03 Aug 2015, 22:41
ސަރުކާރާއި ރައްޔިތުން ހިއްސާވާ ވިޔަފާރި ކުންފުނި، އެސްޓީއޯއަށް މި އަހަރުގެ ދެވަނަ ކުއާޓަރުގެ ފައިދާގެ ގޮތުގައި 88 މިލިއަން ރުފިޔާ ލިބިފައިވާ ކަމަށް އެ ކުންފުނީގެ ތަފާސް ހިސާބުތަކުން ދައްކައިފި އެވެ.
އެސްޓީއޯ އިން އާންމުކޮށްފައިވާ ކުއާޓާ ރިޕޯޓު ދައްކާ ގޮތުން އެ ކުންފުންޏަށް ވަނީ މި އަހަރުގެ ދެވަނަ ކުއާޓަރުގައި ފައިދާގެ ގޮތުގައި ތިންސަތޭކަ ތިން މިލިއަން އެކާވީސް ހާސް ހަސަތޭކަ ތޭރަ ރުފިޔާ ލިބިފަ އެވެ. ޓެކުހަށް ކެނޑުމަށްފަހު ފައިދާއަކީ 88 މިލިއަން ރުފިޔާއެވެ.
މި އަހަރުގެ ފުރަތަމަ ކުއާޓަރުގައި އެ ކުންފުންޏަށް ސާފު ފައިދާގެ ގޮތުގައި 77 މިލިއަން ރުފިޔާ ލިބިފައި ވެއެވެ.
މި އަހަރުގެ ދެވަނަ ކުއާޓަރުގައި އެ ކުންފުންޏަށް އޮޕަރޭޓިން ޕްރޮފިޓްގެ ގޮތުގައި 136.5 މިލިއަން ރުފިޔާ ލިބިފައިވާ އިރު އޮޕަރޭޓިން ޕްރޮފިޓްގެ ގޮތުގައި މި އަހަރު ފުރަތަމަ ކުއާޓަރުގައި އެ ކުންފުންޏަށް 117.2 މިލިއަން ރުފިޔާ ވަނީ ލިބިފައެވެ.
ފާއިތުވި އަހަރު ލިބުނު ފައިދާގެ ތެރެއިން ހިއްސާގެ ފައިދާގެ ގޮތުގައި ހިއްސާ އަކަށް 76 ރުފިޔާ ވަނީ ބަހައިފައެވެ. މިއީ 2013 ވަނަ އަހަރުގެ ހިއްސާގެ ފައިދާގެ ގޮތުގައި ބަހަން ކަނޑައެޅި 24 ރުފިޔާއަށް ވުރެ ތިން ގުނަ ބޮޑު އަދަދެކެވެ.
އެސްޓީއޯއަށް ފާއިތުވި އަހަރު ސާފު ފައިދާގެ ގޮތުގައި 480 މިލިއަން ރުފިޔާ ލިބިފައިވެ އެވެ.