14 Oct 2015, 12:07
ކުރިއަށް އޮތް ތިން މަސް ދުވަހުގެ ތެރޭގައި ގައުމީ ޓީމުގެ ކުޅުމަށް ބޮޑެތި ބަދަލުތަކެއް ގެނެސް މުޅިން ތަފާތު ޓީމެއް ފެނިގެން ދާނޭ ކަމަށް ގައުމީ ޓީމާ ހަވާލުވެ ހުރި ނިއުޒީ ލެންޑް ކޯޗް ރިކީ ހާބަޓް ބުނެފި އެވެ.
ވޯލްޑް ކަޕް 2018 އަދި އޭޝިއަން ކަޕް 2019ގެ ޖޮއިންޓް ކޮލިފިކޭޝަންގައި ރޭ ގަތަރު އަތުން 4-0 އިން ރާއްޖެ ބަލިވި މެޗަށް ފަހު ކޯޗު ބުނީ، އޭނާގެ ކުޅުންތެރީން ދެއްކި ކުޅުމާ ދޭތެރޭގައި ވަރަށް ބޮޑަށް ހިތްހަމަ ޖެހޭ ކަމަށެވެ. އަދި ބައިނަލްއަގްވާމީ މެޗުތައް ކުޅޭއިރު ފިޓްނަސް އަކީ ވަރަށް މުހިއްމު އެއްޗެއް ކަމަށާއި ރާއްޖޭ ޓީމަށް ދިމާވި އެންމެ ބޮޑު މައްސަލައަކީ އެއީ ކަމަށް ކޯޗު ބުންޏެވެ.
"ބައިނަލްއަގްވާމީ މެޗެއް ކުޅޭކަށް ފަސޭހައެއް ނުވާނެ 90 މިނިޓް ވަންދެން ފިޓްނަސް ލެވެލް ރަނގަޅަށް ނުހިފެހެއްޓޭ ނަމަ. އަހަރެމެން އަދި ހަމަ ކިރިޔާ މި ފަށައިގަތީ، މިއީ އާ ފެށުމެއް،" 2010 ވަނަ އަހަރުގެ ވޯލްޑް ކަޕަށް ނިއުޒި ލޭންޑް ކޮލިފައިކޮށްދިން ކޯޗު ބުންޏެވެ.
ގަތަރާ ދެކޮޅަށް ރޭ ރާއްޖެ ކުޅުނު މެޗުގެ ތެރޭން -- ފޮޓޯ: ގަތަރުފުޓްބޯލް
ރިކީ ހާބަޓްގެ މޮޅު ރޭވުންތެރިކަމާ އެކު ރާއްޖޭގެ ޓީމުން އެކުލަވައިލި ކޮމްޕެކްޓް ޑިފެންސްގެ ސަބަބުން ރޭގެ މެޗުގައި ގަލްފުގެ ޗެމްޕިއަން ގަތަރަށް ރާއްޖޭގެ ގޯލް ހުޅުވައިލާން 28 މިނިޓް ނެގި އެވެ. އެގޮތުން އަމިއްލަ ދަނޑުގައި ވަރުގަދަ އެޓޭކިން ގޭމެއް ކުޅެމުން ދިޔަ ގަތަރުގެ ފުރަތަމަ ލަނޑު ޖަހައިދިނީ ބޫއަލަމް ކޫކީ އެވެ.
އެއް ލަނޑުގެ ލީޑަކާ އެކު ދެވަނަ ހާފް ފަށައިގެން އެޓީމަށް ރާޖޭގެ ގޯލަށް ދެވަނަ ބޯޅައެއް ވައްދައިލެވުނީ، މެޗުގެ 68 ވަނަ މިނިޓްގަ އެވެ. މުހައްމަދު ކަސޯލާ އެ ލަނޑު ޖެހިތާ މިނިޓެއްގެ ތެރޭގައި ބުއަލަމް ވަނީ، ގަތަރުގެ ލީޑު 3-0 އަށް ފުޅާކޮށްދީފަ އެވެ. އެޓީމުގެ ފަހު ލަނޑު މެޗު ނިމެންދަނިކޮށް ކާމިޔާބުކޮށްދިނީ، މުހައްމަދު މޫސާ އެވެ.
ކޯޗު ބުނީ، ގްރޫޕްގައި އޮތް އެންމެ ވަރުގަދަ ޓީމާ ދެކޮޅަށް ކުރެވެން ހުރި ހުރިހާ ކަމެއް ކުރި ކަމަށެވެ. ކުޅުންތެރީންގެ ފަރާތުން ފެނިގެން ދިޔަ ކުޅުމާއި ހިތްވަރާ މެދު ފަހުރުވެރިވާ ކަމަށެވެ.
"ގަތަރު ޓީމު އޮތީ ގްރޫޕްގެ އެންމެ ކުރީގައި އަދި އެއީ ވަރަށް ވަރުގަދަ ޓީމެއް. ވާދަވެރި ކުޅުމެއް ދައްކަން ކުރެވެން ހުރި ހުރިހާ ކަމެއް އަހަރެމެން ކުރިން، އަދި ފުރަތަމަ ހާފްގައި އަހަރެމެން ވަރަށް ރަނގަޅަށް ކުޅުނިން،" ކޯޗު ބުންޏެވެ.
ގަތަރާ ދެކޮޅަށް ރޭ ރާއްޖެ ކުޅުނު މެޗުގެ ތެރޭން -- ފޮޓޯ: ގަތަރުފުޓްބޯލް
މިހާރުގެ އެންމެ ބޮޑު އަމާޒަކީ އަން ޑިސެމްބަރުގައި ބާއްވާ ސާކް ސަރަހައްދުގެ އެންމެ ބޮޑު ފުޓްބޯޅަ މުބާރާތްކަމަށްވާ، ސާފް ޗެމްޕިއަންކަން ފާހަގަކޮށް ކޯޗު ބުނީ، "ކުރިއަށް އޮތް ތިން މަސް ދުވަހުގެ ތެރޭގައި އަހަރެމެން ފެންނާނީ މުޅިން ތަފާތުކޮށް،" ކަމަށެވެ.
ރިކީ ހާބަޓްގެ އިރުޝާދުގެ ދަށުން ގައުމީ ޓީމް ކުޅުނު ފުރަތަމަ މެޗު، ބޫޓާނާ ވާދަކޮށް 4-3 ލަނޑުން ކާމިޔާބުކޮށްފައިވާ އިރު އެ މެޗުގައި ވެސް ރާއްޖޭގެ ކުޅުންތެރީންނަށް ދިމާވި އެންމެ ބޮޑު މައްސަލައަކީ ބުންވަރުގެ މައްސަލަކަން ކޯޗު ފާހަގަކުރި އެވެ.
ކޮލިފަައިންގައި ރާއްޖޭ ދެން އެންމެ އަވަހަށް ވާދަކުރާން ޖެހޭނީ ހޮންކޮންގާ ދެކޮޅަށެވެ. އެ މެޗު އޮންނާނީ ނޮވެމްބަރު 12 ވަނަ ދުވަހު މާލޭގަ އެވެ.