08 Aug 2015, 17:27
ރާއްޖޭގެ މިނިވަންކަމަށް ޖިހާދު ކުރެއްވި އުތީމު ބޮޑުތަކުރުފާނު ދަތުރުކުރެއްވި ކަޅުއޮށްފުއްމި އަލުން ބަނުމުގެ ގޮތުން މިއަދު ފަށަން ބަހައްޓައިފިއެވެ.
ހދ. ނޭކުރެންދޫގައި ކުރަމުންދާ އެ މަސައްކަތުގެ މައުލޫމާތު ދެއްވަމުން އެކަން ހަވާލުކޮށްފައިވާ މެރިޓައިމް އެންޑް އަންޑަ ވޯޓާ ހެރިޓޭޖްގެ އިސްވެރިއެއް ކަމަށްވާ މުހައްމަދު ހަލީމް "ސަން"އަށް މިއަދު ވިދާޅުވީ ކަޅުއޮއްފުންމި ބަނުމުގެ ގޮތުން ނޭރުކުރެންދޫގެ އިސްވެރިންނާއި އެ ރަށު ކިޔަވާ ކުދިން ބައިވެރިކޮށްގެން މިއަދު ތިން ބުރި ފަށަން ބަހައްޓާފައިވާ ކަމަށެވެ. ކަޅުއޮށްފުންމި ބަންނަނީ 51 ފޫޓް ދިގުކޮށެވެ.
ކަޅުއޮށްފުންމި ބަނުމަށް ފަށަން ބަހައްޓަނީ-- ސަން ފޮޓޯ: އަޒްމީތު
"އެއް މައްޔަލުގެ ބޭރުން އަނެއް މައްޔަލުގެ އެތެރެއިން އިންނާނީ 51 ފޫޓް ހަތަރު އިންޗި. އެއީ 22 ރިޔަން 22 އަނގުން،" ހަލީމް ވިދާޅުވި އެވެ.
ހަލީމް ވިދާޅުވީ މާދަމާއިން ފެށިގެން އޮންނާނީ އެ ދޯނީގެ މައްޔާ ބެހެއްޓުމުގެ މަސައްކަތް ކަމަށާއި އަންނަ އޮކްޓޯބަރު މަހު 8 ވަނަ ދުވަހު އެ ދޯނީގެ މަސައްކަތް ނިމޭނެ ކަމަށް ބެލެވޭ ކަމަށެވެ.
ކަޅުއޮށްފުއްމިއަކީ ޕޯޗްގީޒުންގެ އަތުން ރާއްޖެ ސަލާމަތް ކުރުމަށްޓަކައި އުތީމް ބޮޑުތަކުރުފާނުގެ ލަފަޔަށް ބަނދެ ރާއްޖެ މިނިވަން ކުރުމަށް ބޭނުން ކުރި ދުވެލި ބާރު އޮޑިއެވެ.
އެ އޮޑި އަލުން ބަނުމުގެ މަސައްކަތް ކުރުމާއި ދަތުރުތަކަށް ދޭން ޖެހޭ ފައިސާ އާއި ވަޑިންނަށް އަދި އެހެން ގޮތް ގޮތުން ދޭން ޖެހޭ ހަރަދުތަކަށް ޖުމްލަ 1،500،000 ރުފިޔާއަށް އަރައެވެ.