27 Jun 2015, 12:12
ދަތުރުވެރިންގެ މާރުކޭޓް މަރާމާތުކުރަންވެގެން އެތަނުގައި ހިންގަމުން އައި ގޮޅިތައް މަސްމާރުކޭޓް ސަރަހައްދަށް ބަދަލުކުރުމަށް ފަހު ދަތުރުވެރިންގެ މާރުކޭޓަށް އަނެއްކާ ވެސް އެ ގޮޅިތައް ބަދަލުކޮށްފި އެވެ.
"މިހާރު އަޅުގަނޑުމެން މި ވަނީ ހުރިހާ ގޮޅިއެއް [ވަގުތީ ގޮޅިތައް]ބަދަލުކޮށްފައި ދަތުރުވެރިންގެ މާރުކޭޓަށް،" ހައުސިން މިނިސްޓްރީގެ ޑެޕިއުޓީ މިނިސްޓަރު ހަސަން ޒަރީރު ވިދާޅުވި އެވެ.
ވަގުތީ ގޮޅިތައް ދަތުރުވެރިންގެ މާރުކޭޓަށް ބަދަލުކުރިނަމަވެސް ބައެއް ފަރާތްކުން ދަނީ އެ ސަރަހައްދުގައި މުދާ ބަހައްޓައިގެން ވިއްކަމުންނެވެ. އެހެންނަމަވެސް އެއީ އެއްވެސް ހުއްދައެއް ލިބިގެން ވިޔަފާރި ކުރާ ފަރާތްތަކެއް ނޫން ކަމަށް ހައުސިން މިނިސްޓްރީން ބުނެ އެވެ.
މިއަހަރު ރަމަޟާން މަހަށް އަމާޒުކޮށްގެން ދަތުރުވެރިންގެ މާރުކޭޓަށް ވަނީ ބޮޑެތި ބަދަލުތަކެއް ގެނެސްފަ އެވެ.
ދަތުރުވެރިންގެ މާރުކޭޓް ބޭރު: މާރުކޭޓަށް ވަނީ ބޮޑެތި ބަދަލުތަކެއް ގެނެސްފައި --- ސަން ފޮޓޯ: އަހުމަދު ޝަރުވާން
ދަތުރުވެރިންގެ މާރުކޭޓަކީ މާލޭގެ މުހިންމު ސަރަހެއްދެއްގައި ހުރިތަނަކަށް ވާތީ އެތަން މަރާމާތުކޮށް އަލުން ހަދާފައި ވަނީ މާލޭގެ މަލަމައްޗަށް ވެސް ރީތިކަން އަންނަ ގޮތަށް ކަމަށް ދަތުރުވެރިންގެ މާރުކޭޓް ހުޅުވުމުގެ ރަސްމިއްޔާތުގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވި އެވެ.
އިގްތިސާދީ ގޮތުންނާއި އިޖްތިމާއި ގޮތުން މުހިންމުކަންތައްތަކެއް މާރުކޭޓްގެ ސަބަބުން ހާސިލުވާނެ ކަމަށް އޭނާ ވިދާޅުވި އެވެ.
ދަތުރުވެރިންގެ މާރުކޭޓްގައި ވަނީ ވަށައިގެން ހަތަރު ފޫޓްގެ ފާރެއް ލުމަށް ފަހު އޭގެ މަތިން ފަސް ފޫޓްގެ އެލްމިނިއަމް ފެންސެއް ޖަހާފައެވެ. ދަތުރުވެރިންގެ މާރުކޭޓްގައި 160 ގޮޅި ހުރެ އެވެ.
ދަތުރުވެރިންގެ މާރުކޭޓްގެ މަސައްކަތްކޮށްފައި ވަނީ ސިފައިންނެވެ.
ދަތުރުވެރިންގެ މާރުކޭޓް: ދަތުރުވެރިންގެ މާރުކޭޓަށް މިހާރު ވަނީ ލޯކަލް މާރުކޭޓް ސަރަހައްދުގައި ހުރި ގޮޅިތައް ބަދަލުކޮށްފައި --- ސަން ފޮޓޯ: އަހުމަދު ޝަރުވާން