01 Sep 2015, 10:55
މެންޗެސްޓާ ޔުނައިޓަޑްގެ ގޯލްކީޕަރު ޑެވިޑް ޑެހެއާ ރެއާލް މެޑްރިޑަށް ބަދަލުވުމަށް ދެ ޓީމްގެ ދެމެދުގައި އެއްބަސްވުމަކަށް އާދެވުނު ނަމަވެސް ޓްރާންސްފާއާ ގުޅޭ ލިޔުންތައް ސްޕެއިންގެ ޕްރޮފިޝަނަލް ލީގް (އެލްއެފްޕީ) ގެ އޮފީހަށް ހުށަހަޅަން ޖެހޭ ވަގުތަށް ނުފޮނުވުމުން މެންޔޫގައި ޑެހެއާ މަޑުކުރަން ޖެހިއްޖެއެވެ.
ލިޔުންތައް ހުށަހަޅަންޖެހޭ އެންމެ ފަހުން ވަގުތަކީ ރޭ ދަންވަރު 12:00 އެވެ. ނަމަވެސް ޑެހެއާގެ 30 މިލިއަން ޔޫރޯގެ ޓްރާންސްފާ ލިޔުންތައް އެލްއެފްޕީއަށް ފޮނުވިފައިވަނީ 12:28 ގައިކަމަށް އެލްއެފްޕީގެ އޮފިޝަލަކާ ހަވަލާދީ އޭއެސްގައި ބުނެފައިވެއެވެ.
ރެއާލްއަށް ޑެހެއާ އެންމެ އަވަހަށްވެސް ގެނެވޭނީ ޖެނުއަރީގައި ފެށޭ ފިނި މޫސުމުގެ ޓްރާންސްފާ ޕީރިއަޑްގައެވެ.
ރެއާލްއާ މެންޔޫއާ ދެމެދު ވަނީ ރެއާލްގެ މިހާރުގެ އެއް ނަންބަރު ކީޕަރު ކޮސްޓަރިކާގެ ކޭލޯ ނާވަަސް 15 މިލިއަން ޔޫރޯއަށް މެންޔޫއަށް ދޫކޮށްލުމަށް ވެސް މަޝްވާރާތައްކޮށްފައެވެ.
އެހެންކަމުން ރެއާލްގެ އެއް ނަންބަރު ކީޕަރުގެ ގޮތުގައި ނާވަސް ހުންނާނެކަން އޭނައަށް ވަނީ ޔަގީންވެފައެވެ.
ބްރެޒިލްއާ ދެކޮޅަށް މިމަހު ހަ ވަނަ ދުވަހު ކުޅޭ ބައިނަލްއަގުވާމީ ރަހުމަތްތެރި ކަމުގެ މެޗަށް އިއްޔެ ނާވަސް ކޮސްޓަރިކާއަށް ފުރަން އޮތް ނަމަވެސް އޭނާވަނީ ރެއާލްގައި އޭނާގެ ކުރިމަގު އޮތް ގޮތާ ބެހޭގޮތުން މަޝްވަރާތައް ކުރުމަށް މެޑްރިޑްގައި މަޑުކޮށްފައެވެ.