22 Jun 2015, 15:48
އިސްލާމްދީން އިރްޝާދުދޭ ގޮތުގައި މުޅިއިންސާނިއްޔަތަކީ އެއްބަނޑުއެއްބަފާ ބައެކެވެ. އެންމެހައި އާދަމުގެ ދަރީންނަކީ އަރަހުށިމާތްﷲގެ ޢިޔާލުންތަކެއް ފަދަ އެއްބައިވަންތަ ބައެކެވެ. އިމާމު ބައިހަޤީގެ ރިވާޔަތެއްގައިވާ ގޮތުން އިސްލާމްދީނުގެ ނަބިއްޔާ ޞައްލަﷲ ޢަލައިހިވަސައްލަމަ ޙަދީޘް ކުރައްވައިފައި ވެއެވެ. އެންމެހައި އިންސާނުންނަކީ މާތްﷲ ސުބްޙާނަހޫ ވަތަޢާލާގެ ޢިޔާލުން ފަދަ ބައެކެވެ. އެބައިމީހުންގެ ތެރެއިން ﷲގެ ޙަޟުރަތުގައި އެންމެ ލޮބުވެތިކަން ބޮޑީ އެކަލާނގެ ޢިޔާލުންނަށް އެންމެ ބޮޑަށް ހެޔޮކޮށްހިތާ މީހެކެވެ. މުސްލިމުންގެ އަރާހުންނެވި ޝާޢިރެއްކަމުގައިވާ މައުލާނާ އަލްޠާފު ޙުސައިން ޙާލީ އިސްވެދެންނެވި ވާހަކަތައް އޭނާގެ ޅެންބައިތެއްގައި ގެންނަވައިފައިވަނީ މިދަންނަވާ ގޮތަށެވެ.
"ހިދާޔަތާއި ތެދުމަގު ދެއްކެވުމުގެ ފޮތުގެ އެންމެ ފުރަތަމަ ފިލާވަޅަކީ އެންމެހައި އިންސާނުންނަކީ މާތްﷲގެ ޢިޔާލުންކަމެވެ."
ސުނަނު އަންނަސާއީގައި ޒައިދުބިން އަރްޤަމްރަޟިޔަﷲ ޢަންހުގެ އަރިހުން ރިވާވެފައިވެއެވެ. އިސްލާމްދީނުގެ ނަބިއްޔާ ރޭގަނޑުގެ ފަހުބައިގައި ތެދުވެވަޑައިގެން ތަހައްޖުދު ނަމާދު ކުރައްވައެވެ. ތަހައްޖުދު ނަމާދުން ނިމިވަޑައިގެން މާތްﷲއަށް ޒިކުރުކުރެއްވުމާއި ދުޢާކުރެއްވުމުގައި މަޝްޣޫލުވެ ވަޑައިގަންނަވައެވެ. އެކަލޭގެފާނު ކުރައްވާ ޒިކުރުގެ ތެރޭގައި ވިދާޅުވެއެވެ. އޭ މާތްރަސްކަލާކޯއެވެ! ތިމަންކަލޭގެފާނު ހެކިވެވަޑައިގަންނަވަމެވެ. އެންމެހައި އިންސާނުންނަކީ އެއްބަނޑު އެއްބަފާ އަޚުންތަކެކެވެ.
ތަހައްޖުދު ނަމާދުގެ ޙުކުމް ބާވައިލެއްވީ ކައުސާހިބާ ޞައްލަﷲ ޢަލައިހިވަސައްލަމަގެ ރިސާލަތުގެ މައްކީ ދައުރުގައެވެ. އެހެންކަމުން އިތުރު ސާހިބާގެ އިސްވެދެންނެވި އާދަފުޅު ފެށިފައިވާނީ މައްކީ ދައުރުގައެވެ. ޙަދީޘު ފޮތްތަކުން އެނގޭގޮތުގައި އިތުރު ސާހިބާ ތަހައްޖުދު ނަމާދަށް ފަހު ތަފާތު ޒިކުރުތަކަކާއި ދުޢާފުޅުތަކެއް ކުރައްވައި އުޅުއްވިއެވެ. އޭގެ ތެރެއިން އިންސާނީ އެއްބަނޑު އެއްބަފާ ކަމަށް ހެކިވެ ވަޑައިގަތުމުގެ ޒިކުރު ފެށިފައިވަނީ މައްކީ ދައުރުގައެވެ.
އަޅުގަނޑުމެން އެންމެންވެސް ދަންނަ ފަދައިން ކައުސާހިބާގެ ރިސާލަތުގެ މައްކީ ދައުރަކީ އެމާތް ނަބިއްޔާއާއި މުސްލިމުން އަނިޔާވެރިކަމުގެ މާކަނޑެއްގައި ނޭފަތްޕުޅުގެ ކުރި ހިކިނުހިކި ދިޔަ ދުވަސްވަރެވެ. އެބޭކަލުންގެ ތާހިރު ލޭފޮދުން މައްކާގެ ހިލަބިން ފެވިގެންދިޔަ ދުވަސްވަރެކެވެ. ކަންއެހެންހުރުމާ އެކުވެސް ކައުސާހިބާ ޞައްލަﷲ ޢަލައިހިވަސައްލަމަ ރޭގަނޑުގެ ހަމަހިމޭން ވަގުތުގައި ގިނިކަންޏާ ވެވަޑައިގަތުމުން އެއަނިޔާވެރި މުޝްރިކުންގެ މަތީން ހަނދުމަފުޅު ކުރެއްވީ އިންސާނީވަންތަކަމާއި އެއްކިހުނުފަންކަމުގެ ކުލުނުވެރި އިޙްސާސާ އެކުގައެވެ.
މިހާދިޘާއިން އެނގެނީ އިސްލާމްދީން ދެކެން ބޭނުންވާ ނަމޫނާ އިންސާނާއަކީ މީސްތަކުން އޭނާއާ ދުޝްމިނުވެ އޭނާ ދުނިޔެއިން ވަކިކޮށްލަން އުޅޭއިރުވެސް އޭނާގެ ހިތުގައި މީސްތަކުންނާ މެދު އެއްބަނޑު އެއްބަފާ ކަމުގެ ލޯބި އުތުރިއަރާ މީހާކަމެވެ. އޭނާ އެކަނިވާ ހިނދު މާތްﷲގެ ޙަޞްރަތުގައި އެކަމަށް ހެކިވާ މީހާ ކަމެވެ.
އިސްލާމްދީން އިންސާނުންގެ ހިތުގައި އުތުރިއެރުން އެދެނީ އޯގާވެރިކަމެވެ. ކުލުނާއި ހަންހާރަވެތިކަމެވެ. އެހެންކަމުން އިސްލާމްދީން ޚިޔާރުކޮށްގެން ހުންނަ ކޮންމެ މީހަކުވެސް ވާންޖެހޭނީ އިންސާނިއްޔަތަށް ލޯބިކުރާ މީހަކަށެވެ. އަނެކުންނާ މެދު ރަޙްމާއި ހަމްދަރުދީން ފުރިފައިވާ ހިތެއްގެ ވެރިޔަކަށެވެ.