12 Jul 2015, 11:50
ރައްޔިތުންގެ މަޖިލީހުގެ ޖަލްސާއެއް ބާއްވާނެ ވަކި ތާރީހެއް ކަނޑަނާޅައި މަޖިލީހުގެ ޖަލްސާތައް މެދުކަނޑާލައިފި އެވެ.
މަޖިލިސް މެދުކަނޑާލައިފައިވާ ކަމަށް މެމްބަރުންނަށް މަޖިލީހުގެ ރައީސް ވަނީ އެސްއެމްއެސް އަކުން އަންގާފައި އެވެ.
ރައްޔިތުންގެ މަޖިލީހުގެ މެމްބަރުންނަށް އެ އިދާރާގެ ޓޭބަލް އޮފީހުން ފޮނުވާފައިވާ މެސެޖުގައި ވަނީ ދެން މަޖިލީހުގެ ޖަލްސާއެއް އޮންނާނެ ދުވަހެއް ފަހުން އަންގާނެ ކަމަށެވެ.
"އަދި މި ފުރުސަތުގައި އުފާވެރި ފިތުރު އީދުގެ ތަހުނިޔާ އަރިސް ކުރައްވާ ކަމުގައި ދަންނަވަން މަޖިލީހުގެ ރައީސް ވިދާޅުވި އެވެ." މަޖިލީހުގެ މެމްބަރުންނަށް މަޖިލީހުގެ ޓޭބަލް އޮފީހުން ފޮނުވާފައިވާ މެސެޖުގައިވެ އެވެ.
މަޖިލީހުގެ ޖަލްސާތައް މެދުކަނޑާލައިފައިވާ ވަކި ސަބަބެއް މެސެޖުގައި ހާމަކޮށްފައި ނެތެވެ.
މަޖިލީހުގެ ޖަލްސާތައް މެދުކަނޑާލައިފައި މި ވަނީ މި ނައިބު ރައީސް ޑރ. މުހައްމަދު ޖަމީލު އަހުމަދުގެ އިތުބާރު ނެތް ކަމުގެ ވޯޓެއް މަޖިލީހުގައި ނެގުމަށް ސަރުކާރަށް ނިސްބަތްވާ ޕާޓީގެ މެމްބަރުން ތައްޔާރުވެފައި ވަނިކޮށެވެ.
ނާއިބު ރައީސްގެ އިތުބާރު ނެތް ކަމުގެ ނޯޓިސް ޖަމީލަށް ފޮނުވާފައި ވަނީ މިދިޔަ މަހު 30 ވަނަ ދުވަހު އެވެ. ގާނޫނު އަސާސީގެ 100 ވަނަ މާއްދާގެ (ރ)ގައި ބުނެފައި ވަނީ އެފަދަ މައްސަލައަކާ މެދު މަޖިލީހުގައި ބަހުސް ފެށުމުގެ މަދުވެގެން 14 ދުވަސް ކުރީން ރައީސުލްޖުމްހޫރިއްޔާގެ ނައިބަށް އެކަން އަންގަންވާނެ ކަމަށެވެ.