31 Jul 2015, 18:18
ހއ. ތަކަންދޫ އަރުތަ ސްޕޯޓްސް އިން މާލޭގައި ދިރިއުޅޭ އެ ރަށު ޒުވާނުންނަށް ހާއްސަކޮށް 'ޔުނިޓީ ކަޕް'ގެ ނަމުގައި ފުޓްބޯޅަ މުބާރާތެއް ފަށައިފި އެވެ.
އަރުތަ ސްޕޯޓްސްގެ ނައިބު ރައީސް ޙަސަން މުޙައްމަދު ސަން އަށް ވިދާޅުވީ ޔުނިޓީ ކަޕް ބާއްވަމުން އަންނަތާ މިއީ ހަތަރު ވަނަ އަހަރު ކަމަށާއި މިދިޔަ ތިން އަހަރު މުބާރަތް ތަކަންދޫގައި ބޭއްވި ނަމަވެސް، މި އަހަރުގެ މުބާރާތް މާލޭގައި ބާއްވަން ނިންމީ ތަކަންދޫގެ އާބާދީގެ ބޮޑު ބައެއް މާލޭގައި ދިރި އުޅޭތީ ކަމަށެވެ.
ހަސަން ވިދާޅުވީ މި އަހަރުގެ މުބާރާތުގައި މާލޭގެ ބައެއް ޓީމްތަކަށް ވެސް ދައުވަތު ދޭން ވިސްނިން ކަމަށާއި ނަމަވެސް މުބަރަތުގެ ގަވައިދުގައި އެކަމަށް ފުރުސަތު ނުލިބޭތީ މި އަހަރު އެހެން ޓީމްތަކަށް ބައިވެރިނުވެވުނީ ކަމަށެވެ.
އޭނާ އިތުރަށް ވިދާޅުވީ އަންނަ އަހަރު ބާއްވާ ފަސް ވަނަ މުބާރާތުގައި، ގަވައިދަށް ބަދަލު ގެނެސްގެން އެހެން ޓީމްތަކަށް ވެސް މުބަރަތުގައި ބައިވެރިވުމުގެ ފުރުސަތު ދޭނެކަމަށެވެ.
މި އަހަރުގެ މުބާރާތުގައި ހަ ޓީމް ވާދަކުރާ އިރު އެ ހަޓީމަކީ ވެސް ތަކަންދޫއަށް ނިސްބަތްވާ ޓީމްތަކެވެ.
ދިރާގާއި ކޮކާކޯލާއާއި ރެޑްވޭވް އިން މުބާރާތް ސްޕޮންސަކޮށްފައިވާ އިރު މުބާރަތުގެ އިންތިޒާމްތަކަށް 35،000 ރުފިޔާ ހޭދަވެފައިވާނެ ކަމަށް އަންދާޒާ ކުރެވޭ ކަމަށް ހަސަން ވިދާލުވި އެވެ.
ކުޅިވަރު އެކުވެނީގެ ޓާފް ދަނޑު އެކެއްގައި ކުރިއަށްދާ މިމުބާރަތުގައި ރެފްރީކަން ކުރަމުން ގެންދަނީ އެފްއޭއެމްގެ ރެފްރީންނެވެ.
މުބާރާތް އިއްޔެ ފަށާފައިވާ އިރު މުބާރާތް ހުޅުވައިދެއްވީ ތަކަންދޫ ހިމެނޭ ބާރަށު ދާއިރާގެ މެންބަރު އިބްރާހިމް ސުޖާއު އެވެ.