17 Sep 2015, 09:44
އަޟުހާ ޢީދާ ގުޅިގެން އަންނަ ބަންދު ދުވަސްތަކުގެ ތެރެއިން ބައެއް ދުވަސްތަކުގައި އުތީމު ގަނޑުވަރު ހުންނާނީ އާއްމުންނަށް ހުޅުވާފައި ކަމަށް ޑިޕާޓްމަންޓް އޮފް ހެރިޓޭޖް އިން ބުނެފިއެވެ.
އެ ޑިޕާޓްމެންޓުން މިއަދު ނެރުނު ބަޔާނެއްގައި ވަނީ އުތީމު ގަނޑުވަރު ހުޅުވާފައި ހުންނާނީ މިމަހުގެ 20 ފެށިގެން 22 އަށް އަދި މިމަހުގެ 26 އާއި 27 ވަނަ ދުވަހު ކަަމަށެވެ.
އެ ދުވަސްތަކުގައި އުތީމު ގަނޑުވަރު ހުޅުވާފައި ހުންނާނީ ހެނދުނު 09:00 އިން 12:00 އަށް އަދި މެންދުރު ފަހު 1:00 އިން 3:00 އަށް ކަމަށް ޑިޕާޓްމެންޓް އޮފް ހެރިޓޭޖުން ބުނެއެވެ.
އީދު ބަންދުގެ ބައެއް ދުވަސްތަކުގައި އުތީމު ގަނޑުވަރު ހުޅުވާ ގޮތަށް ހަމަޖެއްސީ އީދު ބަންދު ދުވަސްތަކުގައި އުތީމު ގަނޑުވަރު ބެލުމަށް ގިނަ ބަޔަކު ހއ. އުތީމަށް ދާތީ ކަަމަށް ޑިޕާޓްމެންޓް އޮފް ހެރިޓޭޖުން ބުނެއެވެ.
އުތީމު ގަނޑުވަރަކީ މުހައްމަދު ތަކުރުފާނުގެ ބައްޕަ ހުސައިން ޚަތީބު ތަކުރުފާނުގެ ގެއެވެ. އުތީމު ހަތަރުބެއިން ނާއި އާއިލާ ދިރިއުޅުއްވީ އެ ގޭގައެވެ. މިގެއަކީ މިހާރު ދިވެހިރާއްޖޭގައި ހުރި އެންމެ ދުވަސްވީ ގެއެވެ. މިގެ ޢިމާރާތް ކުރެވުނު ފަހުން ގާތްގަނޑަކަށް 500 އަހަރަށްވުރެ ގިނަދުވަސް ވެދާނެ ކަމަށް ތާރީޚު ދިރާސާކުރާ ބައެއް ފަރާތްތަކުން ބުނެއެވެ.
އެ ގަނޑުވަރުގައި ޕޯޗްގީޒުން އަތުން ރާއްޖެ މިނިވަންކުރި މުހައްމަދު ތަކުރުފާނު ބޭނުންފުޅު ކުރެއްވި ބައެއް ތަކެއްޗާއި އަވަހާރަފުޅު ލެއްޕެވި އަށިކޮޅުތައް އެބަހުއްޓެވެ.