09 Sep 2015, 10:45
އަށާރަ ވަނަ ރައްޔިތުންގެ މަޖިލީހުގައި 85 މެންބަރުން ތިއްބަވާ އިރު، ޕީއެޗުޑީ ހެއްދެވި މެންބަރަކު މިހާތަނަކަށް ނެތެވެ. ނަމަވެސް އެ ޝަރަފު ނިލަންދޫ ދާއިރާގެ ޕީޕީއެމްގެ މެމްބަރު އަބްދުﷲ ހަލީލް ވަނީ ހޯއްދަވައިފަ އެވެ.
ހަލީލު ޕީއެޗުޑީ ހެއްދެވީ ޕަބްލިކް ޕޮލިސީގެ ރޮގުންނެވެ. އަދި ބުރޫނާއީގައި މިއަދު ބޭއްވި ގްރެޖުއޭޝަން ސެރެމަނީއެއްގައި ހަލީލަށް ވަނީ ޕީއެޗްޑީ ސެޓްފިކެޓް ލިބިވަޑައިގެންފަ އެވެ. އޭނާ އަށް ސެޓްފިކެޓް ހަވާލުކޮށްދެއްވީ އެ ސެރެމަނީ ޝަރަފުވެރިކޮށްދެއްވި، ބުރުނާއީގެ ރަސްގެފާނު ހަސަނުލް ބުލްގިޔާ އެވެ.
ހަލީލަކީ 18 ވަނަ ރައްޔިތުންގެ މަޖިލީހުގެ ގޮނޑިއެއް އެންމެ ވާދަވެރިކޮށް ކާމިޔާބު ކުރެއްވި މެންބަރު ވެސް މެ އެވެ. އެ އިންތިހާބުގައި އޭނާގެ ބޮޑުބޭބެ އަދި 17 ވަނަ ރައްޔިތުންގެ މަޖިލީހުގައި ނިލަންދޫ ދާއިރާގެ މެމްބަރުކަން ކުރެއްވި، އަބްދުލް މުހުސިން ހަމީދު ބަލި ކުރެއްވީ އެންމެ ވޯޓެއްގެ ތަފާތުންނެވެ. އޭނާ އެ އިންތިހާބު ކާމިޔާބު ކުރެއްވީ މިނިވަން ކެނޑިޑޭޓެއްގެ ގޮތުގައި ވާދަކުރައްވައިގެންނެވެ. ނަމަވެސް ފަހުން އޭނާ ވަނީ ވެރިކަން ކުރާ ޕީޕީއެމްއާ ގުޅިވަޑައިގެންފަ އެވެ.
ހަލީލަކީ ކުރިން އަތޮޅުވެރިކަން ވެސް ކުރައްވާފައިވާ ބޭފުޅެކެވެ. އޭނާ ވަނީ އއ. އަތޮޅާއި ނ. އަތޮޅު އަތޮޅުވެރިކަން ރައީސް މައުމޫންގެ ވެރިކަމުގައި ކުރައްވައިފަ އެވެ.
ހަލީލު ރައްޔިތުންގެ މަޖިލީހުގެ ގޮނޑިއަކަށް ވާދަކުރެއްވުމުގެ ކުރީން އޭނާ ހުންނެވީ ސިވިލް ސާވިސް ކޮމިޝަންގެ ސެކްރެޓަރީ ޖެނެރަލްގެ މަގާމުގަ އެވެ. ހަލީލްގެ ޕީއެޗްޑީ ތީސިސް ލިޔުއްވީ ލާމަރުކަޒީ ނިޒާމުން ރާއްޖޭގެ އިދާރީ ހިންގުމަށް ކުރާނެ އަސަރާ ގުޅޭ ގޮތުންނެވެ.