30 Sep 2015, 15:48
މާދަމާއިން ފެށިގެން ސަރުކާރުގެ މުއައްޒަފުން މަސައްކަތް ކުރަން ޖެހޭ ރަސްމީ ވަގުތު ހަ ގަޑިއިރަށް ބަދަލު ކުރުމާ ގުޅިގެން ޓީޗަރުން ސްކޫލުތަކުގައި ކިޔަވައިދޭ ވަގުތު ވެސް ހަ ގަޑިއިރަށް ވުރެ ދިގު ނުވާނޭ ގޮތަށް ބަދަލު ކުރުމަށް އެޑިއުކޭޝަން މިނިސްޓްރީ އިން ނިންމައިފި އެވެ.
މިނިސްޓްރީން މިއަދު ނެރުނު ބަޔާނެއްގައި ބުނެފައި ވަނީ މިހާރު ކިޔަވައިދޭ ޓީޗަރުންތައް ދަންފަޅިއެއްގައި ހޭދަ ކުރާ ވަގުތު ހަ ގަޑިއިރަށް ވުރެ ގިނަވާ ނަމަ ފުރަތަމަ ހަފްތާގައި މިހާރު ކިޔަވައިދޭ އުސޫލުން ކިޔަވައިދޭން ޖެހޭނެ ކަމަށެވެ.
މިހާރު ވެސް ކިޔަވައިދެމުން އަންނަ ޓައިމްޓޭބަލް އަށް ބަދަލެއް ގެނައުމެއް ނެތި ކިޔަވައިދޭން ޖެހޭނެ ކަމަށް މިނިސްޓްރީން ވަނީ ބުނެފަ އެވެ.
ޓީޗަރުން ދުވާލެއްގެ މައްޗަށް ހަ ގަޑިއިރަށް ވުރެ ގިނަ ވަގުތު ދަންފަޅިއެއްގައި ހޭދަ ކުރާ ނަމަ މިނިސްޓްރީގެ ޒޯންތަކުގެ ކޯޑިނޭޓަރުންނާ މަޝްރަވާކުރުމަށް ފަހު ޓައިމް ޓޭބަލް އެޑްޖަސްޓް ކުރަން ޖެހޭނެ ކަމަށް މިނިސްޓްރީ އިން ބުންޏެވެ. މިނިސްޓްރީ އިން ބުނެފައި ވަނީ ވަގުތު އެޑްޖަސްޓު ކުރުމަށް ފަހު ބަދަލާ އެކު އަންނަ ހަފްތާ ބުރާސްފަތި ދުވަހު ކިޔަވައިދޭން ފަށަން ޖެހޭނެ ކަމަށެވެ.
ދެ ދަންފަޅިއަށް މަސައްކަތް ކުރާ ޓީޗަރެއް ކަމުގައިވާ ނަމަ ކިޔަވައިދިނުމުގައި ހޭދަ ކުރާ ވަގުތު ޖުމްލަ ހަ ގަޑިއިރަށް ވުރެ ގިނަ ނުވާނެ ގޮތަށް ޓައިމްޓޭބަލް އެޑްޖަސްޓު ކުރަން ޖެހޭނެ ކަމަށް މިނިސްޓްރީ އިން ވަނީ ބުނެފަ އެވެ.
ސްކޫލުގެ ދަންފަޅި ފެށެންވައިރަށް ސްކޫލަށް ނުކުންނަން ޖެހޭ އިދާރީ މުއައްޒަފުންގެ މަސައްކަތް ވެސް ހަ ގަޑިއިރަށް ވުރެ އިތުރުނުވާނެ ގޮތަށް އިންތިޒާމްކުރަން ޖެހޭނެ ކަމަށް އެޑިއުކޭޝަން މިނިސްޓްރީން ބުންޏެވެ.
އަލަށް ގެންނަ ބަދަލާ އެކު ކޮންމެ މުއައްޒަފަކަށް 30 މިނެޓުގެ ހުސްވަގުތުކޮޅެއް ދެވެން ޖެހޭނެ ކަމަށް ވެސް މިނިސްޓްރީން ބުންޏެވެ.
އެޑިއުކޭޝަން މިނިސްޓްރީން ބުނެފައި ވަނީ މިހާރު ޓީޗަރުން އާންމުގޮތެއްގައި މަސައްކަތް ކުރަނީ ހަތް ގަޑިއިރު ނުވަތަ އެއަށް ވުރެ ގިނަ ވަގުތަށް ކަމަށެވެ. ސްކޫލުތަކުގެ ކިޔެވުން ހަތެއް ޖަހާއިރު މިހާރު ސްކޫލުތަކުން ފަށާއިރު އެ ވަގުތަށް ބަދަލެއް ނާންނާނެ ކަމަށް މިނިސްޓްރީން ވަނީ ބުނެފަ އެވެ. އަދި ދަރިވަރުން ސްކޫލްގައި ހޭދަ ކުރާ ގަޑިތަކަށް ވެސް ބަދަލު ނާންނާނެ ކަމަށް އެެޑިޔުކޭޝަނުން ބުންޏެވެ.