30 Aug 2015, 00:59
ވަކި ބޭފުޅެއް ގައުމު ތަރައްގީ ކޮށްދިން ކަމަށް ބުނެ ވާހަކަދެއްކުމުގެ ފުރުސަތެއް އެއްވެސް ރައްޔިތަކަށް ނޯންނާނެ ކަމަށާއި ރާއްޖެ ތަރައްގީކޮށް ރައްޔިތުންނަށް ދޭންޖެހޭ ހިދުމަތްތައް ދިނީ ވަކި ވެރިއެއް ނޫން ކަމަށް އެމްޑީއޭގެ ލީޑަރު އަދި މީދޫ ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު ސިޔާމު މުހައްމަދު ވިދާޅުވެއްޖެ އެވެ.
އެމްޑީއޭ ޒުވާނުންގެ ޖަގަހަ ހުޅުވުމަށް މިރޭ ބޭއްވި ހަފުލާގައި ވާހަކަފުޅު ދައްކަވަމުން ސިޔާމް ވިދާޅުވީ މީގެ 40 އަހަރުކުރިން ވެސް ރައްޔިތުންނަށް ބޭނުންވާ ހިދުމަތްތައް ދިނުމުގައި ރާއްޖޭގެ ވެރިން މަސައްކަތް ކޮށްފައިވާ ކަމަށެވެ.
"މުހައްމަދު އަމީނު ވެސް އިބުރާހިމް ނާސިރު ވެސް މައުމޫން އަބްދުލް ގައްޔޫމް ވެސް ވަނީ އެ މަސައްކަތް [ގައުމު ތަރައްގީކުރުން] ކޮށްފައި. އެހެންވީމަ ގެދޮރު ބިނާ ކުރުމާއި ރައްޔިތުންނަށް ދޭންޖެހޭ ހިދުމަތްތައް ދިނުމުގައި މަސައްކަތް ކުރަނީ މިގޮތަށް. ހަމައެކަނި އެއްބައެއް. ހަރުބޭފުޅުންނަށް މިކަންތައްތައް އެނގިވަޑައިގަންނަވާނެ،" ސިޔާމް ވިދާޅުވި އެވެ.
އޭނާ ވިދާޅުވީ ރާއްޖޭއަކީ ފުދުންތެރި ބަޔަކު ދިރިއުޅޭ ތަނަކަށް ހެދުމަށް ރަސްރަސްކަލުންގެ އިރުން ފެށިގެން އައީ މަސައްކަތް ކުރަމުން ކަމަށެވެ.
އެމްޑީއޭ ޒުވާނުން ޖަގަހަ ހުޅުވުމަށް މިރޭ ބޭއްވި ހަފުލާގެ ތެރެއިން: ސަން ފޮޓޯ/ ޔޫސުފް ސޮފްވާން
ސިޔާމު ވިދާޅުވީ ރާއްޖޭގެ ރައްޔިތުންނަށް ތަރައްގީ ގެނެސްދިނުމުގެ ގޮތުން މީގެ ހަތަރުވަރަކަށް އަހަރުކުރިން ބަޔަކު މީހުން މަސައްކަތް ކުރެއްވި ކަމަށެވެ. ނަމަވެސް އެ މަސައްކަތް ކުރައްވަން ނޭނގުމުގެ ސަބަބުން އެ ތަރައްގީ ވަޅު ޖެހިފައިވާ ކަމަށް ސިޔާމު ވިދާޅުވި އެވެ.
"އަޅުގަނޑުމެން ރާއްޖޭގެ ތަރައްގީއަކީ ކޮންއެއްޗެއްތޯ އަޅުގަނޑުމެން އެބަޖެހޭ ބަލާލަން. ގައުމެއް މުޖުތަމައުއެއް ތަރައްގަީ ވަނީ ކޮން ކަމަކުންތީ ބަލާލަން އެބަޖެހޭ. ރާއްޖެއަކީ ބޮޑު އާބާދީއެއް ނޫން ބޮޑު ލޭންޑެއް އޮތް ބައެއް ނޫން ވަރަށް މަދު މީސްކޮޅެއް ރާއްޖޭގައި މި އުޅެނީ. މި މަދު މީސްކޮޅު ރަނގަޅު ގޮތުގައި ރަނގަޅު ގޮތުގައި ތަރައްގީ ކުރެވިއްޖެ ނަމަ ރާއްޖޭގެ ރައްޔިތުންނަކީ ވަރަށް މުއްސަނދި ވަރަށް ރީތި ދިިރިއުޅުމެއް އުޅޭ ބަޔަކަށް ވެގެންދާނެ،" ސިޔާމު ވިދާޅުވި އެވެ.
ރާއްޖޭގެ ފަޅު ރަށްތައް މީގެކުރިން އޮތީ ހަމައެކަނި ބަރަވެލި އަރާ ރަށްތަކުގެ ގޮތުގައިކަން ފާހަގަކުރައްވަމުން ސިޔާމު ވިދާޅުވީ އަދުގެ ސަރުކާރު އައިފަހުން ރާއްޖެއަށް ގިނަ އިންވެސްޓުމަންޓުތައް އަންނަ ފަށާފައިވާ ކަމަށާއި ގިނަ ރަށްތައް ހެދި ގިނަ ބަޔަކަށް އޭގެން މަންފާ ލިބެމުން އަންނަ ކަމަށް އޭނާ ވިދާޅުވި އެވެ.
އޭނާ ވިދާޅުވީ ރާއްޖެ ތަރައްގީވާން އޮތީ އެއްބަޔަކު އަނެއް ބަޔަކު ލާމެހިގެން ކަމަށާއި ވަކިވެގަނެގެން ތަރައްގީއެއް ނާންނާނެ ކަމަށް ސިޔާމު ވިދާޅުވި އެވެ. އަދި ވިދާޅުވީ ދުނިޔޭގެ އެހެން ގައުމުތައް ތަރައްގީވެފައި ވަނީ ބުރަ މަސައްކަތުން ކަމަށެވެ.