17 Aug 2015, 20:41

ތައިލޭންޑުގެ ވެރިރަށް ބެންކޮކްގައި މިއަދު ގޮށްވާލި ބާރުގަދަ ބޮމުގެ ހަމަލާގައި އެއްވެސް ދިވެއްސަކަށް ގެއްލުމެއް ލިބިފައިވޭތޯ ވަރަށް ކައިރިން ބަލަމުން އަންނަކަމަށް މިނިސްޓްރީ އޮފް ފޮރިން އެފެއާޒުން ބުނެފިއެވެ.

ފޮރިން މިނިސްޓްރީގެ އޮފިޝަލަކު މިރޭ ސަންއަށް ވިދާޅުވީ، ބެންކޮކް ބޮމުގެ ހާދިސާގައި އެގައުމުގައި ތިބި ދިވެހީންގެ ތެރޭން އެއްވެސް މީހަކަށް ގެއްލުމެއް ލިބިފައިވާ ކަމުގެ މައުލޫމާތު އަދި މިހާތަނަށް ލިބިފައި ނުވާ ކަމަށެވެ.

"އަޅުގަނޑުމެން މިދަނީ ތައިލެންޑުގައި ހުންނަ މޯލްޑިވްސް އޮނަރަރީ ކޮންސަލް އޮފީސް މެދުވެރިކޮށް، ބެންކޮކް ބޮމުގެ ހަމަލާގައި އެއްވެސް ދިވެއްސަކަށް އެއްވެސް ވަރެއްގެ ގެއްލުމެއް ލިބިފައިވޭތޯ ބަލަމުން. އަދި މިހާތަނަށް އެފަދަ އެއްވެސް މައުލޫމާތެއް ނުލިބޭ. މައުލޫމާތު ލިބުނު ވަރަކަށް އަޅުގަނޑުމެން ހާމަކުރަމުން ގެންދާނަން،" ފޮރިން މިނިސްޓްރީގެ އޮފިޝަލް ވިދާޅުވިއެވެ.

ބެންކޮކްގައި މިއަދު ބޮމުގެ ހަމަލާދިން ސަރަހައްދު -- ފޮޓޯ: އަލް ޖަޒީރާ

ފޮރިން މިނިސްޓްރީން ކޮށްފައިވާ ޓްވީޓެއްގައި ބުނެފައިވަނީ، ބެންކޮކްގައި ދިރިއުޅޭ ދިވެހީން، އެތަނުގައި ހުންނަ ރާއްޖޭގެ ކޮންސަލް އޮފީހަށް ގުޅަން ބޭނުންނަމަ 0066818991566 ނަންބަރުން މރ. ނޮރޮންގޮޕޮންއާ ގުޅޭނޭ ކަމަށެވެ.

ބެންކޮކްގެ މެދުތެރޭ ހިސާބުގަނޑެއްގައި ހުރި، ހިންދޫންނާއި ބުދުދީނުގެ މީހުން އަޅުކަންކުރާ "އެރަވަން ޝްރައިން" ކައިރީގައި ތައިލޭންޑް ގަޑިން ހަވީރު 7:10 ކަންހާއިރު ދިން ބާރުގަދަ ބޮމުގެ ހަމަލާގައި މަދުވެގެން 18 ވަރަކަށް މީހުން މަރުވެ ގިނަ އަދަދެއްގެ ބަޔަކަށް ސީރިއަސް ޒަޚަމްތަކެއް ލިބިފައިވާކަމަށް އެގައުމުގެ މީޑިއާތަކާ ހަވަލާދީ ސީއެންއެންގައި ބުނެފައި ވެއެވެ. އަދި ބޮންގޮއްވާލި ސަރަހައްދުގައި އިންސާނުންގެ ހަށިގަނޑުގެ ބައިތައް ބުރައިގެންގޮސްފައިވާ ކަމަށްވެސް ރިޕޯޓުތައް ބުނެއެވެ.

ބޮމުގެ ހަމަލާގައި ޒަޚަމްވި މީހުންނަށް ފަރުވާދިނުމާއި މަރުވެފައިވާ މީހުންގެ ހަށިގަނޑުތައް ހޯދުމުގެ މަސައްކަތް ކުރިއަށްދަނީ -- ފޮޓޯ: ބީބީސީ

ތައިލެންޑުގެ ވިޔަފާރީގެ ވެސް މައި މަރުކަޒު ކަމަށްވާ ބެންކޮކްގެ މަޝްހޫރު ސެންޓްރަލް ޗިޑްލޮމް މޯލް ކައިރީގައި ބޮމުގެ އެހަމަލާ ދީފައިވަނީ، ސައިކަލްގައި ބޮން ހަރުކޮށްގެން ކަމަށް ލަފާކުރެވޭ ކަމަށް އެގައުމުގެ ފުލުހުން ވަނީ ބުނެފައެވެ.

ގިނަ އަދަދެއްގެ ފަތުރުވެރީން ޒިޔާރަތްކުރާ އެ ސަރަހައްދުގައި ދިން ހަމަލާގައި މަރުވި މީހުންގެ ތެރޭގައި ބޭރުގައުމުތަކުގެ ގިނަ އަދަދެއްގެ މީހުން ހިމެނޭކަމަށް ތައިލޭންޑުގެ ލޯކަލް ޗެނަލްތަކުން ބުނެއެވެ. އެހެން ނަމަވެސް އެއީ ކޮންބައެއް ކަމާއި، ކިހާ އަދަދެއްގެ ބައެއްކަން ސާފުކުރެވިފައި ނުވާކަމަށް ވެއެވެ.

ބެންކޮކް ބޮމުގެ ހަމަލާގެ ޒިންމާ އަދި އެއްވެސް ފަރާތަކުން އުފުލާފައި ނުވާއިރު، ތައިލޭންޑުގެ ފުލުހުންގެ ތަރުޖަމާނަކު ވިދާޅުވެފައި ވަނީ، އެ ހަމަލާ އަމާޒުކޮށްފައި ވަނީ، އެތަނަށް ޒިޔާރާތްކުރާ ފަތުރުވެރީންނަށް ކަމަށް ވަރަށް ބޮޑަށް ބެލެވޭ ކަމަށެވެ.

ބޮމުގެ ހަމަލާދިން ސަރަހައްދު --

ބެންކޮކް ގައި މިއަދު ބޮމުގެ ހަމަލާ ދިން ރަޗަޕްރަސޮންގް އިންޓަރސެކްޝަން އަކީ، އެގައުމުގައި މިފަހަކަށް އައިސް ބާއްވަމުން އަންނަ އެންމެ ބޮޑެތި ސިޔާސީ އެއްވުންތަކާއި މުޒާހަރާތަކަށް މީހުން ޖަމާވާ ސަރަހައްދެވެ. އަދި އެ ސަރަހައްދަކީ ނޭޝަނަލް ޕޮލިސް ހެޑްކުއާޓާޒްއާއި ޕޮލިސް ހޮސްޕިޓަލާވެސް ވަރަށް ކައިރީގައި ހުރި ތެނެއް ކަމަށް ވުމުން ސަރަހައްދު ބަންދުކޮށް ސަލާމަތީ ކަންކަން އިތުރަށް ވަރުގަދަކޮށްފައި ވާކަމަށް ރިޕޯޓުތައް ބުނެއެވެ.

ބެންކޮކަކީ ވިޔަފާރިއަށާއި ބޭސްފަރުވާއަށާއި ޗުއްޓީހޭދަކޮށްލުން ފަދަ ކަންކަމުގައި ގިނަ އަދަދެއްގެ ދިވެހީން ވަރަށް ގިނައިން ދާ ތަނެކެވެ.