11 Aug 2015, 17:53
ބޮލީވުޑް ސުޕަސްޓާ އަދި އަލިފުދާލުގެ "ގާލް ޗައިލްޑް" އެމްބެސެޑާ އަމީތާބް ބައްޗަން އެނާގެ ފޭނުންނަށާއި ފޮލޮވާޒް އަށް ސޯޝަލް މީޑިއާ މެދުވެރިކޮށް އުފާވެރި އަންހެންދަރިންގެ ހަފުތާއަށް މަރުހަބާ ކިޔައި އަންހެންދަރިންގެ މުހިންމު ކަމުގެ ވާހަކަ ދައްކައި އަންހެންދަރިންނަކީ މައިންބަފައިންނަށް ލިބޭ ފަޚުރެއް ކަމުގައި ބުނެފިއެވެ.
މާތްﷲ ސުބުހާނަތޫ ވަތަޢާލާ ވަނީ އަމީތާބް ބައްޗަން އަށް އަންހެން ދަރިއެއް ކަމުގައިވާ ޝްވެތާ އާއި ދެ ކާފަ އަންހެންދަރިން ކަމުގައިވާ ނަވްޔާ ނަވޭލީ އާއި އާރަދްޔާ މިންވަރު ކުރައްވާފައެވެ.
އިންޑިއާ ސަރުކާރުން ހާމަކޮށްފައިވާ ގޮތުގައި ކޮންމެ ދުވަހަކު އެ ގައުމުގައި 2،000 އަންހެންކުދިން ރަހިމުގައި ނުވަތަ ވިހެއުމާ އެކު މަރާލެވެއެވެ. އެ ގައުމުގެ ބައެއް ހިސާބުތަކުގައި އަންހެންދަރިން ބެލެވިގެންވަނީ މައިންބަފައިންނަށް ލިބޭ ބަދުނަސީބެއްގެ ގޮތުގައެވެ.
ނަމަވެސް އަމީތާބު ބުނާގޮތުގައި އަންހެންދަރިންނަކީ މައިންބަފައިންނަށް ލިބޭ ބަދުނަސީބެއް ނޫނެވެ. އަންހެން ދަރިއެއް ލިބުން އެއީ ދިހަ ފިރިހެންދަރިން ލިބުންފަދަ ކަމެކެވެ.
އޭނާ އަދި ބުންޏެވެ،"އަންހެންދަރިން އެއީ ވަރަށް ހާއްސަ ބައެއް. އަންހެންދަރިއެއް އަތުގަ ހިފާލާނީ ކުޑަ ހިނދުކޮޅަކަށް، އެކަމަކު މުޅި އުމުރަށް ހިތުތެރޭގައި އެހަނދާންތައް ދެމިހުންނާނެ. މި ހަފްތާ މިއީ އަންހެންދަރިންގެ ހަފުތާ. ތިއީ އަންހެންދަރިއެއްނަމަ ނޫނީ ދިރިއުޅުމަށް ހިތްވަރެއް ލިބޭ ފަދަ އަންހެންދަރިއެއް ހުރިނަމަ، އަދި އެ އަންހެންދަރިފުޅު ދެކެ އަމިއްލަ ފުރާނަފަދައިން ލޯބިވާނަމަ، އަދި އަންހެންދަރިއަކަށް ވުމުން ނުވަތަ އަންހެންދަރިއެއް ހުރުމުން ފަހުރުވެރިވާނަމަ މި އެހެން އަންހެންދަރިން ތިބޭ މީހުންނަށް ނޫނީ އެހެން އަންހެންދަރިންނނާ ހިއްސާ ކުރޭ. އަހަރެން މި ހިއްސާ ކުރީ. އަންހެންދަރިންނަކީ ނިއުމަތެއް."
އަމީތާބް ބައްޗަން ކައިވެނި ކޮށްގެން އުޅެނީ ފިލްމީތަރި ޖާޔާ ބައްޗަން އާ އެވެ. އެދެމަފިރިންނަށް ޝްވެތާ ގެ އިތުރުން ފިރިހެން ދަރިއެއް ކަމުގައިވާ އަބީޝޭކް ބައްޗަން ވެސް ހުރެއެވެ. އަބީޝޭކް އިނދެގެން އުޅެނީ ކުރީގެ ރީތީގެ ރާނީ، އަޑި ބޮލީވުޑްގެ މަޝްހޫރު ފިލްމީތަރި އައިޝްވަރިއާ ރާއި އާއެވެ.