23 Sep 2015, 17:52
ހޮނިހިރު ދުވަހު އާސެނަލާއި ދެކޮޅަށް ކުޅެ 0-2 ގެ ނަތީޖާއަކުން މޮޅުވި މެޗުގައި އާސެނަލްގެ ލޯރެން ކޮސިއެލްގެ މޫނުމަތީގައި ޖެހި މައްސަލައިގައި ޗެލްސީގެ ފޯވާޑް ޑިއޭގޯ ކޮސްޓާ ތިން މެޗަށް ސަސްޕެންޑުކޮށްފި އެވެ.
އެ މެޗުގައި އާސެނަލްގެ ގެބްރިއަލް ޕައުލިސްޓާ އަށް ދެއްކި ރަތްކާޑު އެފްއޭ އިން ބާތިލް ވެސް ކުރިއެވެ.
އެ މެޗްގައި ގެބްރިއަލް އަށް ރެފްރީ މައިކް ޑީން ރަތްކާޑު ދެއްކީ ކޮސިއެލްނީގެ މޫނުމަތީގައި ކޯސްޓާ ޖެހުމުން އުފެދުނު ހިންހަމަ ނުޖެހުންތަކެއްގައި ކޯސްޓާގެ ފައިގައި ގެބްރިއަލް ފަހަތުން ޖެހުމުންނެވެ.
ރެފްރީ މައިކް ޑީން އަށް ކޯސްޓާ، ކޮސިއެލްނީގެ މޫނުމަތީގައި ޖެހި މަންޒަރު ނުފެނުމުން އެ މެޗްގައި ކޯސްޓާ ވަނީ ކުޅެފައެވެ. ނަމަވެސް އެމަންޒަރު ކެމެރާއަށް ވަނީ އަރާފައެވެ. މެޗަށް ފަހު އާސެނަލް އިން ވަނީ އެފްއޭ އަށް އެ މައްސަލަ ހުށަހަޅާފައެވެ. މައްސަލަ ބެލި ކޮމިޓީގެ ތިން މެމްބަރުން ވެސް ނިންމީ އެއީ އޭނާ އަށް ސީދާ ރަތްކާޑެއް ދެއްކޭނެ ފަދަ އަމަލެއް ކަމަށެވެ.
ކޮސްޓާގެ މި ސަސްޕެންޝަނާ ގުޅިގެން އެނާއަށް ތިން މެޗް ގެއްލޭނެއެވެ. ލީގު ކަޕުގައި މިރޭ ވަލްސާލްއާ ދެކޮޅަށް ޗެލްސީ ކުޅޭ މެޗާއި ޕްރިމިއާ ލީގުގައި ނިއުކާސަލް ޔުނައިޓެޑާއި ސައުތުހެމްޓަންއާ ދެކޮޅަށް ކުޅޭ މެޗްގައިވެސް ކޯސްޓާއަކަށް ނުކުޅެވޭނެއެވެ.
ކޮސްޓާގެ ސަސްޕެންޝަނާ ގުޅިގެން ޗެލްސީން ވަނީ އެފްއޭގެ ނިންމުމާ މެދު ވަރަށް ބޮޑަށް ހިންހަމަނުޖެހޭކަން ހާމަކޮށް ބަޔާނެއް ނެރެފައެވެ. ކޯސްޓާ ވެސްވަނީ މި ތުހުމަތު ތަކަށް އިންކާރު ކޮށްފައެވެ.