމަކީ "ވަޔަލޭޝަނަށް ލިބޭ ފްރީ ޓިކެޓެއް ނޫން" ކަމަށެވެ. އޭނާ ވިދާޅުވީ ރައްޔިތުންގެ މަޖިލީހަށް ޓްރެފިކް ޖޫރިމަނާގެ އިސްލާހު ވެއްދުމާ އެކު ނަހަމަ ގޮތުގައި ޕާކް ކުރަމުން އަންނަ ކަމަށާއި އެފަދަ ކަންކަން ފާހަގަކުރެވިފައިވާ ކަމަށެވެ.
"ނަމަވެސް ހޮސްޕިޓަލެއްގެ ކުރިމަތީ ޕާކުކޮށްލައި ދޫކޮށްލާ، ނުވަތަ ޕާކު ކުރުންމަނާ ޒޯނެއްގައި ޕާކުކޮށް ބަހައްޓާފައި ދިއުން އެއީ އެކަމަށް ލިބޭ ހުއްދައެއްނޫން. ފުލުހުންނަށް އެފަދަ ކަންކަމަށް ގޮތްތަކެއް ނިންމިގެން ދާނެ މިހާރު ވެސް އަމަލު ކުރަމުން އަންނަ ގޮތަށް. ޓޯ ކުރެވޭނެ ގެންދެވޭނެ. ވެހިކަލުގެ ވެރިފަރާތް ހޯދައިގެން އެ މީހާގެ ލައިސަންސްއާ މެދު ގޮތެއް ނިންމޭނެ. މިހުރީ މިހާރު ވެސް ފުލުހުންނަށް އޮތް ބާރުތައް،" ނިހާނު ވިދާޅުވި އެވެ.
ޕީޕީއެމްގެ ޕީޖީ ގުރޫޕުގެ ލީޑަރު އަދި ވިލިމާލެ ދާއިރާގެ މެމްބަރު އަހުމަދު ނިހާނު ހުސައިން މަނިކު: ސަން ފައިލް ފޮޓޯ
ފުލުހުންގެ ޓްރެފިކް މެނޭޖްމަންޓްގެ ހެޑް، ސުޕްރިންޓެންޑެންޓް އޮފް ޕޮލިސް މުހައްމަދު ދާއޫދު "ސަން" އަށް ވިދާޅުވީ ސުޓިކާ ޖެހުން ފުލުހުން މި ދުވަސްވަރު ހުއްޓާލައިފައި ވުމުން އެހެން މީހަކަށް އެކަމުން ލިބިދާނެ ގެއްލުމަކަށް އުނދަގުލަކަށްނުބަލާ ހިތަށް އެރިހާ ތާކު ޕާކު ކުރަމުން އަންނަ ކަމަށެވެ. ނިހާނު ވިދާޅުވި ފަދައިން ދާއޫދު ވެސް ވިދާޅުވީ ސުޓިކާ ޖެހުން ހުއްޓާ ލުމަކީ ގަވާއިދާ ހިލާފުވާ ފަރާތްތަކަށް ދެވޭ ލައިސަންސެއް ނޫން ކަމަށެވެ.
އެއްގަމު ދަތުރުފަތުރުގެ ގާނޫނަށް ސަރުކާރުގެ ފަރާތުން ގެނެސްފައިވާ އިސްލާހުގެ ބޭނުމަކީ ރާއްޖޭގެ އެއްގަމު ދަތުރުފަތުރުގެ ނިޒާމު ހިންގުން ހަރަދު ކުޑަކުރުމަށް ކަމަށް އެ ބިލުގައި ވަނީ ބުނެފަ އެވެ.
އޭގެ އިތުރުން އެއްގަމު އުޅަނދުފަހަރު މަގުމަތިން ނެގުމުގެ ގާނޫނީ ބާރު މޯލްޑިވްސް ޕޮލިސް ސާވިސް އަށް ދިނުމާއި އެއްގަމު އުޅަނދު ދުއްވުމާއި ޕާކު ކުރުމާ ދެކޮޅަށް އެކަށީގެންވާ ޒަމާނީ ފިޔަވަޅު މި ބިލުގެ ސަބަބުން އެޅިގެންދާނެ ކަމަށް ވެސް ވަނީ ބުނެފަ އެވެ.
އެ ބިލުގައިވާ ގޮތުން ކުރިން ގަވާއިދާ ހިލާފުވުމުގެ ސަބަބުން ޖޫރިމަނާވެފައިވާ ފަރާތްތަކުން ދައްކާފައި ނުވާ ފައިސާ އައު ގާނޫނަށް އަމަލު ކުރަން ފެށުމާ އެކު މައާފުވާނެ އެވެ.