12 Oct 2015, 14:35
މޮސްކޯ (އޮކްޓޯބަރ 12): އެމެރިކާގެ ޖާސޫސީ އިދާރާތަކަކީ، ކަމަށް ގާބިލް އިދާރާތަކެއް ނަމަވެސް ހުރިހާކަމެއް އެއިދާރާތަކަށް ނޭންގޭނެ ކަމަށް ރަޝިޔާގެ ރައީސް ވްލަޑިމޭރު ޕޫޓިން ވިދާޅުވެއްޖެއެވެ.
ރަޝިޔާގެ ޗެނެލްވަންގެ ޕްރޮގްރާމެއްގައި ވާހަކަ ދައްކަވަމުން ޕޫޓިން ވިދާޅުވީ، ކެސްޕިޔަން ކަނޑުގައި އޮންނަ ރަޝިޔާގެ ފްލީޓްގެ މަނަވަރުތަކުން ފޮނުވާލި ދުރުރާސްތާގެ މިސައިލްތަކާބެހޭގޮތުން އެމެރިކާގެ ޖާސޫސީ އިދާރާތަކުން ހާމަކުރި މައުލޫމާތުން އެކަމުގެ ފުރިހަމަ މައުލުމާތު އެއިދާރާތަކަށް ލިބިފައިނުވާކަން ހާމަވާ ކަމުގައެވެ.
ކެސްޕިޔަން ކަނޑުގައި އޮންނަ ރަޝިޔާގެ ފްލީޓުން ސޫރިޔާގައިވާ އައިއެސްގެ މަރުކަޒުތަކަކަށް ފޮނުވާލި މިސައިލްތައް ސޫރިޔާއަށް ނުފޯރައި އެތަކެތި ވެއްޓުނީ އީރާނަށް ކަމަށް އެމެރިކާގެ ޖާސޫސީ ފާރަތްތަކުން ބުނެފައިވެއެވެ. ނަމަވެސް އެތަކެތި ވެއްޓުނު އީރާނުގެ ސަރަހައްދެއް ބުނެދޭން އެމެރިކާގެ ޖާސޫސީ ފަރާތްތަކަށް އެނިފައެއް ނުވެއެވެ.
ރަޝިޔާއާއި އީރާނުންވަނީ މިކަން ދޮގުކޮށްފައެވެ. ރަޝިޔާގެ ފްލީޓުން ފޮނުވާލި މިސައިލްތައް އީރާން ހުރަސްކޮށް އިރާގު މަތިން އުދުހުނުކަން އިރާގުންވެސް ހާމަކޮށްފައިވެއެވެ. ރަޝިޔާއިންވަނީ މި މިސައިލްތައް އޭގެ އަމާޒަށް ވާސިލްވިކަން ކަށަވަރުކޮށްދީފައެވެ. އަދި މިއީ ރަޝިޔާއިން ފަހުން އުފެއްދި ސްމާޓް ޓެކްނޮލޮޖީގެ މިސައިލެއްކަމަށާއި މިއީ ކާމިޔާބުކަމާއެކު އެތަށްފަހަރެއްގެ މަތިން ތަޖްރިބާކޮށްފައިވާ މިސައިލް ނިޒާމެއްކަމަށް ރަޝިޔާއިން ބުނެއެވެ.
މިކަމާބެހޭގޮތުން ވާހަކަ ދައްކަވަމުން ޕޫޓިން ވިދާޅުވީ، އެމެރިކާގެ ޖާސޫސީ އިދާރާއިން އިރާގުގައި ފަނާކުރަނިވި ހަތިޔާރު ހުރިކަންވެސް ކަށަވަރުކޮށްދިން ކަމަށާއި ނަމަވެސް އެއީ އަސާސެއްނެތް ވާހަކަ ތަކެއްކަން ފަހުން ހާމަވެފައިވާ ކަމުގައެވެ.
އެމެރިކާގެ މިސައިލްތަކާއި ބޮމުގެ ހަމަލާތައް ވަރަށް ގިނައިން އަމާޒުން ކައްސާލާ ކަމަށް އެމެރިކާވެސް އެއްބަސްވެފައިވެއެވެ. އެމެރިކާގެ ގިނަ ހަމަލާތައް ހޮސްޕިޓަލްތަކަށާއި ސްކޫލްތަކަށާއި މީހުންގެ ގެދޮރަށް އަރަނީވެސް އެތަކެތި އަމާޒަށް ވާސިލްނުވާތީކަމަށް ޚުދު އެމެރިކާ ބުނެއެވެ. (އާރުޓީ)