16 Aug 2015, 12:48
އާބާދީގައި 30،000 އަށް ވުރެ ގިނަ މީހުން ދިރިއުޅޭ ހުޅުމާލޭ ހޮސްޕިޓަލުގެ ހޭނައްތާ ޑޮކްޓަރު ޗުއްޓީއަށް ދިއުމުން ހަފްތާގެ ދެ ދުވަސް ފިޔަވައި އެހެން ދުވަސްތަކުގައި ވިހަންދާ މީހުންނާއި އޮޕަރޭޝަންތައް ކުރުމަށް މީހުން މާލެ ފޮނުވަން ފަށައިފި އެވެ.
ހުޅުމާލޭ ހޮސްޕިޓަލްގެ ޑިރެކްޓަރު އަހުމަދު ޝާކިރު މިއަދު ސަން އަށް ވިދާޅުވީ، އެ ހޮސްޕިޓަލުގައި ހުންނަ ހަމައެކަނި ހޭނައްތާ ޑޮކްޓަރު މިދިޔަ ހުކުރު ދުވަހު "އެމަޖެންސީ" 10 ދުވަހުގެ ޗުއްޓީއަކަށް ގޮސްފައިވާ ކަމަށެވެ. އެޑޮކްޓަރު އެނބުރި އަންނަންދެން ކޮންމެ އާދިއްތަ ދުވަހަކާއި ބުދަ ދުވަހެއް ފިޔަވާ އެހެން ދުވަސް ދުވަހު އެ ހޮސްޕިޓަލުގައި ހޭލައްތައިގެން އެއްވެސް އޮޕަރޭޝަނެއް ނުކުރެވޭނެ ކަމަށް ޝާކިރު ވިދާޅުވި އެވެ.
"ދެ ދުވަހަކު ވަޑައިގަންނަވާނެ [ހުޅުމާލޭ ހޮސްޕިޓަލަށް] އައިޖީއެމްއެޗްގެ [ހޭނައްތާ] ޑޮކްޓަރުން، އެހެން ނަމަވެސް އެމަޖެންސީ ކޭސްޓަކުގައި ވަޑައިގަންނަވަން ޖެހޭނީ މިވަގުތަށް ވަގުތީ ގޮތުން އައިޖީއެމްއެޗަށް ނޫނީ އެހެން ތަނަކަށް." ޝާކިރު ވިދާޅުވި އެވެ.
ހުޅުމާލޭގައި މިހާރު ހޭނައްތާ އެއް ޑޮކްޓަރު ހުރި ނަމަވެސް ވަރަށް އަވަހަށް ހޭނައްތާ އިތުރު ޑޮކްޓަރެއް ލިބޭނެ ކަމަށް ވެސް ޝާކިރު ވިދާޅުވި އެވެ.
މިއަހަރުގެ ފެބްރުއަރީ މަހުގެ ތެރޭގައި ވެސް ވަނީ އެހޮސްޕިޓަލުގެ ހޭނައްތާ ޑޮކްޓަރު ޗުއްޓީއަށް ދިއުމުން އޮޕަރޭޝަންތައް ކުރުމަށާއި ވިހެއުމަށް މާލެ ފޮނުވާފަ އެވެ.