29 Sep 2015, 19:30
ސިއްހީ ތަޖުރިބާކާރެއް ކަމުގައިވާ ޑރ. ނޯމަން މާކަސް ވަނީ ދާދި ފަހުން އެމެރިކާ ޓީވީ ޗެނަލެއް ކަމަށް ވާ ސީބީއެސް ގެ ޕްރޮގްރާމެއް ކަމަށް ވާ "ދި އާރލީ ޝޯ" ގައި ބުރަކަށީގައި ރިއްސާ ރިއްސުމުން ރައްކާތެރިވާން ކުރަންވީ ކަންތައްތަކެއް ކިޔައިދީފަ އެވެ.
ނިއުޔޯކް ޔުނިވާސިޓީ ސްކޫލް އޮފް މެޑިސިން ގެ ޑިރެކްޓާ އޮފް މަސްލް ޕެއިން ރިސާޗް ކަމުގައިވާ ޑރ. މާކަސް ބުނިގޮތުގައި އެހެން ކަންކަމަށް ވުރެ ގިނައިން މީހުން ބުރަކަށީގައި ރިއްސާ ރިއްސުމުގެ ސަބަބުން ސިއްހީ އިރުޝާދު ހޯދައެވެ.
ވަރަށް އާދައިގެ ކަންކަމުންވެސް ބުރަކަށީގެ ރިހުމުން ރައްކާތެރިވެވިދާނެ އެވެ.
އެގޮތުން ތިރީގައި މި ވަނީ ބުރަކަށީގެ ރިހުމުން ރައްކާތެރިވުމަށް ޑރ. މާކަސް ދިން 10 އިރުޝާދެވެ.
ތިމާ ނިދާ އެނދުގެ ސަބަބުން ބުރަކަށްޓަށް އަސަރުކުރެއެވެ. އެހެންކަމުން ޑރ. މާކަސް އިރުޝާދު ދެނީ ރޭގަނޑު ނިދަން އޮވެ އަވަސް އަވަހަށް ފުރޮޅުމާއި، އަޑިވެފައިވާ ގޮދަޑިއެއް ބޭނުން ކުރާނަމަ ގޮދަޑި ބަދަލު ކުރުމެވެ.
- އެނދުގައި ކުރާ ކަމަކުން ބުރަކަށްޓަށް އަސަރު ކޮށްފާނެ އެވެ. އެނދުގައި އޮށޯވެ އޮވެ ޓީވީ ބެލުން ނޫނީ ފޮތް ކިޔުން މިއީ ކުރުން ނޭދެވޭ ކަންކަމެވެ. ސަބަބަކީ ޓީވީ ބަލަން ބޯ ހިއްލާއިރު ކަރަށް ވާންވެ ކަރާއި ބުރަކަށީގައި ރިއްސަން ފެއްޓުން އެކަށީގެންވެ އެވެ.
- ގިނައިރު އެއްގޮތަކަށް އިށީނދެގެން ނީންނާށެވެ. ޑރ. މާކަސް ބުނިގޮތުގައި ގިނައިރު އެއްގޮތަކަށް އިށީނދެގެން އިނުމުގެ ސަބަބުން ހަށިގަނޑުގެ މަސްތަކަށް ވާން ކުރާނެ އެވެ. އެހެން ކަމުން އެދެވިގެންވާ ގޮތަކީ އަވަސް އަވަހަަށް އިށީނދެގެން އިންނަ ގޮތް ބަދަލު ކުރުމެވެ.
- އެއްފައިމައްޗަށް އަނެއްފައި ލާށެވެ. ޑރ. މާކަސް ވަނީ ސިނަމާއެއް ފަދަ އެއްގޮތަކަށް ގިނައިރު އިށީންދެގެން ހުންނަން ޖެހޭ ފަދަ ތަނެއްގައި ދޭތެރެ ދޭތެރެއިން އެއްފައި މައްޗަށް އަނެއް ފައި ވައްޓާލުމަށް އިރުޝާދު ދީފައެވެ. މިކަމުގެ ސަބަބުން ބުރަކަށި އަދި އުރުގެ މަސްތަކަށް ކަސްރަތު ލިބޭނެ އެވެ.
- ގޭތެރޭގައި އާންމުކޮށް ބޭނުންކުރާ ތަކެތި ފަސޭހައިން ނެގޭގޮތަށް ރައްކާކުރާށެވެ. އޭރުން ގުދުވާން، ނޫނީ ހަށިގަނޑު ދަމައިގެން މާ މަތީގައި ރައްކާކޮށްފައި ހުރި އެއްޗެއް ހޯދާކަށް ނުޖެހޭނެ އެވެ.
- ވޮލެޓު ޖިންސުގެ ފަހަތު ޖީބަށް ލައިފައި އޮތްނަމަ އޭގެ މަތީ ނީށީންނާށެވެ. ޑރ.މާކަސް އިރުޝާދު ދިނީ ފިރިހެނުން ޖިންސުގެ ނޫނީ ފަޓުލޫނުގެ ފަހަތު ޖީބަށް ވޮލެޓު ލައިގެން ތިބެ އެއްގޮތަކަށްވެސް އިށީންދެ ނެހެދުމަށެވެ. ފަހަތު ޖީބުގައި ވޮލެޓު އޮއްވާ އޭގެ މަތީ އިށީންދެއްޖެ ނަމަ ބުރަކަށީގައި ރިއްސައި، އެ ރިއްސުންގަނޑު ދިގު މުއްދަތަކަށް ދިގުދެމިގެން ހިނގައިދާނެ އެވެ.
- މާ ބަރުއެއްޗިހި އެކަނި ނޫފުލާށެވެ. ޑރ. މާކަސް ބުންޏެވެ، "އެހީ އަށް އެދޭށެވެ. އެހީ ލިބެންދެން މަޑުކުރާށެވެ. އެހީ ހޯދަން ލާރިދީގެން މީހުން ހިދުމަތް ހޯދާށެވެ. އެހެން ހެދެން ނެތް ނަމަ އެކަމެއް ނުކުރާށެވެ."
- ބަރު އެއްޗެއް އުފުލަން މަޖުބޫރު ވެއްޖެ ހާލަތެއްގައި ކަކޫ ލަންބާލާފައި އެ އެއްޗެއްގައި ހިފާށެވެ. އަދި އެ އެއްޗެއް ހަށިގަނޑާއި ކައިރި ކުރާށެވެ. އެހެން ހެދުމުން ލާންޖެހޭ ޕްރެޝަރެއްގެ ބޮޑުބައި ލެވޭނީ ފައިންނެވެ.
- ވިހެއުމަށްފަހު ބަރުދަން ލުއި ކުރަން މަސައްކަތް ކުރާށެވެ. އަދި ބުރަކަށީގެ މަސްތަކާއި، އުކުޅުވަޅާއި ބަނޑުގެ މަސްތައް ވަރުގަދަ ކުރުމަށް ކަސްރަތު ކުރާށެވެ. މާބަނޑު ދުވަސްވަރު މި ދިމަދިމާ ދެމި ބަލިކަށިވާނެ އެވެ.
- އޮފީހުގައި ކޮމްފިއުޓަރު ކީބޯޑުތައް ޑެސްކު މަތީ ނުބަހައްޓާށެވެ. ޑރ. މާކަސް ބުނާ ގޮތުގައި ކީބޯޑު ހުންނަންޖެހޭނީ ތިރީގައެވެ. ނުނީ ކަރުގައި އާއި ކޮންޑުގައި އާއި ބުރަކަށީގައި ރިއްސާނެއެވެ. ކީބޯޑު ޓްރޭ ޑެސްކުގެ ދަށުގައި ހުންނަނީ މިސަބަބަށް ޓަކައެވެ.