26 Aug 2015, 01:33
އެންޓި-ކޮރަޕްޝަން ކޮމިޝަން (އޭސީސީ)ގެ އިންވެސްޓިގޭޝަން އޮފިސަރުންނަށް ޚާއްސަކޮށްގެން ކުރިއަށް ގެންދާ ތިންވަނަ އިންވެސްޓިގޭޝަން ޓްރެއިނިން ޕްރޮގްރާމް ފަށައިފި އެވެ.
އޭސީސީގައި މިމަހުގެ 25 އިން 29 އަށް ކުރިއަށް ގެންދާ ތަމްރީން ޕްރޮގްރާމް ފައްޓަވައި ދެއްވީ ކޮމިޝަންގެ ނައިބު ރައީސް މުއައްވިޒް ރަޝީދެވެ.
އަންގާރަ ދުވަހުން ފެށިގެން ފަސް ދުވަހުގެ މުއްދަތަށް ކުރިއަށްދާ ތަމްރީން ޕްރޮގްރާމަކީ މޯލްޑިވްސް ޕޮލިސް ސާވިސްގެ އިންސްޓިޓިއުޓް ފޯރ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒްގެ އެހީތެރިކަމާއެކު ކުރިއަށް ގެންދާ ޕްރޮގްރާމެއް ކަމަށް އޭސީސީން ބުންޏެވެ.
ޕްރޮގްރާމް ފައްޓަވައިދެއްވުމުގެ ގޮތުން ވާހަކަފުޅު ދައްކަވަމުން އޭސީސީގެ ނައިބްރައީސް މުއައްވިޒް ވިދާޅުވީ، މި ޓްރޭނިންގ ޕްރޮގްރާމަކީ އޭސީސީން ކުރިއަށް ގެންދާ ތަހުގީގުތައް ހަރުދަނާ ކުރުމާއި ތަހުގީގުތަކުގެ ފެންވަރު މަތިކުރުމާއި، ދުވެލި އަވަސްކުރުމަށް ކުރިއަށް ގެންދެވޭ ޕްރޮގްރާމެއްކަމަށެވެ.
އަދި އެ ތަމްރީން ޕްރޮގްރާމް ކުރިއަށް ގެންދިއުމުގައި މޯލްޑިވްސް ޕޮލިސް ސާވިސްއިން ދޭ އެހީތެރިކަން މުއައްވިޒް ފާހަގަކުރެއްވި އެވެ.
އެ ރަސްމިއްޔާތުގައި އޭސީސީގެ މެމްބަރުންނާއި، އިސްމުވައްޒަފުންނާއި، ފުލުހުންގެ ޓްރެއިނިން އިންސްޓިޓިއުޓްގެ އިސްބޭފުޅުން ބައިވެރިވެ ވަޑައިގަތެވެ.
އޭސީސީން ބުނީ، އެ ތަމްރީން ޕްރޮގްރާމުގައި އެ ކޮމިޝަންގެ ހުރިހާ އިންވެސްޓިގޭޓަރުން ބައިވެރިވާ ކަމަށެވެ.