25 Jun 2015, 16:51
ނައިބު ރައީސް ޑރ. މުހައްމަދު ޖަމީލް އަހުމަދު ރާއްޖެއިން ބޭރަށް ފުރައިވަޑައިގެންފި އެވެ.
"ސަން"އަށް އެނގިފައިވާ ގޮތުގައި މިއަދު މެންދުރުފަހުގެ ވަގުތެއްގައި ނައިބު ރައީސް ރާއްޖެއިން ބޭރަށް ފުރާވަޑައިގަތީ ބޭސްފަރުވާ އަކަށެވެ. ނަމަވެސް އެމަނިކުފާނު ވަޑައިގަތީ ކޮން ގައުމަކަށް ކަމެއް އެނގަފައެއް ނުވެ އެވެ.
ރައީސް އޮފީހުގެ ތަރުޖަމާނު އިބްރާހީމް މުއާޒު އަލީ ވިދާޅުވީ ނާއިބު ރައީސް ފުރާވަޑައިގަތީ ރައީސްގެ ހުއްދައާ އެކު ކަމަށެވެ.
ނައިބު ރައީސް ކަމުގެ މަގާމުން ޑރ. ޖަމީލް ވަކިކޮށް އެ މަގާމަށް ޓޫރިޒަމް މިނިސްޓަރު އަހްމަދު އަދީބު އަބްދުލް ޣަފޫރު އައްޔަންކުރަން ނިންމާފައިވާ ކަމަށް ޕީޕީއެމްގެ ޕާލަމެންޓްރީ ގްރޫޕްގެ ބައެއް މެމްބަރުން ވަނީ ވިދާޅުވެފަ އެވެ.
ބާރަށު ދާއިރާގެ މެމްބަރު އިބްރާހީމް ސުޖާއު ރޭ ވިދާޅުވީ ޖުލައި 26 އައުމުގެ ކުރިން އަދީބު ނައިބު ރައީސް ކަމުގެ މަގާމާ ހަވާލުވާނެ ކަމަށެވެ.
ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ހުސައިން މަނިކު ވިދާޅުވެފައި ވަނީ ނައިބު ރައީސް ކަމުގެ މަގާމަށް އެހެން ބޭފުޅަކު އައްޔަން ކުރާނަމަ، އެކަމަށް އެންމެ އެކަށީގެންވާ ބޭފުޅަކީ ޓޫރިޒަމް މިނިސްޓަރު އަދީބު ކަމަށެވެ.
ޕީޕީއެމްގެ މަޖިލީސް މެމްބަރުން މިގޮތަށް ވިދާޅުވާއިރު، ރައީސުލްޖުމްހޫރިއްޔާ އަދި ނައިބު ރައީސް ކަމަށް ކުރިމަތިލެވޭ އުމުރަކީ 30 އަހަރާއި 65 އަހަރާ ދެމެދު ކަމަށް ކަނޑައަޅައި ރައްޔިތުންގެ މަޖިލީހުން ވަނީ ގާނޫނު އަސާސީއަށް އިސްލާހު ގެނެސްފަ އެވެ. އަދީބަށް މިހާރު ވަނީ 34 އަހަރު ފުރިފަ އެވެ.
ނައިބު ރައީސް ކަމަށް އަދީބު އައްޔަން ކުރެވޭނީ، މިހާރު އެ މަގާމުގައި ހުންނެވި ޑރ. ޖަމީލުގެ މައްޗަށް މަޖިލީހުން އިތުރުބާރު ނެތް ކަމުގެ ވޯޓެއް ނެގުމަށްފަހުގަ އެވެ. ނައިބު ރައީސް މަގާމުން ވަކިކުރެވޭނީ މަޖިލީހުގެ ޖުމްލަ އަގުލަބިއްޔަތުގެ ތިން ބައިކުޅަ ދެ ބައި މެމްބަރުންގެ އަގުލަބިއްޔަތުންނެވެ. އެއީ 85 މެމްބަރުންގެ ތެރެއިން 57 މެމްބަރުންގެ އަގުލަބިއްޔަތެވެ.